Read Bima IBRANI 10 Bible Online

IBRANI 10 - Bima bible

IBRANI 10

¹Hukum Taurat mbeina gambara ma wati taroa mab̄oha lampa rawi-lampa rawi mataho ma d̄imamai, ro laina gambara ma sapodakaina rad̄i lampa rawi-lampa rawi ede. Wati lu'ukai b̄a aka hukum ede maloa kasampuruna dou ma mai nemba Ruma Hatalla kai wa'ana d̄onggo ra mbei, konena saniki mba'ana d̄onggo ra mbei koroba-koroba ncau-ncau ma sama.

²Paina dou-dou ma nemba Ruma Hatalla ede poda-poda wa'ura karaso rad̄i dosa, siad̄oho watid̄u iu ade madosa, ro koroba wati d̄i d̄onggo ra mbei wali.

³Pala ndad̄ina koroba-koroba rad̄onggo ra mbei sanikina mba'ana ede taho makawarana dou d̄i dosa-dosa siad̄oho,

⁴b̄ara poda romo ra'a capi ro ra'a mbe'e rangga wati loana fura karaso dosa.

⁵ B̄ara ndedena aipu wakatu Al Masih lu'una d̄ei dunia, Sia nggahina d̄i Ruma Hatalla, ”Ita wati ca'umu koroba ro d̄onggo ra mbei; pala Ita wa'ura sadia weamu sarumbu d̄iru'u b̄a Mada.

⁶Ita wati ca'umu d̄i koroba raka'a atao koroba d̄i kangampukai dosa.

⁷Edempara Mada nggahiku, ’Akera Mada, io Ruma Hatalla! Mada maiku d̄imakarawi rakane'e-Mu, b̄une ratunti mab̄oha weki Mada d̄i ade Alkitab.’ ”

⁸Saramba-rambana nggahi Al Masih, ”Ita wati ca'umu koroba ro d̄onggo ra mbei; Ita wati ca'umu d̄i koroba binata raka'akai d̄onggo ra mbei ro d̄i koroba ru'u kangampukai dosa.” Nggahi ndedekai Al Masih, konena sara'a koroba ede rad̄onggo ra mbei b̄atu hukum Taurat.

⁹Sawa'u b̄a ede nggahi Al Masih, ”Akera Mada, io Ruma Hatalla! Mada maiku d̄imakarawi kane'e-Mu.” Ndad̄i Ruma Hatalla fura karasona samenana koroba ma ntoi ede, ro cepekaina koroba Al Masih.

¹⁰Ruma Isa Al Masih wa'ura karawina au rakane'ekai b̄a Ruma Hatalla ro d̄onggo ra mbeina sarumbu-Na kai koroba. Kai d̄onggo ra mbei ede, rakarawi-Na, cuma sakalimpa ru'u santoi-ntoina, ndaita sara'a d̄ikaraso rad̄i dosa.

¹¹ Sanikina imam Yahudi kalampana taki ra putana kai imam sanikina ainaina, ro ntuwu podara sia d̄onggo ra mbeina koroba-koroba ma sama. Pala koroba-koroba ede wati loana fura karaso wea dosa.

¹² Pala, Al Masih cuma sakalimpa d̄onggo ra mbeina koroba ru'u kangampukai dosa, ro koroba ede d̄ikani santoi-ntoina. Sawa'u b̄a d̄onggo ra mbeina koroba ede, Al Masih doho tasab̄ae wana Ruma Hatalla ro parenta sama-sama lab̄o Sia.

¹³Ro ake Al Masih nangenaku sampe Ruma Hatalla ndawina musu-musu-Na oko d̄i Sia.

¹⁴Ndad̄ikai sab̄ua koroba, Al Masih kasampurunana dou-dou ma wa'ura karaso rad̄i dosa.

¹⁵Mab̄oha lampa rawi ede Roh Allah mambei rau nggahi ra eli-Na ru'u ndaita. Roh Allah manggahi,

¹⁶ ” ’Akera rasake d̄i ndawi b̄a Nahu lab̄o siad̄oho d̄i ainaina-ainaina ma kento,’ nggahi Ruma, ’Nahu d̄imatau hukum-hukum Nahu d̄ei ade siad̄oho ro matuntina d̄i ade fiki ra kananu siad̄oho.’ ”

¹⁷ Ruma Hatalla manggahi rau, ”Nahu d̄imanefana dosa-dosa ro iha ra dab̄ae siad̄oho.”

¹⁸Ndad̄i, dosa-dosa ro ruku ra rawi madab̄ae ede wa'ura kangampu wea, ndad̄i wati paralu walina d̄i d̄onggo ra mbei koroba ru'u kangampukai dosa.

¹⁹Cina ra angi, b̄a madena Ruma Isa ede ndaita ake disara lu'u d̄ei B̄ili Mawancu raso.

²⁰Ruma Isa nawa'ura hengga sab̄ua ncai ma b̄ou ru'u ndaita, eded̄u ncai ma mbei mori ra woko. Ncai ede kai ncai satampa, eded̄u sarumbu ndai Ruma Isa.

²¹Ro ndaita ake tantau sab̄ua imam ma d̄ese ra ntasa, ma ntau su'u ra tundu d̄i Bait Allah.

²² B̄ara ndedena, maira ndaita kad̄eni weki d̄i Ruma Hatalla kai ade ma nira ro imbi poda ma tenggo; kai ade rawa'u karaso rad̄i iu weki ncara, ro kai sarumbu rawa'u karaso kai oi ma asali raso.

²³Pab̄uaku ndaita nenti kacia d̄i kane'e ramangaku b̄a ndaita, b̄ara Ruma Hatalla loa d̄iimbikai ro Sia d̄imambei rasake-Na.

²⁴Ro pab̄uaku ndaita tio kab̄ae kali cempe angi, loakud̄u ndaita loa rundu kali cempe angi ru'u meci ra ca'ukai sama-sama imbi ro makarawi lampa rawi-lampa rawi ma taho.

²⁵Pab̄uaku ndaita nge'empa kab̄oro weki sama-sama, ro aina d̄aju ro nefa b̄une dou makalai. Ndad̄i ndai pab̄uaku ncewi to'a katenggo kali cempe angi, b̄ara ndaita b̄ade b̄a one wati ntoi walina Ruma d̄imamai.

²⁶B̄ara nggara haba ma ncihi rad̄i Ruma Hatalla wa'ura karonggana d̄i ndaita, pala ndaita karawi ncaumpa dosa kai sangaja, ndad̄i watid̄u wara walina koroba ru'u fura karasokai dosa ndaita.

²⁷ Sab̄uampa ma wara ru'u ndaita eded̄u ncao tando lab̄o pangadila Ruma Hatalla ro afi mbani-Na d̄imaka'a kampoi dou-dou ma ao Sia!

²⁸ Dou ma wati to'akai hukum rambei b̄a la Musa, d̄ihukum hade kai wati wara kangampuna, nggara kai rasakasi b̄a d̄ua tolu dou, sia natada ncarana.

²⁹ Nawancuku ncewi tanina hukuma d̄i pab̄ua b̄ab̄ukai d̄i dou ma tonda-tonda Ana Ruma Hatalla. Dou ede nawi'ikaiku tuna ra b̄awa ra'a sakekai Ruma Hatalla, eded̄u madekai Al Masih ma karasona rad̄i dosa. Sia katuna ra kab̄awana Roh mambei rahama.

³⁰ Ndai tab̄adeku couku Sia manggahi, ”Nahu d̄imacolana! Nahu d̄imahukum!” ro ma nggahi, ”Ruma d̄imaparesa ncihi ra ncara ela-Na.”

³¹Nawancuku samangina nggara namab̄usi d̄ei rima Ruma Hatalla Ma Mori!

³²Kawarapu b̄uneku ka'ada, ana cina ra angi aipu wakatu ma ulu. Aipu wakatu ede, sawa'u b̄a kalea Ruma Hatalla makataroamu, nggomid̄oho mboto susa ra ncokimu, pala nggomid̄oho ngge'empa kapodamu ade.

³³Wara rau nggomid̄oho d̄ikatuna ra kab̄awa ro d̄ikarawikai wati taho d̄itando dou mamboto. Wara rau nggomid̄oho b̄atu susa ra ncoki lab̄o siad̄oho rakarawi kai b̄une ede,

³⁴ro nggomid̄oho b̄atu iu ncoki ade dou rabui. Ro wakatu samenana ntau nggomid̄oho rarampa, nggomid̄oho matarima ede kai sana ade, b̄ara nggomid̄oho mab̄ade b̄ara nggomid̄oho mbuipu wara ntaumu ma ncewi taho, d̄imataha santoi-ntoina.

³⁵B̄ara ndedena, aina kompo kananu, b̄ara nggara nggomid̄oho ngge'empa imbimu, ndad̄i wara ufa ma na'e d̄iru'u b̄a ede!

³⁶Nggomid̄oho paralu sabamu, loakud̄u nggomid̄oho loamu karawi rakane'e Ruma Hatalla ro ade ndedekaina matarimaku au rasake-Na.

³⁷ B̄ara ade Alkitab ratunti, ”Cuma samporo to'i walimpa, ndad̄i Sia ma d̄imamai ede, d̄imamai roci; Sia wati d̄imakanajo-najo maikai-Na.

³⁸Ro ela-Ku ma ncihi d̄ima'imbi ro mori; pala nggara warasi d̄i ade woha siad̄oho ma suru, ndad̄i Nahu wati d̄imasana d̄i siad̄oho.”

³⁹Ndai ake laina ela ma suru ro santuda. Pala, ndaita eded̄u ela ma imbi d̄i Ruma Hatalla ro rakasalama.