Read Bima 2 TESALONIKA 3 Bible Online

2 TESALONIKA 3 - Bima bible

2 TESALONIKA 3

¹Cumpukaina, cina ra angi, do'a weapu d̄iru'u b̄a nami. Do'apu loakud̄u haba ma ramai ta Ruma loa mbou rero ntuwukai roci ro tarima kai taho, sama b̄une ma wa'ura ndad̄i d̄i nggomid̄oho ntoina.

²Do'a raupu loakud̄u Ruma Hatalla kasalamana nami rad̄i dou-dou ma dab̄ae. B̄ara wati sara'ana dou ma imbina haba ma ramai ta Ruma ede.

³Pala Ruma nato'a. Sia d̄imakatenggo nggomid̄oho ro d̄i masandaka nggomid̄oho rad̄i Ibilis.

⁴Ro nami ma'imbi poda d̄i Ruma mab̄oha nggomid̄oho, b̄a one nggomid̄oho wunga karawimu ro d̄imakarawi ntuwu au rakaukai b̄a nami d̄i nggomid̄oho.

⁵Raho-raho to'impa Ruma mad̄endena nggomid̄oho d̄i ncewi loakaimu ka'ao b̄a one Ruma Hatalla mameci ra ca'u nggomid̄oho lab̄o Al Masih mambei lembo ade d̄i nggomid̄oho.

⁶Cina ra angi, kai kuasa Ruma Isa Al Masih, nami maparenta loakud̄u nggomid̄oho kad̄o'omu weki lab̄o sara'ana cina ra angimu, ma mori kad̄aju weki, ro ma wati b̄atu ngoa ra tei-ngoa ra tei rambei b̄a nami d̄i siad̄oho.

⁷Ndai nggomid̄oho mab̄adeku b̄a one nggomid̄oho pab̄uapu b̄atumu conto nami. Nami wati kad̄ajumu weki aipu nami waramu d̄i woha nggomid̄oho.

⁸Nami wati ngahamu ngaha ra nono dou kai wati colamu. Pala aimarai aimangad̄i nami karawi kapodamu ade loakud̄u nami wati kasusamu cou-cou rau d̄i ade weki nggomid̄oho.

⁹Nami karawimu ede laina b̄ara nami wati ntaumu hak d̄i kau pakasa loakud̄u nggomid̄oho bantumu nami, pala b̄ara nami mane'e ndad̄i conto mataho d̄iru'u b̄a nggomid̄oho.

¹⁰Aipu wakatu nami mbuipu wara d̄iwoha nggomid̄oho, nami mambeimu atora ake, ”Dou ma wati ngawa karawi, wati loana ngaha.”

¹¹Nami nggahi ndedekaimu b̄ara ringa b̄a nami wara dou-dou d̄i weki nggomid̄oho ma mori kad̄aju weki. Siad̄oho wati karawina au-au, selasi repo kalu'u weki d̄i lampa rawi dou makalai.

¹²Kai kuasa Ruma Isa Al Masih nami makau d̄i dou-dou ede ro mangoa kapodana, loakud̄u siad̄oho karawina kai sana ade ro ngupa ngaha ra nono d̄i ru'u b̄a ndai siad̄oho.

¹³Pala nggomid̄oho aina mawu ade karawimu mataho.

¹⁴Kombisi peade wara dou ma wati ngawa b̄atu au ranggahi b̄a nami d̄ei ade sura ake. Aina kabare d̄i dou b̄une ede ro aina rewo lab̄omu sia loakud̄u sia majana.

¹⁵Pala aina karawimu d̄i sia kai musu; cuma ngoa ra tei katahopu sia kai sa'e ra ari.

¹⁶Ruma eded̄u fu'u ramaikai taho ra ntaikai ndai. Raho-raho to'impa Sia mbei ncauna d̄i nggomid̄oho taho ra ntai d̄i ade samenana lampa rawi. Raho-raho to'impa Ruma malab̄ona nggomid̄oho sara'ana.

¹⁷Salam rad̄i nahu, Paulus. Ndai nahu maratuntina ake. Akeku tandana ratau b̄a nahu d̄i samenana sura nahu.

¹⁸Raho-raho to'impa Ruma ndaita Isa Al Masih mambei bareka d̄i nggomid̄oho sara'ana. Salam do'a nami, Paulus