Read Bima TITUS 3 Bible Online

TITUS 3 - Bima bible

TITUS 3

¹Ngoa ra kawarapu anggota ela-ela Rumamu loakud̄u siad̄oho okona d̄i dou-dou mana'ekaina ro dou makuasakaina negara, ro to'a ro ngawana karawi sanikina lampa rawi ma taho.

²Nggahipu d̄i siad̄oho loakud̄u aina kafitinamu dou makalai atao cence ncihi lab̄o cou-cou rau, malaisi kantika nuntu ra nggahi. Pab̄uaku siad̄oho mapu nggahi ra eli d̄i samenana dou.

³B̄ara ntoina ndaita sampula rau, santuda ro wati to'ata. Ndai ka'ada b̄a mboto pahu nawasu rad̄i ne'eta; ndaita mori kai nia ma'iha ro hiana ade, ro cua-cua daca'u angi.

⁴Pala Ruma Hatalla, Makasalama ndaita katadana meci ra ca'u ro taho ade-Na d̄i ndaita.

⁵Sia kasalamana ndaita, laina b̄ara ndai mawa'ura karawita au-au ma taho, malaisi b̄ara rahama-Na. Sia kasalamana ndaita kai ncai Roh Allah, ma mbeina ndai rawara kai ma b̄ou ro mori kai ncai karasona ndaita.

⁶Ruma Hatalla luana Roh-Na d̄i ndai kai ncai Ruma Isa Al Masih, Sangaji mambei salama ndaita,

⁷loakud̄u kai anugera Ruma Isa, ndaita d̄ikancihi lab̄o Ruma Hatalla ro ndaita maraka mori masapodakaina ro ma'ederahid̄i rakane'e b̄a ndaita.

⁸Nggahi ra eli ake nancihi podaku. Ne'e b̄a nahu d̄i nggomi tei kapoda-podapu lampa rawi ake, loakud̄u dou-dou ma imbi d̄i Ruma Hatalla poda-poda usahana d̄i karawikaina lampa rawi ma taho ro mawara one d̄iru'u b̄a sara'ana dou.

⁹Kad̄o'o lab̄opu wekimu cence ncihi ma wati wara onena, carita-carita londo ra mai, cence ncihi ro ncao ra tub̄a mab̄oha hukum Taurat. Samenana ede wati wara onena ro wati wara d̄i rakamu.

¹⁰Dou ma kandad̄ina mbi'a ra ncengga d̄i ade ela Ruma, pab̄uapu rojo b̄a nggomi sakali ro d̄ua kali; sawa'u b̄a ede ai walina rewo samamu lab̄o sia.

¹¹Nggomi mab̄adeku b̄a one dou b̄une ede na'ipiku dab̄aena ro dosa-dosana mabukutina b̄a one sia nancaraku.

¹² Sawa'u b̄a nggadu roci b̄a nahu la Artemas atao Tikhikus d̄i nggomi, usaha karoci podapu d̄imai rakakaimu nahu d̄i Nikopolis, b̄ara nahu mane'e ngge'e ta aka santoi oru b̄usi ai.

¹³ Usaha kapodapu d̄i bantukaimu la Zena, maloa hukum ede, ro la Apolos, loakud̄u siad̄oho loa lao ro wati wara makura au-auna.

¹⁴Dou-dou ndai pab̄uaku tana'ona karawi lampa rawi ma taho loakud̄u kancihina au-au ma ipi d̄i paralukaina; ai to'ina siad̄oho mori mawati wara onena.

¹⁵Sara'ana cina ra angi ma wara sama lab̄o nahu, manggadu salam d̄i nggomi. Karongga to'ipu salam nami d̄i lenga ra iwa ndai ma sama-sama imbita. Raho-raho to'impa Ruma mambei bareka d̄i nggomid̄oho sara'ana. Salam do'a nami, Paulus