Read Bima 2 TESALONIKA 2 Bible Online

2 TESALONIKA 2 - Bima bible

2 TESALONIKA 2

¹ Mab̄oha maikai Ruma ndai Ruma Isa Al Masih, ro mab̄oha d̄i kab̄orokaina ndai d̄imangge'e sama lab̄o Sia, akeku d̄i raho poda-poda b̄a nahu d̄i nggomid̄oho:

²Aina roci dahu atao darura ade b̄ara warana haba b̄a wa'ura raka ainaina mai mbalikai Ruma Isa. Kombisi haba ede ramaina tasab̄ua nggahi rakarongga b̄a Ruma, atao rad̄i sab̄ua ngoa ra tei; atao loa ndad̄i wara ma nggahi b̄a one nami parana tunti mab̄une ede d̄i ade sab̄ua sura nami mawara.

³B̄une b̄e rau, aina co'omu dou matipu nggomid̄oho. B̄ara sawatipu b̄a wontuna Ainaina ede, pab̄uaku ndad̄i uluna lampa rawi ake: Mboto dou d̄imamurta, marungka imbi d̄i Al Masih; ro Manusia Madab̄ae rawa'u katantu d̄imalu'u ade anaraka, d̄imakatada weki.

⁴ Kai kasombo weki sia d̄ima'ao ro ka'esena weki d̄i samenana ranemba b̄a manusia, atao sara'ana berhala rawi'ikai Ruma Hatalla b̄a manusia. Bahkan sia d̄imanaha doho ta d̄ei Bait Allah ro ngoana d̄i dou-dou b̄a one siaku eded̄u Ruma Hatalla.

⁵Kawarapu b̄a one nahu wa'ura ngoaku samenana ede aipu wakatu nahu mbuipu lab̄o nggomid̄oho.

⁶Ro nggomid̄oho mab̄adeku au ma wunga ake mambuipu tapa ndad̄ina samenana ede. Peasi wakatu rawa'u katantu b̄a Ruma Hatalla, Manusia Madab̄ae ede d̄imawontu.

⁷Tenggo ra wale ma karawina lampa rawi madab̄ae ede wa'ura tampu'una karawi kai cara rahasia, pala mbuipu d̄i tapa-tapa. Peasi nggara maratapana ede wa'ura kambora,

⁸ ede ampona tada Manusia Madab̄ae ede. Ndad̄i namaisi Ruma Isa, Sia d̄imahade Manusia Madab̄ae ede kai nawa maralosa d̄i asa-Na, ro kalelina kai d̄ese ra ntasa maikai-Na.

⁹ Manusia Madab̄ae ede d̄imawontu kai kuasa ma na'e ma ramai ta Ibilis. Sia d̄imandawi mboto pahuna lampa rawi mab̄isa ra guna ro lampa rawi maheba poda ma b̄inikai b̄a kuku keko.

¹⁰Sia d̄imakani samenana kuku keko ma dab̄ae d̄i kasantudana dou-dou d̄ima'iha leli. Siad̄oho d̄ima'iha leli b̄ara tula aona ro wati ca'una haba ma poda ma ramai ta Ruma Hatalla ma loana kasalama siad̄oho.

¹¹B̄ara ndedena Ruma Hatalla kamaina d̄i siad̄oho sab̄ua kuasa ma kasantuda, ndad̄ina siad̄oho imbi d̄i au ma wati podana.

¹²Ndad̄ikaina, sara'ana dou ma ca'u d̄i dosa ro ma wati imbina d̄imapoda ede, d̄i hukum.

¹³Cina ra angi rameci ra ca'u b̄a Ruma! Pab̄uaku nami renta tarima kasi ncau d̄i Ruma Hatalla mab̄oha nggomid̄oho, b̄ara ra'aipu saramba wa'una Ruma Hatalla kad̄alena nggomid̄oho d̄i kasalama. Lampa rawi ede ndad̄ina b̄a au rakarawi b̄a Roh Allah d̄i nggomid̄oho d̄ikandad̄ikaina nggomid̄oho ela Ruma Hatalla ma raso ro b̄ara nggomid̄oho imbimu d̄i haba ma poda rad̄i Ruma Hatalla.

¹⁴Ru'u edeku Ruma Hatalla ouna nggomid̄oho kai Haba Mataho rangoa ra kahaba b̄a nami d̄i nggomid̄oho. Ruma Hatalla ouna nggomid̄oho, b̄ara Sia ne'ena loakud̄u nggomid̄oho iumu d̄ese ra ntasa Ruma ndai Ruma Isa Al Masih.

¹⁵B̄ara ndedena, cina ra angi, kid̄i katenggopu wekimu ro nenti ntuwupu d̄i au rangoa ra tei-ngoa ra tei ma wa'ura mbei b̄a nami d̄i nggomid̄oho, nataho kai ngoa asa ro kai sura.

¹⁶Raho-raho to'impa Ruma ndaita ndai Isa Al Masih, ro Ruma Hatalla Ama ndaita marere ro makatenggona ademu, loakud̄u nggomid̄oho loa karawi ro ngoa ra kahabamu au ma taho. B̄ara Ruma Hatalla mameci ra ca'u ndaita, ro b̄a taho ade-Na, Sia kandad̄ina ndai ngge'empa lembo ade, ro ne'emu ma taho.