Read Bima IBRANI 3 Bible Online

IBRANI 3 - Bima bible

IBRANI 3

¹Cina ra angi masama ela Al Masih rawa'u ou rau b̄a Ruma Hatalla! Coba kananu kataho-tahopu mab̄oha Ruma Isa ake! Ruma Hatalla nggadu kalaina Sia d̄imandad̄i mana'ekai Imam-Imam ade agama ra'imbikai b̄a ndaita.

² Sia to'a d̄i Ruma Hatalla marawa'u hanta Sia d̄imakarawi ede, b̄une la Musa rau ntoina to'a kalampana taki ra putana d̄i Bait Allah.

³Pala Ruma Isa patu d̄imaraka lia ra horoma kai ma ncewi na'e ntewi kaisi la Musa. B̄ara dou ma tu'u uma pab̄uaku rakana lia rahoroma kai ncewi na'e ntewi kaisi ndai uma ede.

⁴Poda sanikina uma wara dou ma tu'una, pala ma tu'u samenana au-au eded̄u ndai Ruma Hatalla.

⁵La Musa to'a kai dou makarawi d̄i ade Bait Allah ro makarongga lampa rawi-lampa rawi ma d̄i ngoa b̄a Ruma Hatalla d̄i wakatu ma mai kento.

⁶Pala Al Masih to'a kai Ana ma ntau su'u ra tundu d̄i Bait Allah. Ro ndaita akeku Bait Allah, nggara ndaita ngge'empa kapoda ade ro ngge'empa imbi poda d̄imaraka au rakane'e b̄a ndaita.

⁷ B̄ara ndedena, b̄une ranggahi Roh Allah, ”Nggara d̄i ainaina ake nggomid̄oho ringamu eli Ruma Hatalla,

⁸nggomid̄oho aina kateramu tuta, b̄une wa'i ra waromu, wakatu siad̄oho barontana d̄i Ruma Hatalla, ro ujina Ruma Hatalla d̄i so sarae.

⁹’Ta aka wa'i ra waromu cobana Nahu, ro ujina Nahu,’ nggahi Ruma Hatalla ’sapodakaina siad̄oho wa'ura edana karawi-Ku upa mpuru mba'a ntoina.’

¹⁰B̄ara ndedena Nahu mbani-Ku d̄i siad̄oho ro nggahi Nahu, ’Siad̄oho wati to'a ncauna, ro wati ngawana to'akai parenta-parenta-Ku.’

¹¹Nahu mbani-Ku ro kasumpa, ’Siad̄oho wati d̄imalu'u d̄i dana ra rasa ede d̄i rakakaina sanawa sama lab̄o Nahu.’ ”

¹²Cina ra angi, jaga-jagapu aina sampe warakaina kone sab̄ua dou rau d̄i ade wekimu sab̄ua dou ma ndede dab̄ae adena ro mawati ntau imbi mapoda, ndad̄ina sia wari weki ro kad̄o'ona weki d̄i Ruma Hatalla ma mori!

¹³Ndad̄i, loakud̄u wati wara kone sab̄ua dou rad̄i wekimu ma tipu b̄a dosa ndad̄ina aoku Ruma Hatalla, pab̄uapu nggomid̄oho ngoa ra tei kataho kali cempe angi sanikina ainaina salama ndaita mbuipu mori ade jamana rapehekai ”Ainaina Ake” ade Alkitab.

¹⁴Ndaita sara'ana eded̄u lenga masama karawi kapoda ade lab̄o Al Masih, sura ndaita sampe cumpukaina nenti kacia imbi ma poda rakantau b̄a ndaita aipu saramba wa'una.

¹⁵ Ake ratunti ade Alkitab, ”Nggara d̄i ainaina ake nggomi ringamu eli Ruma Hatalla, nggomi aina kateramu tuta, b̄une wa'i ra waromu, aipu siad̄oho barontana d̄i Ruma Hatalla.”

¹⁶ Cousi dou-dou ma ringa eli Ruma Hatalla edempara barontana d̄i Ruma Hatalla? Eded̄u sara'a dou rawa'akai b̄a la Musa losa rad̄i Mesir.

¹⁷Ro d̄i cousi Ruma Hatalla mbanikaina upa mpuru mba'a ntoina? D̄i siad̄oho ma dosa, ma made d̄i so sarae.

¹⁸Wakatu Ruma Hatalla sumpa ndakena, ”Siad̄oho wati d̄imalu'u d̄ei dana ra rasa ede d̄i loakaina sanawa lab̄o-Ku” — cou rauku ramakasu b̄a Ruma Hatalla? Makasuna eded̄u dou-dou ma baronta d̄i Ruma Hatalla.

¹⁹Ake ndaita loara ka'ao b̄a one siad̄oho wati loana lu'u, b̄ara siad̄oho wati imbina d̄i Ruma Hatalla.