Read Bima YAKUB 1 Bible Online

YAKUB 1 - Bima bible

YAKUB 1

¹ Cina ra angi ela Ruma Hatalla samenana ma wara d̄i sara'a dunia! Salam rad̄i nahu, Yakub ada Ruma Hatalla ro ada Ruma Isa Al Masih.

²Cina ra angi! Nggara ma'iusi b̄a nggomid̄oho mboto pahu coba'ana, pab̄ua rocipu nggomid̄oho iumu laba.

³B̄ara nggomid̄oho mab̄adeku, b̄a one nggara nggomid̄oho ngge'empa imbimu d̄i Ruma wakatu iumu coba'ana d̄imandad̄i eded̄u nggomid̄oho mandad̄i lembo ade.

⁴Jagapu loakud̄u lembo ademu ede d̄i mawara ntuwu sampe nggomid̄oho ndad̄i poda-poda sampuruna ro wati wara madancihimu d̄i ade sara'a lampa rawi.

⁵Nggara warasi d̄i ade wekimu ma kura loa timba ra lemba, pab̄uaku sia rahona d̄i Ruma Hatalla, ndad̄i Ruma Hatalla d̄imambeina timba ra lemba d̄i sia; b̄ara d̄i sanikina dou, Ruma Hatalla d̄i mambeina kai ncera ra mbura ade lab̄o kai iu kasi ade.

⁶Pala dou ma raho, pab̄uaku imbina; sia wati loana mbali mbua adena. B̄ara dou ma mbali mbua adena eded̄u b̄une balumba d̄i moti ra'ewu rero b̄a angi.

⁷Dou b̄une ede wati midi kananuna; sia wati loana weha nggahi ra eli cumpukai d̄i ade sara'ana au-au rakarawina. B̄ara ndedena ai rauna sia ne'ena raka au-au d̄i Ruma.

⁹Dou ela Al Masih ma ncoki mori pab̄uaku neo adena nggara kad̄ese b̄a Ruma Hatalla.

¹⁰ Ro dou ela Al Masih ma ntau ra wara pab̄uaku neo ade rauna, nggara ka'awasi b̄a Ruma Hatalla. B̄ara dou mantau ra wara d̄imambora b̄une wunta mpori.

¹¹Wakatu wontu liro lab̄o panana makancere, ndad̄i mpori ede d̄imandad̄i male ndad̄ina horora wuntana ro mbora rau ntikana. Ndede rauku lab̄o dou ma ntau ra wara; sia d̄imaleli wakatu sia kalampana usaha.

¹²Taho ra ntikara d̄iru'u b̄a dou ma lembo ade wakatu sia iuna coba'a. B̄ara sawa'u b̄a sia wa'una taha d̄i ade coba'ana ede, sia d̄imatarima ufana, ede mori ra woko rasake b̄a Ruma Hatalla d̄i dou-dou mameci ra ca'u Ruma Hatalla.

¹³Dou nggara nab̄ohasi b̄a goda'ana b̄a one coba'a b̄une pahu ede aina nggahi b̄a sia, ”Goda'ana ake ramaina ta Ruma Hatalla,” b̄ara Ruma Hatalla wati loa d̄igoda b̄a ma'iha ro madab̄ae, ro wati goda rauna kone sab̄ua dou rau.

¹⁴Pala dou rab̄oha b̄a goda nggara nahintisi ro nad̄ikiku b̄ara ne'e ndaina ma'iha ra madab̄ae.

¹⁵Edempara, nggara rane'ena ma iha ede d̄i b̄atusi, ede maikaina dosa; ro nggara dosa ede wa'ura ntasa, ndad̄ikaina eded̄u made.

¹⁶Ai to'ina nggomid̄oho hina b̄a tipu, cina ra angi meci b̄a nahu!

¹⁷Sanikina rambei ma taho lab̄o hadia ma mpuruna ramaina ta saroga, rakalondo b̄a Ruma Hatalla, Makandad̄ina samenana ma taroa d̄i langi. Siara Ruma Hatalla mawati rungka weki, ro wati makamaina rindi au-au rau.

¹⁸Kai b̄ara ne'e ndai-Na, Sia kandad̄ina ndaita ana-ana-Na kai ncai nggahi ra eli-Na ma poda. Sia karawikaina ede loakud̄u ndaita raka hid̄i ma taho poda d̄i ade mahluk rakandad̄i-Na.

¹⁹Ringa ra kade'e katahopu ake, Cina ra angi meci b̄a nahu! Sanikina dou pab̄uaku ringa rocina, pala aho d̄imanuntu ro aho d̄imambani.

²⁰Dou ma ca'u mbani wati loana karawi ma taho, ma kasana ade Ruma Hatalla.

²¹B̄ara ndedena, pakipu sanikina rawi ranginakai ma sampu ra nggele ro madab̄ae. Weha aopu kai ade mataho nggahi ra eli ranggud̄a b̄a Ruma Hatalla d̄i'ademu, b̄ara nggahi ra eli ede mantau tenggo ra wale d̄imakasalamana nggomid̄oho.

²²Pab̄uapu karawi b̄a nggomid̄oho au ranggahi b̄a Ruma Hatalla, aina ringa mpoamu, ndad̄ina ade ndedekaina nggomid̄oho matipu weki ndaimu.

²³Dou ma ringa ra kade'e nggahi ra eli Ruma Hatalla, pala wati karawina eded̄u b̄une dou ma wunga eda pahu ndaina masapodakaina d̄i tando saninu.

²⁴Sawa'u b̄a tio kab̄ae-b̄ae b̄a sia, sia laona ro nefa lalona b̄uneku, pahuna ede.

²⁵Hukum Allah nasampuruna ro ntau tenggo ra wale d̄i hori kalosakaina manusia. Ro dou ma paresa kab̄ae ro matio kab̄ae-b̄ae ro makarawi hukum-hukum ede, ro laina ringa ra kade'e mpoana edempara nefana, dou ede d̄i mbei bareka b̄a Ruma Hatalla d̄i ade sanikina lampa rawi rakarawina.

²⁶Nggara warasi dou ma iu wekina kai dou ma to'a d̄i agama, pala sia wati jagana rerana, ndad̄i sia natipuku weki ndaina; sambeana wati wara onena.

²⁷To'a d̄i agama ma raso ro masapodakaina rantanda b̄a Ruma Hatalla Ama ndaita eded̄u: mabantu d̄ambe-d̄ambe to'i makasi pahu ro dou-dou siwe mbaru mboha ma susa ra ncoki, ro majaga weki ndaina loakud̄u aina ka'iha b̄a dunia ake.