Read Bima IBRANI 12 Bible Online

IBRANI 12 - Bima bible

IBRANI 12

¹Mab̄oha weki ndaita, d̄i kompe ra pei ndaita, wara mboto poda sakasi! B̄ara ndedena, maira ndaita paki samenana ma katani ndaita ro dosa ma pandako ncau d̄i ndaita. Ro maira ndaita kai kapoda ade taparalombaku ma wara d̄itando ndaita.

²Pab̄uaku tio ra ntanda ndaita cuma d̄i Ruma Isa mpoampa, b̄ara Siara ma kamori mbali imbi ndaita ro majaga ra sandakana ma'aipu saramba wa'una sampe cumpukaina. Ruma Isa nawa'uku taha susa ra ncoki d̄i haju salib! Sia wati paresana b̄a one made d̄i haju salib ede eded̄u sab̄ua lampa rawi d̄i majakai. Sia cuma kawarana d̄ihikai ade d̄i iu-Na sawa'u b̄a ede. Ake Sia doho d̄i sab̄ae wana kadera sangaji Ruma Hatalla ro maparenta sama-sama lab̄o Sia.

³Coba kananupu b̄uneku ncokina Ruma Isa ncao tando angina lab̄o dou-dou madosa ma ao-Na kai ndede kapilina ade! B̄ara ndedena aina kato'i ade ro kompo kananu.

⁴B̄ara ade kapodakaimu ade aomu dosa, nggomid̄oho watipu iumu lewa ra laka sampe pab̄ua mboho kai ra'a.

⁵ Ro aina nefamu d̄i ngoa ra tei kataho b̄a Ruma Hatalla ake, rambei d̄iru'umu kai ncai ana-ana-Na: ”Ana-Ku, tio kab̄ae poda-podapu ngoa ra tei b̄a Ruma, ro aina kato'imu ade nggara Sia nggahikaina nggomi.

⁶B̄ara Ruma nab̄oeku sanikina dou rameci ra ca'u-Na, ro Sia nacamboku sanikina dou ramangaku-Na kai ana-Na.”

⁷Pab̄uapu nggomid̄oho tarimamu racambo b̄a Ruma Hatalla kai sab̄ua b̄oe rad̄i sab̄ua ama. B̄ara sab̄ua wara anana darahukum b̄a amana?

⁸Nggara nggomid̄oho wati b̄atu d̄i hukum b̄une samenana anana ma kalai ake ede aona nggomid̄oho laina ana masaha, malaisi ana ma wati saha.

⁹Ndaita ntau ama d̄i dunia. Sia teina ndaita, ro ndaita lia ra horomaku sia. Au walipu d̄i Ama rohani ndai d̄i saroga, tantu ndaita pab̄uaku ncewi oko wali d̄i Sia loakud̄u ndaita mori.

¹⁰Dou matua ndaita ma d̄i dunia teina ndaita cuma ade wakatu ma wara hampana, b̄atu au rad̄i'iu b̄a siad̄oho taho. Pala Ruma Hatalla teina ndaita ru'u tahokai weki ndaita, loakud̄u ndaita ndad̄i raso sama-sama lab̄o Sia.

¹¹Poda aipu wakatu teina ndaita, hukuma ede wati kasanana ade ndaita, malaisi d̄i makancoki wea adempa. Pala sawa'u b̄a ede, ru'u ndaita rawa'u tei, hukuma ede kandad̄ina ndaita mori b̄atu kane'e Ruma Hatalla, ro nambeiku iu ade mataho ra ntai d̄i ndaita.

¹² B̄ara ndedena, katenggopu rimamu ma rome ro tatu'umu ma wedu ede!

¹³ Lampa ncaupu d̄i ncai ma piri, loakud̄u ed̄imu ma mpako ra mpedu ede wati sanggicuna, pala nandad̄i taho.

¹⁴Usahapu mori taho lab̄o samenana dou. Usaha raupu ru'u mori raso, d̄iru'u Ruma mpoampa. B̄ara wati kone sab̄ua dou rau maloa eda Ruma nggara sia watisi morina b̄une ede.

¹⁵ Jagapu aina sampe warakaina kone sab̄ua dou ma losa ari mai b̄a tahokai ade Ruma Hatalla, loakud̄u aina wara ma ndad̄i b̄une sa'au-au mawoko mantau racu d̄i ade weki nggomid̄oho, ndad̄ina kawontuku susakai ro naka'ihaku mboto dou kai racuna.

¹⁶ Jagapu loakud̄u aina warakaina ma mori sampu ra nggele atao wati kaco'ina lampa rawi-lampa rawi rohani, b̄une rakarawi b̄a la Esau. Sia landana hakna kai ana sasa'ekaina, cuma ru'u samangko ngaha ra nonompa.

¹⁷ Nggomid̄oho mab̄adeku b̄a one sawa'u b̄a ede la Esau nane'eku raka bareka ede rad̄i amana, pala sia ratula. B̄ara kone kai nangi rauna sia ngupana ncai ru'u katahokaina ncarana, ncai ru'u ede watid̄u wara walina.

¹⁸ Cina ra angi wati mai satandomu au-au b̄une rasatando b̄a bangsa Israel ntoina. Siad̄oho ncao tando lab̄ona au-au ma loa d̄i d̄ama, eded̄u Doro Sinai lab̄o afina ma kalea-lea; siad̄oho ncao tando lab̄ona marindi, susa ra ncoki ro fode;

¹⁹siad̄oho ncao tando lab̄ona eli tarompe, ro eli-eli ma heba. Wakatu dou-dou Israel ringana eli ede, siad̄oho naraho poda-podana loakud̄u eli ede watid̄u nuntu ra nggahi walina d̄i siad̄oho.

²⁰ B̄ara siad̄oho wati wa'una taha ringa parenta rakarongga b̄a eli ede. B̄ara eli ede manggahi, ”Samenana ma tudu doro ake, wati kab̄ae sab̄ua ede binata atao cou-cou wali, pab̄ua d̄i tob̄a kai wadu sampe madena.”

²¹ Aura eda b̄a dou-dou Israel ede wancuku hebana sampe nggahi la Musa, ”Nahu kadahu ro b̄ib̄i!”

²²Ndede wali, nggomid̄oho wa'ura maimu d̄i Doro To'i Sion ro kota Ruma Hatalla ma mori, eded̄u Yerusalem ma d̄i saroga lab̄o mariwu-riwu mala'ekana.

²³Nggomid̄oho mab̄atuku sab̄ua mbolo ma ndiha — mbolo weki ana-ana sasa'e Ruma Hatalla, ma ngara-ngarana mawara d̄i ade saroga. Nggomid̄oho mai ncao tando angi lab̄o Ruma Hatalla Ma paresa ncihi ra ncara samenana manusia. Nggomid̄oho masatando angi lab̄o roh-roh dou-dou mataho, rawa'u kandad̄i kai sampuruna.

²⁴ Nggomid̄oho mai satandomu Ruma Isa, Ncai ru'u rasakekai ma b̄ou ede; nggomid̄oho mancao tando lab̄o ra'a rawete kai ma nentina lampa rawi-lampa rawi ma d̄o'o ncewi taho ntewi kaisi ranenti b̄a ra'a la Habel.

²⁵ B̄ara ndedena, aina kabare aina sampe nggomid̄oho wati ne'emu ringa ra kade'e Sia ma nuntu ra nggahi ede. Siad̄oho ma wati ne'e ringa ra kade'e Sia ma mai d̄i dunia ro makarongga haba rad̄i Ruma Hatalla, wati loana rai peso weki. Au walipu ndaita ake ma ringa ra kade'e Sia ma nuntu rad̄i saroga! Nggara ndaita wati ne'eta ringa ra kade'e Sia, b̄uneku loana ndai salama!

²⁶ Aipu wakatu ede eli-Na makangango dunia. Pala ake Sia masake, ”Sakali wali, Nahu d̄imakangangona laina dana mpoa pala langi rau.”

²⁷Nggahi ra eli ”sakali wali” naturu teiku b̄a one sara'a dunia rawa'u kandad̄i d̄i kinda ro d̄i paki, loakud̄u ma ngge'e cuma ma wati loa kangginda.

²⁸B̄ara ndedena, pab̄uaku ndaita marenta tarima kasi d̄i Ruma Hatalla, b̄ara ndaita tarimata rad̄i Sia sab̄ua Karaja'an ma wati loa kangginda. Pab̄uaku ndai renta tarima kasi lab̄o do'a ra sambea d̄i Ruma Hatalla kai horoma ro dahu, b̄atu cara rakane'ekai b̄a ndai Sia.

²⁹ B̄ara Ruma Hatalla ndaita b̄une afi ma kampangina.