Read Bima IBRANI 4 Bible Online

IBRANI 4 - Bima bible

IBRANI 4

¹Rasake b̄a Ruma Hatalla nangge'empa, ro ndaita d̄i mbei sanawakai rasake-Na. Ndad̄i, pab̄uaku ndai sandaka loakud̄u aina wara kone sab̄ua dou rau d̄i ade weki nggomid̄oho mawati iumu sanawa rasakekai ede.

²B̄ara Haba Mataho ede wa'ura ngoa ra kahabana d̄i ndaita sama b̄une d̄i siad̄oho. Pala d̄iru'u siad̄oho, haba ede wati wara onena. B̄ara wakatu siad̄oho ringana, siad̄oho wati imbina.

³ Pala ndaita ma imbi matarima sanawa rasake b̄a Ruma Hatalla ede. Ede ncihi ncao lab̄o au ranggahi b̄a Ruma Hatalla, ndake, ”Nahu mbaniku ro kasumpa, ’Siad̄oho wati d̄imalu'u d̄i rakakaina sanawa lab̄o Nahu.’ ” Nggahi ndedekai Ruma Hatalla kone karawi-Na wa'ura nggori ra'aipu Sia kandad̄ina dunia ake.

⁴ B̄ara mab̄oha ainaina kapidukaina, wara ratunti ade Alkitab ndake, ”D̄i ainaina kapidukaina Ruma Hatalla sanawana rad̄i samenana karawi-Na.”

⁵ Mab̄oha lampa rawi ede ratunti ndake wali, ”Siad̄oho wati d̄imalu'u d̄i dana ra rasa ede d̄i rakakaina sanawa sama lab̄o Nahu.”

⁶Ndad̄i siad̄oho ma saramba-ramba ringa haba mab̄oha Haba Mataho ede, wati tarimana sanawakai ede b̄ara siad̄oho wati imbina. Nggara ndedesi wa'ura tada poda b̄a one wara dou-dou makalai ma loana tarima sanawakai ede.

⁷ B̄ara Ruma Hatalla wa'ura katantuna sab̄ua ainaina ma kalai wali, rapehekai ”Ainaina Ake”. Wa'ura ntoi poda sawa'u b̄a ede Ruma Hatalla manuntu mab̄oha lampa rawi ede kai ncai la Daud, ade ayat raweha akana ede, ”Nggara d̄i ainaina ake nggomi ringamu eli Ruma Hatalla, nggomi aina kateramu tuta.”

⁸ Nggara paisi la Yosua wa'ura mbeina dou-dou ede sanawakai rasake b̄a Ruma Hatalla, ndad̄i Ruma Hatalla wati d̄imanuntu wali mab̄oha sab̄ua ainaina ma kalai.

⁹Ndad̄i, d̄iru'u ela Ruma Hatalla mbuipu wara sake d̄i sanawakai b̄une Ruma Hatalla masanawa d̄i ainaina kapidukaina ede.

¹⁰ B̄ara dou ma tarima sanawakai rasake b̄a Ruma Hatalla d̄i ndaina ede, d̄imasanawa rau rad̄i samenana karawina, sama b̄une Ruma Hatalla.

¹¹B̄ara ndedena, maira ndaita usaha poda-podaku d̄imatarima sanawakai rasake b̄a Ruma Hatalla ede. Aina sampe kone sab̄ua dou rau rad̄i ndaita mawati raka b̄une siad̄oho ma'uluna, b̄ara wati imbina d̄i Ruma Hatalla.

¹²Nggahi ra eli Ruma Hatalla eded̄u nggahi ra eli ma mori ro tenggo; ncewi ngaha rad̄i peda mantau woi b̄ali b̄ae. Nggahi ra eli ede nacakiku sampe hampa nawa ro roh; sampe hampa hela puru-puru ro peke sambadi, ndad̄ina d̄i b̄adekai sad̄ei-d̄eina fiki ra kananu ro nia ade manusia.

¹³Wati wara kone sab̄ua mahluk rau ma cili weki rad̄i ntanda b̄a Ruma Hatalla. Samenana au-au ronda ro nahengga weki d̄i tando-Na. Ro ndaita pab̄uaku mbeita rasu'u ra tunduta d̄i Sia.

¹⁴B̄ara ndedena ndaita pab̄ua nenti kacia d̄i ramangaku imbi ma poda b̄a ndaita. B̄ara ndaita ntau mana'ekai Imam-Imam ma na'e, ma wa'ura lu'u sampe d̄itando Ruma Hatalla — Siara Ruma Isa Ana Ruma Hatalla.

¹⁵Mana'ekai Imam-Imam ndaita ede laina imam ma wati loa iu wea makura d̄i ndaita. Pala, Sia wa'ura hina b̄a coba ade samenana lampa rawi, sama b̄une ndaita; cuma Sia wati karawina dosa!

¹⁶B̄ara ndedena, maira ndaita lao d̄eni d̄ihid̄i dohokai rad̄i anugera Ruma Hatalla ma parenta kai taho ade. Ruma Hatalla d̄imakasi ade d̄i ndaita ro nambeiku bareka d̄i ndaita loakud̄u ndaita raka bantu mancihi ncao pea wakatuna.