Read Bima IBRANI 6 Bible Online

IBRANI 6 - Bima bible

IBRANI 6

¹B̄ara ndedena, maira ndaita lu'ura d̄i ngoa ra tei-ngoa ra tei ma ese wali mab̄oha na'e ra tua mori ra woko ela Al Masih, ro aina tio kab̄ae mpoa dasa-dasa sarambana ngoa ra tei agama ndaita. Aina ndai karawi mboda walita tana'o dasa b̄a one dou pab̄uaku denggana karawi lampa rawi-lampa rawi ma wati wara onena ro pab̄uaku imbi d̄i Ruma Hatalla,

²atao ngoa ra tei dasa mab̄oha upacara kandeu karasokaina atao mab̄oha toho rima d̄i dou, atao mab̄oha mori mbali sawa'u b̄a made atao hukuma ma ederahid̄i.

³Maira ndaita, nggara kausi b̄a Ruma Hatalla, lu'u d̄i tana'o-tana'o ma ncewi ese!

⁴B̄ara, dou-dou ma wa'ura murta, wati lu'u b̄a aka d̄i d̄anda ra wa'a kambali. Siad̄oho ntoina wa'ura wara d̄i ade taroa rad̄i Ruma Hatalla, ro wa'ura iuna rambei-Na. Siad̄oho nawa'ura b̄oha rau b̄a kuasa Roh Allah.

⁵Siad̄oho b̄adena d̄i ra'iukai b̄a siad̄oho b̄a one nggahi ra eli Ruma Hatalla ede taho, ro siad̄oho wa'ura iuna bareka-bareka ma b̄inikai b̄a kuasa rad̄i dunia ma mai kento.

⁶Pala sawa'u b̄a ede siad̄oho murtana! B̄uneku loa d̄anda ra wa'a mbali siad̄oho d̄imatoba wali rad̄i dosa-dosa siad̄oho. B̄ara siad̄oho wunga salib walina Ana Ruma Hatalla ro ndawina Sia katuna ra kab̄awa d̄itando dou mamboto.

⁷Dana ma wi'i oi ura ma ntuwu mab̄u ese wawona, edempara kawokona nggud̄a ra congge ma wara one d̄iru'u dou ma karawina, dana ede d̄i mbei bareka b̄a Ruma Hatalla.

⁸ Pala nggara dana ede kawokona ati-ati ro au ramawoko mantau rui, ndad̄i dana ede wati wara onena ro pea d̄i b̄a'a b̄a Ruma Hatalla ro cumpukaina d̄i ka'a kampoi.

⁹Pala cina ra angi meciku, konena ndede nggahi nami, pala nami ma'imbi poda mab̄oha nggomid̄oho. Nami ma'imbi poda b̄a one nggomid̄oho wa'ura tarima lampa rawi-lampa rawi ma ncewi taho, eded̄u bareka-bareka ma ndad̄i ru'umu rad̄i salamakaimu.

¹⁰Ruma Hatalla laina Ruma Hatalla ma wati adi. Sia wati nefana au rakarawi wea b̄a nggomid̄oho d̄iru'u Sia, ro meci ra ca'u rakatada b̄a nggomid̄oho d̄iru'u Sia wakatu bantumu cina ra angi masama imbi, ntoina ro ake.

¹¹Nami mane'e poda loakud̄u cua-cua nggomid̄oho ngawamu kapoda ade ncau sampe cumpukai, ndad̄ina nggomid̄oho matarima au rad̄i kane'e b̄a nggomid̄oho ede.

¹²Nami wati ne'emu nggomid̄oho ndad̄i d̄aju. Pala ne'e b̄a nami loakud̄u nggomid̄oho mori b̄une dou-dou ma tarima au rasakekai b̄a Ruma Hatalla, b̄ara imbi d̄i Sia ro b̄ara ngenamu kai saba.

¹³Aipu Ruma Hatalla sakena d̄i la Ibrahim, Sia sumpana b̄a one Sia d̄imakarawi au rawa'u sake-Na. Ro b̄ara wati wara ma ncewi ese ntewi kaisi Ruma Hatalla, edempara Sia sumpana kai ngara ndai-Na.

¹⁴ Sia nggahina, ”Nahu masake d̄imambei bareka nggomi ro mandawi londo ra maimu ndad̄i mboto.”

¹⁵La Ibrahim nangena kai saba, ndad̄i sia matarima au rasake b̄a Ruma Hatalla d̄i sia.

¹⁶Nggara dou nasumpasi, sia sumpakaina kai ngara dou makalai ma ncewi ese d̄i sia, ndad̄i sumpa ede nakanggorikaiku samenana cence ncihi.

¹⁷Ruma Hatalla nane'e nggahi kapodaku d̄i dou-dou ma tarima sake-Na, b̄ara Sia wati d̄imarungka nia-Na. B̄ara ndedena Sia sala'ina sumpa d̄i rasake-Na ede.

¹⁸D̄ua mbua lampa rawi ede wati loana rungka weki: Ruma Hatalla wati lu'u b̄a aka cowana mab̄oha sake lab̄o sumpa-Na. B̄ara ndedena, ndaita ma wa'ura horu weki d̄i Ruma Hatalla, d̄i kau kapoda ade matenggo d̄inenti kaciakai d̄i kane'e ma wira weki d̄itando ndaita.

¹⁹ Kane'e ndaita ede b̄une mangga ma ncongge wancu d̄ei ro mandad̄i d̄i nenti ma tenggo ro mataho d̄iru'u mori ndaita. Kane'e ede natod̄oku satampa B̄ili Mawancu raso d̄i Bait Allah d̄i saroga.

²⁰ Ruma Isa wa'ura henggana ncai sarambana lao d̄i hid̄i ede d̄i ru'u ndaita, ro wa'ura lu'u ta aka ndad̄i Mana'ekai Imam-Imam ndaita ru'u santoi-ntoina, b̄une Imam Melkisedek.