Read Bima IBRANI 7 Bible Online

IBRANI 7 - Bima bible

IBRANI 7

¹ Melkisedek ake eded̄u sangaji rad̄i Salem ro imam Ruma Hatalla Mawancu d̄ese ra ntasa. Wakatu mbali la Ibrahim rad̄i lewa ra laka kakoana sangaji-sangaji, Melkisedek mai weha aona sia ro sambea mbeina bareka sia.

²Edempara la Ibrahim mbeina d̄iru'u Melkisedek cengga sampuru rad̄i ade samenana au rarampana. (Ngara Melkisedek aona, saramba-rambana, ”Sangaji lampa rawi Ma adi”; ro b̄ara sia sangaji rad̄i Salem, ndad̄i ngarana ao rauna ”Sangaji Taho ra ntai”.)

³Mab̄oha Melkisedek ake wati wara habana tab̄e-b̄e rau b̄a one sia ntauna ama atao ina atao wa'i ra warona; wati wara rau habana mab̄oha warakaina, atao rau madekaina. Sia sama b̄une Ana Ruma Hatalla; sia eded̄u imam ma ederahid̄i.

⁴Ndad̄i, ndai eda ta ake b̄a wancu na'ena Melkisedek ake; sia ndede pahu na'ena ndad̄ina la Ibrahim, ama londo ra mai bangsa ndaita, mambei d̄iru'u sia cengga sampuru d̄i samenana rakana rad̄i lewa ra lakakai ede.

⁵ D̄i ade hukum Taurat rakatantukai b̄a one imam-imam londo ra mai la Lewi pab̄uaku wehana cengga sampuru rad̄i hasi d̄i ela ra dou Israel, eded̄u cina ra angi ndai siad̄oho, konena siad̄oho sama-sama londo ra mai la Ibrahim.

⁶Melkisedek laina londo ra mai la Lewi, pala sia natarima rauku cengga sampuru rad̄i samenana rarampa b̄a la Ibrahim, ro sambea mbeina bareka rau d̄i la Ibrahim ma wa'ura tarima sake-sake rad̄i Ruma Hatalla.

⁷Poda wati loa d̄ikawati b̄a one dou rasambea mbei bareka eded̄u ncewi awa ntewi kaisi lab̄o dou do'a mbeina bareka.

⁸Imam-imam ma tarima raweha cengga sampuru ede eded̄u dou ma loa made. Pala b̄atu Alkitab, Melkisedek ma tarima rambei cengga sampuru ede eded̄u dou ma ngge'empa mori.

⁹Loa d̄i nggahi, b̄a one la Lewi — ma londo ra maina maweha cengga sampuru rad̄i ela ra dou Israel — cola rauna ru'u ede ta la Ibrahim, aipu wakatu la Ibrahim colana d̄i Melkisedek.

¹⁰Konena la Lewi watipu ranggana, pala loa d̄inggahi sia wa'ura wara d̄i ade sarumbu la Ibrahim wa'i ra warona, aipu Melkisedek eda angina lab̄o la Ibrahim.

¹¹Wunga na'ekai b̄a imam-imam Lewi, hukum Taurat d̄i mbei d̄i ela ra dou Israel. B̄ara imam-imam Lewi ntoina ede wati loana karawi kai sampuruna au rapab̄ua d̄i karawina, ndad̄i pab̄uaku wara imam makalai, eded̄u ma sama b̄une Imam Melkisedek, ro laina rad̄i golonga Imam Harun wali!

¹²Nggara b̄ora imam-imam rungka wekina, hukum Taurat rau pab̄uaku d̄i rungka rau.

¹³Ma aona ta ake eded̄u Ruma ndaita: Sia rad̄i londo ra mai makalai, ro watipu parana kone sab̄ua dou rau rad̄i londo ra mai-Na mantau taki ra puta kai imam.

¹⁴Samenana dou nab̄adeku b̄a one Ruma ndaita ramaina rad̄i londo ra mai la Yehuda; ro la Musa wati paranana pehe londo ra mai ede aipu wakatu sia nuntu ra nggahina mab̄oha imam-imam.

¹⁵Lampa rawi ranuntu ake nandad̄i ncewi taroa wali, kai wontuna sab̄ua dou imam makalai ma b̄une Melkisedek.

¹⁶Sia rahanta ndad̄i imam, laina kai dasa atora-atora manusia, malaisi kai dasa morina ma ntau kuasa ro ma wati wara cumpuna.

¹⁷ B̄ara d̄i ade Alkitab ranggahi, ”Nggomi eded̄u imam santoi-ntoina, b̄une Imam Melkisedek.”

¹⁸Ndad̄i, ake atora ma ntoi wa'ura watid̄u kani, b̄ara watid̄u tenggona ro watid̄u wara onena.

¹⁹Hukum Taurat wati loana ndawi au-au ndad̄i mpuruna. B̄ara ndedena ndaita ake rambei sab̄ua kane'e ma ncewi taho; kai ede ndaita loa kad̄eni weki d̄i Ruma Hatalla.

²⁰Ndede wali, sara'ana ede wara sama lab̄o sumpa rad̄i Ruma Hatalla. Wati wara sumpa b̄une ede aipu wakatu imam-imam ma kalai ede rahanta.

²¹ Pala Ruma Isa rahanta ndad̄i imam kai sumpa, d̄i wakatu Ruma Hatalla manggahi d̄i Sia, ”Ruma nawa'ura sumpa, ro Sia wati d̄imarungka kananu-Na, ’Nggomi eded̄u imam santoi-ntoina.’ ”

²²Kai ake rau Ruma Isa ndad̄i d̄i nenti ru'u sab̄ua rasake ma ncewi taho.

²³Wara wali sab̄ua lampa rawi: imam-imam ma kalai ede wara mboto, b̄ara siad̄oho cua-cua made ndad̄ina wati loana tuwu angi b̄orana.

²⁴Pala Ruma Isa mori santoi-ntoina, ndad̄i ka'ada'a-Na kai imam wati loana peso d̄i dou makalai.

²⁵B̄ara ndedena d̄iru'u santoi-ntoina Ruma Isa naloa kasalama dou-dou ma mai d̄i Ruma Hatalla kai ncai Sia, b̄ara Sia mori santoi-ntoina d̄i raho kai d̄i Ruma Hatalla d̄iru'u dou-dou ede.

²⁶Ndad̄i, Ruma Isa eded̄u mana'ekai Imam-Imam d̄i paralu b̄a ndaita. Sia raso; d̄i Sia wati wara mancara atao dosa au-au. Sia rakalai rad̄i dou-dou madosa, ro rakad̄ese sampe d̄i hid̄i ma ncewi ese rad̄i samenana langi.

²⁷ Sia wati samana b̄une mana'ekai imam-imam ma kalai, ma saniki ainaina pab̄ua d̄onggo ra mbei koroba b̄ara dosa-dosa ndaina ma'ulu, sawa'u b̄a ede b̄ara dosa-dosa ela Ruma. Ruma Isa d̄onggo ra mbeina koroba cuma sakalimpa ru'u santoi-ntoina, aipu Sia d̄onggo ra mbeina weki ndai-Na kai koroba.

²⁸Hukum Taurat nahantaku dou ma wati mpuruna mandad̄i mana'ekai imam-imam. Pala sawa'u b̄a ede rad̄i hukum ede, Ruma Hatalla ndawina sake kai sumpa b̄a one Sia mahanta kai mana'ekai Imam-Imam, Ana ma wa'ura d̄i kandad̄i d̄i Makasalama ma mpuruna d̄iru'u santoi-ntoina.