Read Bima IBRANI 13 Bible Online

IBRANI 13 - Bima bible

IBRANI 13

¹Pab̄uapu nggomid̄oho ngge'empa meci ra ca'umu sab̄ua lab̄o sab̄ua dou kai dou-dou ela Al Masih ma sa'e ra ari.

² Aina hau ademu tarima ao d̄i umamu dou-dou ma watipu pata b̄a nggomid̄oho. B̄ara kai karawi ndedemu, parana dou, kai wati b̄ae adena, wa'ura tarima aona mala'eka d̄i umana.

³Kawarapu dou-dou ma ade uma bui, b̄une-b̄uneta nggomid̄oho wara d̄i ade uma bui sama-sama lab̄o siad̄oho. Ro dou-dou rakarawikai sab̄era ne'e, pab̄uapu nggomid̄oho kawaramu d̄i siad̄oho b̄une-b̄uneta nggomid̄oho rau rakarawi b̄une ede.

⁴Samenana dou pab̄uaku tei katadana ruku ra rawi mahoroma d̄i nika, b̄ara ndedena rahi ra wei to'a sab̄ua d̄i sab̄ua dou. Dou masampu ra nggele ro dou majina d̄imahukum b̄a Ruma Hatalla.

⁵ Ai to'ina morimu d̄i kuasakai b̄a na'e ade d̄i piti, pala nggomid̄oho pab̄uapu ncihi ade kai au ramawara d̄i nggomid̄oho. B̄ara Ruma Hatalla wa'ura nggahina, ”Nahu wati d̄imaco'o atao d̄imatu'u wi'i nggomi.”

⁶ B̄ara ndedena ndaita disa nggahi, ”Ruma eded̄u Mabantuku, nahu wati dahuku. Au d̄i loa karawi b̄a manusia d̄i nahu?”

⁷Aina nefamu d̄i dou mana'ekaimu marakaronggana ranggahi Ruma Hatalla d̄i nggomid̄oho. Tio kab̄aepu b̄uneku siad̄oho morina ro b̄uneku siad̄oho madena, ro contokaipu imbi siad̄oho.

⁸Ruma Isa Al Masih ngge'empa samana, nataho ntoina, ake, ro sampe santoi-ntoina.

⁹Aina kade'emu samenana pahu ngoa ra tei malai-lai pahu makasantuda nggomid̄oho. Ade ndaita pab̄ua d̄i katenggo b̄a tahokai ade Ruma Hatalla, edeku ma taho; aina b̄a atora-atora mab̄oha ngaha ra nono. Dou-dou ma ntoina mato'akai atora-atora ede wati rakana onena.

¹⁰Ndaita ntau sab̄ua mezeba ru'u d̄onggo ra mbei kai koroba d̄i Ruma Hatalla. Ro imam-imam ma karawi wea d̄i ade Kema Ruma, wati ntauna hak ngaha koroba ma wara ese wawo mezeba ede.

¹¹ Ra'a binata rad̄onggo ra mbei kai koroba ru'u kangampukai dosa, d̄i wa'a b̄a mana'ekai imam-imam d̄ei B̄ili Mawancu raso, pala timba binata ede d̄i ka'a ari mai b̄a kema.

¹²B̄ara ndede rauna Ruma Isa madena ari mai b̄a tad̄a ncai na'e kota d̄iru'u karasokai ela-Na rad̄i dosa kai ra'a ndai-Na.

¹³B̄ara ndedena, maira ndai talao d̄i Sia ari mai b̄a hid̄i kema ro b̄atu katuna ra kab̄awa sama-sama lab̄o Sia.

¹⁴B̄ara d̄i dunia wati wara hid̄i ngge'ekai ma ederahid̄i d̄i ru'u b̄a ndaita; ndaita ngupa hid̄i ngge'ekai d̄imamai kento.

¹⁵B̄ara ndedena, kai ncai Ruma Isa, pab̄uaku ndai roi ra wadi ncau-ncau Ruma Hatalla; ede tandana koroba syuku ndaita ru'u-Na, rad̄onggo ra mbei b̄a ndaita kai renta b̄a wi'i ru'u kad̄ese ra kantasakai ngara-Na.

¹⁶Aina nefa karawi mataho ro cua bantu angi, b̄ara akera koroba-koroba ma kasana wea ade Ruma Hatalla.

¹⁷B̄atupu parenta dou-dou mana'ekaimu, ro okopu d̄i siad̄oho. B̄ara siad̄oho natio kab̄ae ncauku sarumbu ra nawamu, ro siad̄oho pab̄uaku su'u ra tunduna d̄i Ruma Hatalla. Nggara nggomid̄oho to'akaimu d̄i siad̄oho, siad̄oho naloa karawi kai sana ade; nggara watisi, ndad̄i siad̄oho d̄imakarawi kai ncoki ade, ro ede wati kalabana nggomid̄oho.

¹⁸Do'a ncau-ncaupu ru'u nami. Nami ma'imbi poda ade mpida nami raso, b̄ara ade samenana lampa rawi nami ne'e ncau karawi au ma ncihi.

¹⁹Nahu maraho poda-poda, loakud̄u nggomid̄oho do'a weamu nahu loakud̄u Ruma Hatalla wa'a rocina nahu loa mbali d̄i nggomid̄oho.

²⁰Ruma Hatalla wa'ura kamori mbalina Ruma ndaita Isa rad̄i madekaina. B̄ara madekai-Na ede Sia ake ndad̄i Ompu jimba ma d̄ese ra ntasa ru'u ndaita, eded̄u jimba-jimba-Na. Madekai-Na ede rau makasahana rasake ma ederahid̄i randawi b̄a Ruma Hatalla lab̄o ndaita.

²¹Raho-raho to'impa Ruma Hatalla fu'u b̄a taho ra ntai ede kab̄inina nggomid̄oho kai samenana ma taho raparalu b̄a nggomid̄oho ru'u karawikaimu kane'e-Na. Raho-raho to'impa kai ncai Ruma Isa Al Masih, Ruma Hatalla karawina d̄ei ndaita, au rad̄i kane'e-Na. Pab̄uapu Al Masih d̄i roi ra wadi santoi-ntoina! Amin.

²²Raho b̄a nahu loakud̄u nggomid̄oho tio kab̄aemu ngoa ra tei-ngoa ra tei kataho b̄a nahu ake kai saba, b̄ara sura nahu ake wati ipi d̄ondona.

²³Pab̄uapu b̄ade b̄a nggomid̄oho b̄a one cina ndaita la Timotius wa'ura hori kalosa rad̄i uma bui. Nggara sia wa'ura maina d̄i hid̄i nahu ake, nahu d̄imawa'ana wakatu mai lamba b̄a nahu nggomid̄oho peade.

²⁴Karonggapu salam nami d̄i samenana dou mana'ekaimu ro d̄i samenana ela Ruma Hatalla. Tarima raupu salam rad̄i cina ra angita d̄i Italia.

²⁵Raho-raho to'impa Ruma mbeina bareka nggomid̄oho sara'ana.