Read Bima IBRANI 5 Bible Online

IBRANI 5 - Bima bible

IBRANI 5

¹Sanikina dou mana'ekai imam-imam rakad̄ale d̄i ade weki ela Ruma, ro rahanta d̄imakarawi wea ru'u Ruma Hatalla kai waki siad̄oho. Taki ra putana eded̄u d̄onggo ra mbei ru'u Ruma Hatalla rambei-mbei ro koroba-koroba ru'u kangampukai dosa.

²Ndai mana'ekai imam-imam ede wara dawa'una ade mboto lampa rawi, ro b̄ara ndedena sia naloa mapu ra ntika nggahi ra elina d̄i dou-dou ma wati b̄ade au-au ro ma santuda lampana.

³ Ro b̄ara ndai sia mamapu, ndad̄i sia pab̄uaku d̄onggo ra mbeina koroba, laina b̄ara dosa-dosa ela Ruma mpoa, pala b̄ara dosa-dosa ndai rauna.

⁴ Wati wara kone sab̄ua dou rau ma hanta weki ndaina mandad̄i mana'ekai imam-imam. Dou ndad̄ina mana'ekai imam-imam, nggara Ruma Hatalla maou sia ru'u ede — sama b̄une la Harun.

⁵ Ndede rau Al Masih. Sia wati hantana weki ndai-Na ndad̄i mana'ekai Imam-Imam. Ndai Ruma Hatalla marahantana Sia. Nggahi Ruma Hatalla d̄i Sia, ”Nggomira Ana-Ku; d̄i ainaina ake Nahu mandad̄i Ama-Mu.”

⁶ D̄i ayat makalai Ruma Hatalla nggahi rauna, ”Nggomi eded̄u Imam masantoi-ntoina, b̄une Imam Melkisedek.”

⁷ Aipu wakatu Ruma Isa morina d̄i dunia ake, Sia do'ana ro naraho kai nangi ro kanggica d̄i Ruma Hatalla, ma sanggo kasalama wea-Na rad̄i madekaina. Ro b̄ara Sia na'oko d̄i Ruma Hatalla kai b̄ini b̄a lia ra horoma, ndad̄i Sia wa'ura kade'e ra ringa wea.

⁸Ruma Isa eded̄u Ana Ruma Hatalla, pala konena ndede, Sia tana'o ndad̄i to'a kai ncai susa ra ncoki iu-Na.

⁹Ndad̄i sawa'u b̄a Sia kandad̄i makasalama ma mpuruna, Sia ndad̄i fu'una b̄a salamakai ma ederahid̄i ru'u samenana dou ma to'a d̄i Sia,

¹⁰ro Ruma Hatalla rau katadana Sia mana'ekai Imam-Imam, b̄une Imam Melkisedek!

¹¹Mab̄oha ka'ada'an Ruma Isa kai mana'ekai Imam-Imam, wara mboto ma paralu d̄i ngoa b̄a nami d̄i nggomid̄oho, pala nggonggi d̄i ngoa kab̄ae b̄ara nggomid̄oho ngeri poda loamu ka'ao.

¹² Sapodakaina wa'ura raka wakatuna ru'umu d̄imandad̄i guru, pala tadana nggomid̄oho mbuipu paralu tana'o d̄i dou makalai mab̄oha dasa-dasa masaramba ngoa ra tei b̄a Ruma Hatalla. Nggomid̄oho watipu wa'umu tarima ngaha ra nono ma tera; nggomid̄oho mbuipu pab̄ua nono susu mpoa.

¹³Dou ma mbuipu nono susu, ede aona sia mbuipu to'i keana; sia watipu ntauna fiki ra kananu mab̄oha au ma ncihi lab̄o au ma ncara.

¹⁴Ngaha ra nono ma tera eded̄u ru'u dou mana'e ra tua kananu ma b̄ara wa'ura tua fiki ra kananu, nawa'ura loa cengga b̄e ma taho ro b̄e ma iha.