Read Bima 1 TESALONIKA 4 Bible Online

1 TESALONIKA 4 - Bima bible

1 TESALONIKA 4

¹Cumpukaina cina ra angi, nami wa'ura mbeimu conto rawi mataho d̄i nggomid̄oho mab̄oha b̄uneku nggomid̄oho pab̄uapu mori kasanamu Ruma Hatalla. Poda nggomid̄oho wa'ura morimu b̄une ede. Pala ake kai kuasa Ruma Isa, nami maraho poda-poda d̄i nggomid̄oho ro mapakasamu loakud̄u nggomid̄oho ma'usaha wali d̄i ade lampa rawi ede!

²B̄ara nggomid̄oho wa'ura b̄ademu ngoa ra tei-ngoa ra tei ma wa'ura mbei b̄a nami d̄i nggomid̄oho kai kuasa Ruma Isa.

³Akeku rakane'e b̄a Ruma Hatalla: Loakud̄u nggomid̄oho morimu d̄i ru'u b̄a Sia mpoampa, raso, kad̄o'opu samenana ruku ra rawi ma sampu ra nggele.

⁴Sanikina dou mone d̄i weki nggomid̄oho pab̄uaku b̄adena b̄uneku mori sama lab̄o weina kai cara kasana Ruma Hatalla ro manusia.

⁵Aina mori b̄atumu rakane'e hawa nawasu d̄i weimu, b̄une rakarawi b̄a dou-dou ma wati pata Ruma Hatalla.

⁶D̄i ade lampa rawi b̄une ede, ai to'ina kone sab̄ua dou rau makarawi mancara d̄i cina ra angina, atao tipuna. Ntoina nami wa'ura ngoa ra kawara kapodamu d̄i nggomid̄oho, b̄a one Ruma d̄imahukumna dou-dou ma karawi lampa rawi-lampa rawi mancara b̄une ede.

⁷Ruma Hatalla ouna ndaita, laina loakud̄u ndai mori sampu ra nggele, malaisi loakud̄u ndai mori kai cara ma kasana wea Ruma Hatalla.

⁸Dou ma tula ngoa ra tei ake, laina tulana manusia, malaisi natulaku Ruma Hatalla ma mbei Roh-Na ma raso d̄i nggomid̄oho.

⁹Watid̄u paralu walina nami matunti sura d̄i nggomid̄oho mab̄oha b̄uneku nggomid̄oho pab̄uamu meci ra ca'umu cina ra angi ma sama-sama imbimu. Ndai nggomid̄oho wa'ura katei b̄a Ruma Hatalla d̄i cua-cua mecikaimu angi.

¹⁰Ro lampa rawi ake wa'ura katada b̄a nggomid̄oho d̄i samenana cina ra angi masama-sama imbimu d̄i sara'a dana ra rasa Makedonia. Pala cina ra angi, nami ma raho poda-poda, loakud̄u morimu ndad̄i ncewi taho wali.

¹¹Usahapu mori kai sana ro aina lu'umu d̄imasa'ala dou makalai. Pab̄uapu nggomid̄oho karawi ngupa ngaha ndaimu, b̄une rakaukai b̄a nami ntoina d̄i nggomid̄oho.

¹²Nggomid̄oho mamorisi b̄une ede, nggomid̄oho wati wi'ikai morimu d̄i cou-cou rau, ro dou-dou ma wati imbi d̄i Al Masih, d̄imalia ra horomana nggomid̄oho.

¹³Cina ra angi, ne'e b̄a nami loakud̄u nggomid̄oho b̄ademu ma sapodakaina mab̄oha dou-dou ma wa'ura made; loakud̄u nggomid̄oho aina ncoki ademu b̄une dou-dou makalai ma wati ntau imbi d̄i mori mamai kento.

¹⁴Ndai ta'imbiku b̄a one Ruma Isa wa'ura made ro mori mbali. B̄ara ndedena ndai ta'imbi rauku b̄a one Ruma Hatalla d̄imakamori mbali sara'ana dou ma imbi d̄i Ruma Isa ro mawa'ura made, loakud̄u siad̄oho mori samana lab̄o Sia.

¹⁵ Mab̄oha lampa rawi ede, akeku rangoa ra tei b̄a Ruma d̄i ne'e karongga b̄a nami d̄i nggomid̄oho: Wakatu mai Ruma Isa, ndai ma mbuipu mori wati d̄ima'ulu d̄i dou-dou ma wa'ura made ulu.

¹⁶Peade mala'eka mad̄ese ra ntasa d̄imanggahi kana'e lab̄o tarompe Ruma Hatalla d̄i ka'eli tanda sadiakaina. Edempara ndai Ruma Isa d̄imalondo rad̄i saroga, ro dou-dou ela Al Masih ma wa'ura made d̄i kamori mbali ulu.

¹⁷Sawa'u b̄a ede, ndai ma mbuipu mori d̄i wakatu ede d̄i hanta sama-sama lab̄o siad̄oho d̄ei ade apu d̄i edakai angi lab̄o Ruma ese woha ai. Edempara ndai d̄imangge'e lab̄o Ruma santoi-ntoina.

¹⁸B̄ara ndedena, pab̄uapu nggomid̄oho cua-cua katenggo kali cempe ade angi kai kanimu nggahi ra eli ake.