Read Bima TITUS 2 Bible Online

TITUS 2 - Bima bible

TITUS 2

¹Pala nggomi, Titus, pab̄uapu nggomi ngoa ra teimu lampa rawi ma ncihi ncao.

²Ngoa ra tei katahopu dou-dou mone ma tua, loakud̄u siad̄oho wa'una pi'i ade, loa timba ra lemba ro mori kai dou ma patu d̄i lia ra horoma. Siad̄oho pab̄ua rauku nentina d̄i ngoa ra tei ma poda ma ramai ta Ruma Hatalla, meci lab̄o ca'u kai sampuruna ro susa ra ncoki kai lembo adena.

³Ndede walija pab̄uapu nggomi ngoa ra tei kataho dou-dou siwe ma tua loakud̄u ruku ra rawi siad̄oho ncihi ncao lab̄o au ma patu d̄iru'u b̄a dou ma mori d̄iru'u Ruma Hatalla mpoampa. Siad̄oho wati loana kafitina dou makalai, ro wati loana tagia weki kai nono ma d̄imawukai. Siad̄oho pab̄uaku ngoa ra teina lampa rawi ma taho,

⁴loakud̄u kai ede siad̄oho loana ngoa ra tei d̄iru'u b̄a dou-dou siwe mambuipu to'i umuna d̄i meci ra ca'ukaina rahi ro anad̄ohona,

⁵mandad̄i loa timba ra lemba, mori maraso, ro mandad̄i ina d̄i uma ra salajana ma taho ma oko d̄i rahina. Ade ndedekaina wati wara dou ma loana nuntu ka'iha haba ma ramai ta Ruma Hatalla.

⁶Ndede rauku, ngoa ra tei katahopu dou-dou mambuipu to'i umuna loakud̄u siad̄oho mandad̄i timba ra lemba.

⁷D̄i ade samenana lampa rawi, pab̄uapu nggomid̄oho ndad̄i conto mataho ruku ra rawi ma taho. Nggara nggomi mateisi dou, nggomi pab̄uapu nuntu ra nggahi mantiri ra marombo lab̄o kapodapu ademu.

⁸Kanipu nggahi ra eli ma timba ra lemba, ma wati loa d̄idaca'u b̄a dou, loakud̄u musu-musumu ndad̄i maja b̄ara wati wara lampa rawi ma'iha d̄i mod̄a nggahikai b̄a siad̄oho mab̄oha ndai.

⁹Ada-ada pab̄uaku oko d̄i rumana, ro kasana wea adena d̄i ade samenana lampa rawi. Siad̄oho wati loana dangawa au rakaukai b̄a rumana,

¹⁰atao mpangana. Pab̄uaku siad̄oho katadana b̄a one siad̄oho nantau tabe'a mataho ro to'a, loakud̄u kai tabe'a siad̄oho ede naroiku b̄a dou ngoa ra tei mab̄oha Ruma Hatalla, Mambei salama ndai.

¹¹B̄ara Ruma Hatalla wa'ura katadana anugera-Na d̄i kasalamana samenana ela manusia.

¹²Rahama Ruma Hatalla ede nangoa ra teiku ndaita loakud̄u wati walira mori mawati ncihi ncao lab̄o rakane'e b̄a Ruma Hatalla ro wati b̄atu rakane'e b̄a dunia. Ndaita rangoa ra tei d̄i morikai ade dunia ake kai b̄adeta pi'i ade, nira ade, ro to'a d̄i Ruma Hatalla.

¹³Ake ndaita wunga ngena Ainaina rapamao b̄a ndaita ede; d̄i Ainaina ede dunia d̄ima'eda d̄ese ra ntasa Ruma Isa Al Masih, eded̄u Ruma Hatalla Mawancu Na'e ro Sangaji Mambei salama ndaita.

¹⁴ Sia wa'ura korobana weki ndai-Na d̄i ru'u b̄a ndaita d̄i horikaina ndai rad̄i samenana ma'iha, ro kandad̄ina ndai sab̄ua ela ma wa'ura hori weki rad̄i dosa ro mawa'ura ndad̄i ntau Sia mpoa, ro ma caha karawi mataho.

¹⁵Teipu samenana ede, ro ngoa ra tei katahopu ro rojopu dou-dou maringa nggomid̄oho kai wibawa. Aina co'omu kone sab̄ua dou mawi'ikai nggomi awa.