Read Bima 2 TIMOTIUS 2 Bible Online

2 TIMOTIUS 2 - Bima bible

2 TIMOTIUS 2

¹Timotius, anaku! Pab̄uapu nggomi ndad̄i tenggo b̄a rahama rambei d̄iru'u ndaita, b̄ara ndaita sab̄ua lab̄o Isa Al Masih.

²Ngoa ra tei ma ulu wa'ura ringamu rad̄i nahu d̄i tando dou mamboto, pab̄uapu nggomi imbikaipu d̄i dou-dou ma loa d̄i imbikai ro ma loa tei dou makalai.

³Nggomi pab̄uapu b̄atu susa ra ncoki kai tentara Ruma Isa Al Masih ma to'a.

⁴Sab̄ua dou tentara ma wunga kalampa taki ra puta, wati d̄imakangu'e-nga'e wekina kai urusa-urusa ndaina, b̄ara sia nane'e kasana wea ade mana'ekaina.

⁵Sab̄ua dou ma taki ola raga wati d̄imandad̄i juara d̄i ade tajikai, nggara sia watisi to'akaina atora-atora.

⁶Dou makanggihi ma wa'ura karawi kapoda ade, siaku ma saramba-rambakaina d̄imantau hak raka hasi nggud̄a ra conggena.

⁷Kananu kab̄aepu au ranggahi b̄a nahu ede, b̄ara Ruma d̄imambei nggomi tenggo d̄i loakaimu ka'ao samenana.

⁸Kawarapu ake: Haba Mataho rakarongga b̄a nahu ede eded̄u haba mab̄oha Ruma Isa Al Masih, londo ra mai la Daud; Siaku Al Masih ma wa'ura mori mbali rad̄i madena.

⁹B̄ara ngoa ra kahaba Haba Mataho edeku, nahu susa ra ncoki; mala sampe d̄i ndante b̄une dou madab̄ae. Pala nggahi ra eli Ruma Hatalla wati loa d̄i ndante.

¹⁰B̄ara ndedena lembokai ade nahu matanggu sara'ana ede b̄a d̄i pentikai dou-dou rawa'u kad̄ale b̄a Ruma Hatalla, loakud̄u siad̄oho rau rakana salama rambei kai ncai Ruma Isa Al Masih, ro kai d̄ese ra ntasa ma ederahid̄i.

¹¹Ncihi poda nggahi ra eli ake, ”Nggara ndai wa'usi made sama lab̄o Sia, ndai d̄imamori sama rau lab̄o Sia.

¹² Nggara ndaita ngge'empa lembo ade, ndai d̄imaparenta rau sama-sama lab̄o Sia. Nggara ndaita wati mangaku lab̄o Sia, Sia rau d̄imawati mangaku lab̄o ndaita.

¹³Nggara ndaita wati to'a, Sia ngge'empa to'ana, b̄ara Sia wati loana dancihi ncao lab̄o weki ndai-Na.”

¹⁴Pab̄uapu nggomi ngoa rakawaramu dou-dou mab̄oha samenana ake. D̄itando Ruma Hatalla, ngoa ra tei katahopu siad̄oho loakud̄u aina cence ncihi mab̄oha istila-istila. Ede wati wara onena, mala nakakacoku dou-dou ma ringana.

¹⁵Pab̄uapu nggomi usaha kapodamu ade loakud̄u kancihi b̄a Ruma Hatalla kai dou ma patu karawi ru'u-Na. Usahapu b̄aib̄a nggomi wati majamu mab̄oha karawimu, malaisi matei kai ncihi ngoa ra tei-ngoa ra tei mancihi rad̄i Ruma Hatalla.

¹⁶Kad̄o'o lab̄opu wekimu nuntu ra nggahi-nuntu ra nggahi ma wati wara onenana ro ma katuna ra kab̄awa Ruma Hatalla. Nuntu ra nggahi-nuntu ra nggahi b̄une ede cuma d̄imandawi dou-dou naha-naha dab̄ae.

¹⁷Ngoa ra tei dou-dou ede nandama b̄une supu tema ma heba. D̄i ade weki siad̄oho lu'u rau la Himeneus ro la Filetus.

¹⁸Siad̄oho nawa'ura losa rad̄i ade ngoa ra tei ma ncihi, ro nakakacoku imbikai sarunde dou. Nggahi siad̄oho b̄a one mori mbali rad̄i made wa'ura ndad̄i.

¹⁹ Pala dasa matenggo randawi b̄a Ruma Hatalla wati wa'u d̄i kad̄o. Ta ese wawona ratunti ake, ”Ruma napataku dou-dou ntau-Na,” ro ”Dou ma nggahi b̄a one sia ntau Ruma, dou ede pab̄uaku denggana karawi ma ncara”.

²⁰D̄i ade uma ma na'e wara mboto pahu tau ra tu'i. Wara randawi kai salaka atao masa, pala wara rau randawi kai haju atao dana. Wara ma d̄ikani ru'u paralukai mapenti poda, ro wara rau ma kani ru'u paralu ranginakai.

²¹Dou ma karaso wekina rad̄i samenana ma dab̄ae, dou ede d̄i kani paralukai ma penti poda. Sia ndad̄i ntau rakalai ro wara onena ru'u rumana. Sia d̄i sadia ru'u d̄i kanikai sanikina karawi ma taho.

²²Kad̄o'opu lab̄o wekimu d̄ihikai ade-d̄ihikai ade dou sampela. Usahapu mori b̄atu kane'e Ruma Hatalla, to'akai d̄i ngoa ra tei-Na ro meci ra ca'u d̄i sasamamu manusia, ro ma ntau sana ro taho ade. Moripu b̄une ede sama-sama lab̄o siad̄oho ma nggahi raho bantu d̄i Ruma kai ade ma raso.

²³Aina b̄atumu ade cence ncihi dou-dou ma sampula ma wati b̄ade au-au. Nggomi ma b̄adeku b̄a one samenana ede cuma d̄imakawontu cence ncihimpa.

²⁴Dou ma karawi ru'u Ruma wati patuna d̄imancao; sia pab̄uaku kambera d̄i samenana dou, ro maloa tei dou kai taho ro saba.

²⁵Sia pab̄uaku kai ntika nggahi ra eli tei dou-dou ma ca'u ao dou; raho-raho to'impa Ruma Hatalla mbeina ncai ru'u dou-dou ede d̄i tobakaina rad̄i dosa-dosa siad̄oho ro napata ngoa ra tei ma ncihi.

²⁶Ade ndedekaina siad̄oho ndad̄i kawara mbali wekina, ro nahori weki rad̄i kurukai b̄a Ibilis marawa'u taha siad̄oho ro ma pakasa siad̄oho b̄atu wea kane'ena.