Read Bima IBRANI 2 Bible Online

IBRANI 2 - Bima bible

IBRANI 2

¹B̄ara ndedena ndaita pab̄uaku ncewi kapoda ade nenti d̄i ngoa ra tei-ngoa ra tei rawa'u ringa b̄a ndaita, loakud̄u ndaita aina wi'i paki d̄i imbi podakai ndaita.

²Nggahi-nggahi rakarongga b̄a mala'eka-mala'eka d̄i wa'i ra waro ndaita palasi ncihi, ro dou ma wati b̄atu atao mawati to'akai natarima hukuma ma ncihi ncao.

³Au walipu kai salamakai ma ncewi heba d̄i ade rangoa wi'i ede! Nggara watisi tio rantanda b̄a ndaita d̄i salamakai ede, tantu ndai wati d̄imahori weki rad̄i hukuma. B̄ara ndai Ruma Hatallara masaramba-rambana ngoa ra kahaba salamakai ede, ro dou masaramba-ramba maringana nawa'ura bukutina ncihina d̄i ndaita.

⁴Ari mai b̄a ede, Ruma Hatalla b̄atu katenggo ranggahi b̄a dou-dou ede kai kawarana samenana pahu b̄isa ra guna ro lampa rawi-lampa rawi maheba poda ro bage-bage rambei-mbei rad̄i Roh Allah b̄atu kane'e ndai-Na.

⁵Mala'eka-mala'eka wati rakana kuasa rad̄i Ruma Hatalla d̄imaparenta dunia b̄ou d̄imamai kento, eded̄u dunia ma wunga nuntu b̄a ndai ake.

⁶ Pala ndake, wara d̄i sarundena d̄i ade Alkitab ratunti ndake, ”Manusia ede ausi, io Ruma Hatalla, ndad̄ina ne'e kawarakai b̄a Ita? Manusia cuma manusiampa, pala Ita matio ra masandakaku!

⁷Ru'u wakatu masamporo Ita kandad̄imu sia sato'i ncewi awa ntewi kaisi mala'eka. Ita mbeimu d̄i sia hid̄i ma d̄ese ra ntasa ro mancewi taho,

⁸ro kandad̄ita sia makuasakai d̄i samenana.” Nggara nggahisi b̄a one Ruma Hatalla makandad̄i manusia ”makuasakai d̄i samenana”, ede aona b̄a one wati wara kone sab̄ua rau ma dakuasakai b̄a manusia. Konena ndede, ndaita wati edata ake manusia makuasakai d̄i samenana.

⁹Pala ndaita wa'ura edata Ruma Isa makuasa! Sia rakandad̄i sato'i awa mai b̄a mala'eka ru'u wakatu samporo to'i, loakud̄u kai tahona ade Ruma Hatalla Sia loa made d̄iru'u sara'a ela manusia. Ndaita eda Sia ake rambei hid̄i dohokai ma d̄ese ra ntasa ro mataho poda b̄ara Sia wa'ura susa ra ncoki sampe madena.

¹⁰Poda romo wa'ura ncihi poda Ruma Hatalla — marakandad̄i samenana au-au ru'u rane'e ndai-Na — makandad̄ina Ruma Isa mambei salama ma mpuruna kai ncai susa ra ncokina. Kai ndede Ruma Hatalla naloa rece mboto dou ru'u b̄atu d̄ikad̄ese ra kantasa sama-sama lab̄o Ruma Isa. B̄ara Siara mahengga wea ncai ru'u siad̄oho d̄i loakai kasalama wea.

¹¹Ruma Isa karasona manusia rad̄i dosa-dosa siad̄oho; ro Sia marakarasona, ro siad̄oho rakaraso ede, sama-sama ntau sab̄ua Ama. B̄ara ndedena Ruma Isa wati majana mangaku siad̄oho ede kai sa'e ra ari-Na.

¹² Ruma Isa manggahi d̄i Ruma Hatalla, ”Mada d̄imangoa ra kahabana d̄i sa'e ra ari-Ku mab̄oha Ita. Mada d̄imaroi ra wadi Ita d̄i ade edakai angi siad̄oho.”

¹³ Ruma Isa manggahi rau, ”Nahu d̄imawi'i imbi-Ku d̄i Ruma Hatalla.” Ro nggahi Sia rau, ”Akera Nahu, masama-sama lab̄o ana-ana rawa'u mbei b̄a Ruma Hatalla d̄iru'u-Ku.”

¹⁴B̄ara dou-dou rapehe b̄a Sia ana ede, eded̄u mahluk manusia ma loa made, ndad̄i ndai Ruma Isa ndad̄i sama lab̄o siad̄oho ro mori d̄ei ka'ada'ana manusia. Karawi ndedekai Sia, loakud̄u kai made-Na Sia naloa kaleli Ibilis ma kuasakai made.

¹⁵Kai cara ede Sia hori kalosana dou-dou ma sa'umu morina raka'ada b̄ara nadahu d̄i made.

¹⁶Tadara b̄a one laina mala'eka rabantu-Na, malaisi londo ra mai la Ibrahim.

¹⁷Ake aona b̄a one Sia pab̄ua ndad̄i sama lab̄o sa'e ra ari-Na ade samenana lampa rawi. Ro ade ndedekaina Sia loa ndad̄i mana'ekai imam-imam ma to'a ro mantau kasi ade. Kai korobana ede Sia kanggorina mbani Ruma Hatalla b̄a one dosa sara'a bangsa.

¹⁸Ro b̄ara ndai Sia parana susa ra ncoki ro racoba, Sia naloa bantu dou-dou rab̄oha b̄a coba'ana, b̄ara ndai Sia parana racoba ro susa ra ncokina.