Read Bima 2 TESALONIKA 1 Bible Online

2 TESALONIKA 1 - Bima bible

2 TESALONIKA 1

¹ Cina ra angi ela Ruma d̄i Tesalonika, ma ndad̄i ela Ruma Hatalla Ama ndaita ro Ruma Isa Al Masih! Nami, eded̄u Paulus, Silas ro la Timotius

²mapamao raho-raho to'impa Ruma Hatalla Ama ndaita ro Ruma Isa Al Masih mambei bareka ro taho ra ntai d̄i nggomid̄oho.

³Cina ra angi, nami mapab̄ua ncauku renta tarima kasi d̄i Ruma Hatalla b̄ara nggomid̄oho. Ro patu romo nami karawimu b̄une ede, b̄ara nggomid̄oho manaha imbi d̄i Al Masih, ro nggomid̄oho manaha meci ra ca'u d̄i sab̄ua dou lab̄o sab̄ua dou.

⁴B̄ara ndedena b̄ab̄au nami nuntukaimu mab̄oha nggomid̄oho sanikina nami lao lambamu ela-ela Ruma Hatalla. Kai bangga nami ngoamu b̄uneku nggomid̄oho nge'empa imbi podamu d̄i Al Masih d̄i ade rakancoki ro susa ra ncoki ra'iu b̄a nggomid̄oho.

⁵Ro ta'akera tadakaina na'adiku hukuma b̄a Ruma Hatalla: Nggomid̄oho wa'ura susa ra ncokimu b̄ara Karaja'an Allah, ro b̄ara ndedena nggomid̄oho d̄i wi'ikai patuna d̄imalu'u tad̄eina.

⁶Sia d̄imakarawina au rama'adi, ro d̄imacola cepena susa ra ncoki d̄i dou ma kandad̄ina nggomid̄oho susa ra ncoki.

⁷Ro d̄iru'u b̄a nggomid̄oho ma wunga susa ra ncoki ake — ndede rauja d̄iru'u b̄a nami — Ruma Hatalla d̄imahori samenana susa ra ncokimu wakatu ainaina londokai Ruma Isa rad̄i saroga ro katadana weki-Na lab̄o mala'eka-mala'eka-Na ma wancu tenggo

⁸ro kai afi ma kalea ngganga. Sia londona d̄imahukumna dou-dou ma wati kade'e nggahi Ruma Hatalla ro ma wati ngawa mori mancihi ncao lab̄o Haba Mataho mab̄oha Ruma Isa Ruma ndaita.

⁹ Dou-dou ede d̄imatarima hukuma iha leli santoi-ntoina, d̄i paki kalosa rad̄i ade ngge'ekai Ruma ro rad̄i kuasa-Na ma d̄ese ra ntasa;

¹⁰samenana ede d̄imandad̄i wakatu ainaina maikai Sia peade d̄i kad̄ese ra kantasakai b̄a ela-Na ro d̄i lia ra horoma b̄a samenana dou ma imbi. Nggomid̄oho rau d̄imawara d̄i weki ela Ruma Hatalla ede, b̄ara nggomid̄oho wa'ura imbimu d̄i haba rakarongga b̄a nami d̄i nggomid̄oho.

¹¹B̄ara ndedena nami mado'a ncau d̄iru'u b̄a nggomid̄oho. Nami do'a weamu loakud̄u Ruma Hatalla ma kandad̄ina nggomid̄oho patu d̄imamori b̄atu rakane'e b̄a Sia; b̄ara ndedena Sia ouna nggomid̄oho. Raho-raho to'impa Ruma Hatalla, kai kuasa-Na, makancihina rakane'emu d̄i karawi kai mataho, ro d̄imakasampuruna samenana karawi rakarawi b̄a nggomid̄oho b̄ara imbimu d̄i Al Masih.

¹²Kai ndedena Ruma ndai Isa d̄ikad̄ese ra kantasa b̄a nggomid̄oho, ro nggomid̄oho rau d̄ikad̄ese ra kantasa b̄a Ruma Isa b̄ara anugera Ruma Hatalla ndai ro Ruma Isa Al Masih.