Read Bima IBRANI 1 Bible Online

IBRANI 1 - Bima bible

IBRANI 1

¹Aipu jamana ma'ulu ntuwu poda Ruma Hatalla manuntu ra nggahi d̄i wa'i ra waro ndaita d̄i nabi-nabi kai kanina mboto pahu carana.

²Pala d̄i jamana cumpukaina ake Sia nuntu ra nggahina d̄i ndaita kai ncai Ana-Na. Kai ncai Ana-Na akera Ruma Hatalla kandad̄ina dunia lab̄o isina. Ro Ruma Hatalla wa'ura katantuna b̄a one Ana-Na ake rau ma ntau hak kantau samenana.

³Siara ma kalosa taroa d̄ese ra ntasa Ruma Hatalla ma taroa poda; Siara gamba ma tada rad̄i weki ndai Ruma Hatalla. Sia rau ma jaga ra sandaka taho ntumana dunia lab̄o isina ake kai nggahi-Na ma wancu ntau kuasa. Sawa'u b̄a Sia kaloana manusia d̄ihori kalosa rad̄i dosa-dosa siad̄oho, Sia mantau parenta d̄i saroga sama-sama lab̄o Ruma Hatalla, Makuasa ma ese poda.

⁴Ana ede maraka hid̄i ma d̄o'o ncewi d̄ese ntewi kaisi mala'eka, ro ngara rambei b̄a Ruma Hatalla d̄iru'u Sia nad̄o'o ncewi horoma ntewi kaisi ngara rambei d̄iru'u mala'eka.

⁵ Wati paranana Ruma Hatalla manggahi b̄une ake kone d̄i sab̄ua mala'eka rau, ”Nggomira Ana-Ku; d̄i ainaina ake Nahu mandad̄i Ama-Mu.” Wati parana rauna Ruma Hatalla manggahi b̄une ake mab̄oha mala'eka ma b̄e-b̄e wali rau, ”Nahu d̄imandad̄i Ama-Na, ro sia d̄imandad̄i Ana-Ku.”

⁶ Pala d̄i wakatu Ruma Hatalla nggaduna Ana-Na ma sasa'e mai d̄i dunia ake, Ruma Hatalla manggahi ndake, ”Samenana mala'eka Ruma Hatalla pab̄uaku nembana Ana ede.”

⁷ Mab̄oha mala'eka-mala'eka, Ruma Hatalla manggahi ndake, ”Ruma Hatalla mandawi mala'eka-mala'eka-Na ndad̄i angi, ro dou-dou makarawi wea-Na ndad̄i kalea afi.”

⁸ Pala d̄i Ana ede, Ruma Hatalla manggahi, ”Hid̄i dohokai-Mu, io Ruma Hatalla, d̄ima'ederahid̄i santoi-ntoina! Tiki Karaja'an Ita eded̄u tiki mataho ra ncihi.

⁹Nggomi maca'u d̄ima'adi, ro wati ca'umu d̄imadancihi ncao; b̄ara ndedena Ruma Hatalla, Ruma Hatalla-Mu, makad̄alena Nggomi ro mambei d̄iru'u-Mu hid̄i mataho ma kamaikaina neo ade, mancewi ntewi kaisi d̄i lengad̄oho-Mu.”

¹⁰ Ruma Hatalla manggahi rau, ”Nggomi, Ruma, ai sarambakaina kandad̄i-Mu dunia, ro ndai Nggomi ndawimu langi.

¹¹Samenana ede d̄imambora, ro d̄imandad̄i mpasa b̄une kani ra lombo; pala Nggomi wati dimarungka weki.

¹²Dunia lab̄o isina ake d̄ilipi b̄a Nggomi b̄une b̄aju, ro d̄i cepe b̄a Nggomi kai ma kalaina. Pala Nggomi wati parana d̄imarungka weki, ro mori-Mu wati d̄imacumpu.”

¹³ Ruma Hatalla wati paranana nggahi ndake kone d̄i sab̄ua mala'eka rau, ”Dohopu d̄i sab̄ae wana-Ku, sampe musu-musu-Mu d̄ika'oko b̄a Nahu d̄iru'u-Mu.”

¹⁴Nggara ndedesi, mala'eka-mala'eka ede auku sapodakaina? Siad̄oho eded̄u roh-roh ma karawi ru'u Ruma Hatalla, ro rakakai b̄a Ruma Hatalla d̄imabantu dou-dou d̄imatarima salamakaina.