Read Bima 1 TIMOTIUS 4 Bible Online

1 TIMOTIUS 4 - Bima bible

1 TIMOTIUS 4

¹Roh Allah kai kapoda-poda nggahina b̄a one wakatu-wakatu ma mai kento, sarunde dou d̄imamurta, wati mangakuna Al Masih. Siad̄oho nato'aku d̄i roh-roh ma kasantudana ro nab̄atuku ngoa ra tei b̄a roh Ibilis,

²rakaronggakai d̄i dou-dou maca'u coro-coro ma cowa. Ade mpida dou-dou ede wa'ura rindi.

³Siad̄oho nateiku dou b̄aib̄a danika ro b̄aib̄a dangahana ngaha ra nono rakatantu b̄a siad̄oho. Sapodakaina ngaha ra nono ede rakandad̄i b̄a Ruma Hatalla d̄i ngaha kai renta tarima kasi d̄i Sia b̄a dou-dou ma wa'ura imbi d̄i Al Masih ro mawa'ura pata ngoa ra tei ma ncihi rad̄i Ruma Hatalla.

⁴Samenana rakandad̄i b̄a Ruma Hatalla ede taho, ro wati wara kone sab̄ua rau d̄i wi'ikai haram nggara wa'usi tarima kai renta tarima kasi d̄i Ruma Hatalla.

⁵B̄ara bareka rad̄i Ruma Hatalla ro do'a mandawi ngaha ra nono ede ndad̄i halal.

⁶Nggara mateisi b̄a nggomi samenana ede d̄i cina ra angi masab̄ua imbi, nggomi d̄imandad̄i dou makarawi wea Ruma Isa Al Masih ma karawi kai taho. Ro nggomi d̄i mapupu ncauku ademu kai nggahi ra eli Ruma Hatalla ra'imbikai b̄a ndaita, ro kai ngoa ra tei-ngoa ra tei ma ncihi rawa'u b̄atu b̄a nggomi salama ake.

⁷Kad̄o'o lab̄opu wekimu carita-carita mawati poda ma wati wara onena. Pab̄uapu nggomi latimu wekimu ru'u mori ra woko ma sambea ra do'a.

⁸Lati sarumbu kasa sato'impa onena, pala lati ade mpida maraso wara onena ade samenana lampa rawi, b̄ara wara sake ru'u mori d̄i wakatu ake ro wakatu ma mai kento.

⁹Lampa rawi ede ncihi ro patu d̄i terima ro d̄i imbi podakai.

¹⁰B̄ara ndedena ndaita usaha kapoda ade ro karawi kapoda ade, b̄ara ndaita ne'e poda d̄i Ruma Hatalla ma mori; Siaku Makasalama samenana dou, mapenti poda dou-dou ma imbi.

¹¹Teipu sara'ana ede ro kaupu dou-dou b̄atu.

¹²Aina co'omu kone sab̄ua dou mawi'ikai nggomi awa b̄ara nggomi mbuipu to'imu. Pala, nggomi pab̄uapu ndad̄i conto d̄i ru'u b̄a dou-dou ma'imbi ade nuntu ra nggahimu lab̄o ruku ra rawimu, ade cara meci ra ca'umu d̄i sasama ro imbi d̄i Ruma Isa Al Masih, ro kai morimu ma raso.

¹³Wunga ede, sampe maikai nahu peade, nggomi pab̄uapu rundu ro kapodamu ade baca weamu Alkitab d̄i ru'u b̄a dou-dou ro ngoa ra tei katahopu siad̄oho.

¹⁴Nggomi aina nefa kani bareka rad̄i Roh Allah rambei d̄i nggomi aipu wakatu dou-dou mana'ekai ela Ruma tohona rima siad̄oho ese wawo tutamu, ro nabi-nabi karonggana nggahi ra eli Ruma Hatalla mab̄oha ndai nggomi.

¹⁵Karawipu sara'ana ede kai kapoda ade loakud̄u maju nggomi eda b̄a samenana dou.

¹⁶Jagapu wekimu ro jaga raupu rangoa ra teimu. Pab̄uapu nggomi to'a kai karawi sara'ana ede, b̄ara ade ndedekaina nggomi d̄imakasalama nataho weki ndaimu ro dou-dou ma ringana nggahi nggomi.