Read Bima 2 TIMOTIUS 4 Bible Online

2 TIMOTIUS 4 - Bima bible

2 TIMOTIUS 4

¹Ruma Isa Al Masih d̄imamai wali d̄i dunia ake d̄imaparesa ncihi ra ncara dou-dou ma mori ro ma made; ro Sia d̄imamai d̄imaparenta kai Sangaji kaina. B̄ara ndedena raho poda-poda b̄a nahu d̄i nggomi d̄itando Ruma Hatalla ro Ruma Isa Al Masih:

²Pab̄uapu nggomi ngoa ra kahaba haba rad̄i Ruma Hatalla ede, ro kau poda-podapu loakud̄u dou kade'ena, sab̄ua siad̄oho nane'e atao wati. Pab̄uapu nggomi ka'imbi podamu dou, turu teimu ma ncara, ro kaupu kapoda ade d̄i siad̄oho. Teipu dou kai saba poda.

³B̄ara d̄imaraka wakatuna dou watid̄u ne'e walina tarima ngoa ra tei ma ncihi. Pala, siad̄oho nab̄atumpa ne'e ndaina, ro nakab̄oroku mboto guru ru'u d̄i teikai lampa rawi-lampa rawi ma caru d̄i ringa b̄a fiko siad̄oho.

⁴Siad̄oho d̄imapula fiko d̄i ngoa ra tei, pala natoroku fikona d̄i carita-carita mpama.

⁵Konena ndede, nggomi pab̄uapu kuasakaimu wekimu ade ka'ada'ana b̄une b̄e wali. Kalembo ade d̄ei susa ra ncoki, karawipu taki ra putamu kai dou mangoa ra kahaba Haba Mataho ede ro kalampapu kai taho poda d̄i pab̄ua karawi b̄a nggomi kai dou ma karawi wea ru'u Ruma Hatalla.

⁶Mab̄oha weki nahu, wa'ura raka wakatuna nahu d̄imamade kai koroba ru'u Ruma Hatalla. Samporo wali nahu d̄imatu'u wi'i dunia ake.

⁷Nahu wa'ura b̄atuku paralomba kai taho poda, ro wa'ura raka gari cumpukaina. Nahu ngge'empa to'aku d̄i Al Masih sampe cumpukaina.

⁸Ro ake hadia ngolukai mangena nahu. D̄i Ainaina Kiama, Ruma, dou ma paresa ncihi ra ncara ma adi ede d̄imad̄onggo mbei hadia ede d̄i nahu, b̄ara nahu mori tahoku lab̄o Ruma Hatalla. Ro laina nahu mpoa d̄imatarima hadia ede, pala sara'a dou rau ma ne'e poda ma ngena maina Ruma.

⁹Usahapu mai roci poda d̄i nahu,

¹⁰ b̄ara la Demas wa'ura tu'u wi'ina nahu b̄ara meci ra ca'una dunia ake. Sia wa'ura lao aka Tesalonika, la Kreskes wa'ura lao aka Galatia, ro la Titus lao aka Dalmatia.

¹¹ La Lukas mpoampa ma midi lab̄o nahu. Weha aopu la Markus ro wa'apu sia sama-sama lab̄o nggomi, b̄ara sia naloa bantu ade karawi nahu.

¹² Nahu wa'ura kauku la Tikhikus lao aka Efesus.

¹³ Nggara maisi nggomi, wa'apu b̄aju ura rawi'i b̄a nahu d̄i Troas aka uma la Karpus. Wa'a raupu buku-buku nahu, ma penti poda buku-buku randawi kai lub̄a huri.

¹⁴ La Aleksander, mataki nded̄e romba ede nawa'ura karawi lampa rawi-lampa rawi ma dab̄ae poda d̄i nahu. Ruma d̄imacepena d̄i sia b̄une rawina.

¹⁵Ndai nggomi pab̄uapu jaga-jaga d̄i sia, b̄ara sia nawancuku daca'u podana haba rangoa ra kahaba b̄a ndaita.

¹⁶Aipu wakatu saramba podana nahu rahoku horukai weki nahu, wati wara kone sab̄ua dou malab̄ona nahu; sara'a natu'u wi'iku nahu. Raho-raho to'impa Ruma Hatalla wati kancarana siad̄oho ade lampa rawi ake!

¹⁷Pala Ruma malab̄o nahu. Sia mbeina tenggo ra wale ndad̄i nahu sanggoku ngoa ra kahaba sara'a Haba Mataho ede, loakud̄u ringa b̄a sara'a dou laina Yahudi. Ro nahu hori weki d̄i bahaya made.

¹⁸Poda Ruma d̄imahori kalosa nahu rad̄i sanikina usaha ma dab̄ae d̄i ru'u nahu. Sia d̄imawa'a nahu kai salama d̄i ade Karaja'an-Na d̄i saroga. Pab̄uaku Sia d̄i kad̄ese ra kantasa santoi-ntoina! Amin.

¹⁹ Salam nahu d̄i ru'u b̄a la Priskila ro la Akwila ro d̄i iwa ra weki Onesiforus.

²⁰ La Erastus ngge'e d̄i Korintus, ro la Trofimus wa'ura tu'u wi'i b̄a nahu ade ka'ada'ana supu d̄i Miletus.

²¹Usaha poda-podapu mai kaimu sawatipu b̄a oru b̄usi. La Ebulus, la Pudes, la Linus, ro la Klaudia nggaduna salam d̄i nggomi; ndede rau samenana cinata masab̄ua imbi makalai rau.

²²Raho-raho to'impa Ruma dampina nggomi. Raho-raho to'impa Ruma mbeina bareka nggomid̄oho! Salam do'a nami, Paulus