Read Bima IBRANI 8 Bible Online

IBRANI 8 - Bima bible

IBRANI 8

¹ Fu'una rad̄i samenana nuntu ra nggahi ake eded̄u: Ndaita ntau mana'ekai Imam-Imam ma b̄une ede, ma doho parenta sama lab̄o Ruma Hatalla Mana'e ra ntoru d̄i saroga.

²Sia karawina taki ra puta kai Mana'ekai Imam-Imam d̄i B̄ili Mawancu raso, eded̄u d̄i ade Kema Ruma ma sapodakaina, ratu'u b̄a Ruma, laina b̄a manusia.

³Sanikina mana'ekai imam-imam rahanta d̄imad̄onggo ra mbei koroba atao d̄onggo ra mbei d̄i Ruma Hatalla. Ndede rauja Mana'ekai Imam-Imam ndaita; Sia pab̄uaku ntauna au-au ru'u d̄id̄onggo ra mbei.

⁴Pai Sia nawara d̄i dunia ake, Sia wati d̄imandad̄i imam, b̄ara wa'ura wara imam ma d̄onggo ra mbei koroba rakaukai ade hukum Taurat.

⁵ Karawi rakarawi b̄a siad̄oho kai imam ede sapodakaina cuma sab̄ua gambarana ro mawati tada rad̄i au ma wara d̄i saroga. Ede wa'ura ngoa b̄a Ruma Hatalla d̄i la Musa ntoina, aipu la Musa ne'ena tu'u wea Kema Ruma. Ruma Hatalla nggahi ndakena d̄i la Musa, ”Kawarapu! Samenana ede pab̄uapu ndawi b̄a nggomi b̄atupu conto ratei katahona d̄i nggomi ese wawo doro.”

⁶Pala ake Ruma Isa maraka taki ra puta kai Imam ma d̄o'oku ncewi d̄ese ra ntasa ntewi kaisi lab̄o rakarawi b̄a imam-imam ede. B̄ara sake rakawara-Na d̄i Ruma Hatalla ro manusia, eded̄u rasake ma ncewi taho b̄ara kai dasa sake ru'u lampa rawi-lampa rawi ma ncewi taho.

⁷Pai wati wara makura d̄i sake ma sarambana, ndad̄i wati paraluna kawara wali sake ma kad̄uakaina.

⁸ Pala Ruma Hatalla wa'ura rumpana mancara d̄i ela-Na, ndad̄ina nggahi Ruma Hatalla, ”Kawarapu, d̄imamai wakatuna, Nahu d̄imakawarana sake ma b̄ou lab̄o bangsa Israel, ro lab̄o bangsa Yehuda.

⁹Laina b̄une rasake randawi-Ku lab̄o wa'i ra waro siad̄oho aipu wakatu Nahu d̄anda kalosaku siad̄oho rad̄i dana ra rasa Mesir. Siad̄oho wati to'ana d̄i sake randawi b̄a Nahu lab̄o siad̄oho; b̄ara ndedena Nahu wati eda rantandaku siad̄oho.

¹⁰Pala ake, akera sake ma d̄i ndawi-Ku lab̄o ela Israel d̄i ainaina-ainaina ma kento, nggahi Ruma: Nahu d̄imatoho wi'i hukum-Ku d̄i ade fiki ra kananu siad̄oho, ro matuntina d̄i ade siad̄oho. Nahu d̄imandad̄i Ruma Hatalla siad̄oho, ro siad̄oho d̄imandad̄i ela-Ku.

¹¹Siad̄oho wati paraluna tei d̄i sama elana, atao mangoa d̄i cinana, ’Patapu Ruma.’ B̄ara siad̄oho sara'ana, to'i na'e, d̄imapata Nahu.

¹²Nahu d̄imakangampu wea ncara ra kancaru siad̄oho, ro wati kawara walina dosa-dosa siad̄oho.”

¹³Kai katadana sab̄ua rasake ma b̄ou, Ruma Hatalla ndawina sake ma sarambana ede ndad̄i tua ro mpasa; ro au ramawa'ura tua, d̄imambora roci rau.