Read Bima 2 TIMOTIUS 3 Bible Online

2 TIMOTIUS 3 - Bima bible

2 TIMOTIUS 3

¹Kawarapu ake: d̄i ainaina-ainaina cumpukaina d̄imawara mboto susa ra ncoki.

²Manusia d̄imakapenti weki ndai kesena, natabe'a na'e ade d̄i piti, sombo ro naca'u nuntu ra nggahi malao ncau. Siad̄oho naca'u katuna ra kab̄awa dou, kangango dou matuana, wati b̄adena renta tarima kasi, ro nadaca'u lampa rawi-lampa rawi ade ma raso.

³Siad̄oho wati meci ra ca'una d̄i sasamana, wati ngawana kangampu wea, siad̄oho naca'u nuntu ka'iha ngara dou makalai, naca'u kamab̄u dou makalai, siad̄oho natoku ro naparange, ro wati ca'una mataho.

⁴Siad̄oho naca'u kamab̄u dou makalai, na'angku ro wati kananu kad̄ondona. Siad̄oho nancewi ca'upu d̄i kad̄ihi ade dunia ntewi kaisi b̄atuna parenta Ruma Hatalla.

⁵Konena kai sacara tada, siad̄oho to'a kalampana rakaukai b̄a hukum agama, pala natulaku fu'u b̄a ndai agama ede. Kad̄o'opu lab̄o wekimu dou-dou b̄une ede.

⁶Wara d̄i ade weki siad̄oho ma wa'ura lu'u d̄i uma-uma, edempara loana weha ade dou-dou siwe ma daloa au-au ma ntau mboto poda dosa ro rakuasakai b̄a mboto pahu kane'e.

⁷Dou-dou siwe ede naraho ncau-ncau d̄i tei, pala wati parana loana pata ngoa ra tei ma ncihi rad̄i Ruma Hatalla.

⁸ B̄unesi la Yanes ro la Yambres aona la Musa ntoina, ndede rauku dou-dou ede aona ngoa ra tei rad̄i Ruma Hatalla. Fiki ra kananu siad̄oho wa'ura iha, ro imbi ma poda siad̄oho nawa'ura tumpu.

⁹Pala siad̄oho wati d̄imaraka au-au, b̄ara sampula siad̄oho d̄i b̄ade b̄a samenana dou, b̄une ra'iu b̄a la Yanes ro Yambres rau.

¹⁰Pala nggomi wa'ura b̄atumu ngoa ra tei-ngoa ra tei b̄a nahu, ruku ra rawi nahu, ro d̄i ne'e kai b̄a mori nahu. Nggomi wa'ura eda b̄a ndaimu b̄uneku nahu poda-poda imbiku d̄i Ruma Isa Al Masih ro meci ra ca'uku d̄i sasama manusia. Nggomi rau ma b̄adeku sabakai ro lembo ade nahu.

¹¹ Nggomi wa'ura edamu nahu rakancoki b̄a dou ro nahu susa ra ncoki. Nggomi mab̄ade sara'a ma ndad̄i d̄i nahu d̄i Antiokhia, d̄i Ikonium, ro d̄i Listra; ro nggomi mab̄ade sara'a susa ra'iu b̄a nahu! Pala Ruma makasalama nahu rad̄i samenana ede.

¹²Poda samenana dou ma ne'e mori do'a ra sambea ro mori sab̄ua lab̄o Ruma Isa Al Masih d̄i kancoki,

¹³dou-dou ma dab̄ae ro dou-dou makukukeko d̄imanaha-naha dab̄ae. Siad̄oho nakekoku dou ma kalai sapodakaina ndai siad̄oho rau b̄oha b̄a tipu rau.

¹⁴Pala mab̄oha nggomi, Timotius, pab̄uapu nggomi ngge'empa nentimu d̄i ngoa ra tei-ngoa ra tei ma ncihi rawa'u tei d̄i nggomi ro ra'imbi podakai b̄a nggomi; b̄ara nggomi ma b̄adeku cou guru-gurumu.

¹⁵Nggomi pab̄uapu kawaramu b̄a one ratampu'u aipu to'imu nggomi wa'ura patamu Alkitab. Alkitab ede naloa mbei nggomi d̄i loakai ka'ao d̄i rakakaimu salama kai ncai imbi d̄i Ruma Isa Al Masih.

¹⁶Sara'a ratunti ade Alkitab, rarongga b̄a Ruma Hatalla ro nawara onena ru'u teikai ma ncihi, d̄i rojokai ro d̄i kancihikai ma ncara, ro d̄i teikai manusia loakud̄u mori b̄atu kane'e Ruma Hatalla.

¹⁷Kai Alkitab ede dou makarawi wea ru'u Ruma Hatalla loa d̄i kancihi kai mpuruna ru'u samenana karawi ma taho.