Read Bima 1 TIMOTIUS 3 Bible Online

1 TIMOTIUS 3 - Bima bible

1 TIMOTIUS 3

¹Nancihi poda nggahi ra eli ake, ”Dou ma ne'e ndad̄i dou mana'ekai ela Ruma, nane'e sab̄ua karawi ma ipi ntau co'i.”

² Sab̄ua dou mana'e ela Ruma pab̄uaku dou ma dawara ncara, sab̄uampa weina, b̄ade pi'i ade, loa timba ra lemba, ro to'a wakatu; sia naca'u tarima dou d̄i umana, ro naloa tei dou;

³aina dou ma ca'u mawu, atao ma ca'u ncao. Pala, sia pab̄uaku ntika nggahi ra elina ro naca'u d̄imataho. Sia wati loana na'e ade d̄i piti.

⁴Sia pab̄uaku b̄adena ato kataho uma ra salajana, ro ngoa ra tei anad̄ohona d̄imato'a ro lia ra horoma d̄i ndaina.

⁵B̄ara nggara dou wati loana ato uma ra salaja ndaina, b̄uneku sia loana ato ela Ruma Hatalla?

⁶Sab̄ua dou mana'ekai ela Ruma wati loana dou ma b̄oumpa lu'una ndad̄i ela Al Masih, b̄ara peade sia nasombo edempara b̄oha b̄a sumpa b̄une Ibilis ntoina.

⁷Sia pab̄uaku dou ma taho ngara ade ela ra dou; b̄ara nggara watisi ndedena, ndad̄i sia nakatuna ra kab̄awaku b̄a dou, ndad̄ina, namab̄u ade kuasa Ibilis.

⁸Dou mabantu ela Ruma pab̄uaku dou ma taho ro nira adena; wati na'e adena d̄i piti ro wati ca'una nono ipi mboto anggo.

⁹Siad̄oho pab̄uaku nenti kaciana kai ade mpida ma raso d̄i ngoa ra tei Kristen ma wa'ura katada b̄a Ruma Hatalla.

¹⁰Pab̄uaku siad̄oho d̄i uji wa'u, nggara podasi siad̄oho wati wara ihana, ede ampona loa siad̄oho bantu d̄i ade ela Ruma.

¹¹Wei siad̄oho pab̄ua rauku dou ma taho, laina dou ma ca'u wa'a asa. Siad̄oho pab̄uaku b̄adena pi'i ade ro rombo ade samenana lampa rawi.

¹²Dou mabantu ela Ruma pab̄uaku ntauna sab̄uampa weina. Sia pab̄uaku b̄adena ato anad̄ohona ro atao kataho uma ra salajana.

¹³Dou-dou ma bantu kai taho d̄i ade ela Ruma, d̄i lia ra horoma ro nanaha disa nuntu ra nggahi mab̄oha imbi mapoda siad̄oho d̄i Al Masih.

¹⁴Ne'e b̄a nahu wati ntoi walina nahu d̄imamai lamba nggomi. Konena ndede, nahu ngge'empa tuntiku sura ake d̄i ru'u nggomi,

¹⁵loakud̄u nggara ngerisi nahu, nggomi wa'ura b̄ade b̄uneku ndaita pab̄ua mori kai iwa ra weki Ruma Hatalla, eded̄u ela Ruma Hatalla ma mori. Ela Ruma akeku ma ndad̄i ri'i makampende ro karongga ro mabantu ngoa ra tei ma ncihi rad̄i Ruma Hatalla.

¹⁶Wati wara kone sab̄ua dou maloana kawati, ndede pahu na'ena rahasia agama ndaita: Sia katadana weki kai pahu manusia, ro kancihi b̄a Roh Allah, ro eda b̄a mala'eka-mala'eka. Habana d̄i ngoa ra kahaba d̄i woha bangsa-bangsa, ro Sia d̄i imbi d̄i sara'a dunia ro d̄i hanta lao aka saroga.