Read Bima YAKUB 2 Bible Online

YAKUB 2 - Bima bible

YAKUB 2

¹Cina ra angiku! Kai dou ma imbi d̄i Ruma Isa Al Masih, Ruma Wancu D̄ese Ra Ntasa, aina nggomid̄oho kalai-laimu dou kai dasa lampa rawi ma tada.

²B̄ara warasi dou ma ntau ra wara ma kani sinci masa ro ma kani ra lombo ma ntika maina d̄i kab̄orokaimu, edempara mai rauja sab̄ua dou ma ncoki mori ma kani ra lombo ma ncipa-ncipa,

³ndad̄i nggomid̄oho ma ncewi lia ra horomaku d̄i dou ma kani ra lombo ma ntika ede. Nggahi b̄a nggomid̄oho d̄i sia, ”Tasantab̄eta Ita doho d̄i kadera ma ipi taho ake.” Pala d̄i dou ma ncoki mori nggahi b̄a nggomid̄oho, ”Kid̄ipu ta aka,” atao ”Dohopu ta awa.”

⁴Kai rawimu b̄une ede, nggomid̄oho kalai-laimu d̄iwoha sasamu manusia ro nilaimu dou kai fiki ra kananumu ma dab̄ae.

⁵Kawarapu, cina ra angi d̄i meci ra ca'u b̄a nahu! Dou ma ncoki mori d̄i dunia ake, d̄ikad̄ale b̄a Ruma Hatalla d̄imandad̄i dou ma ntau ra wara d̄i ade imbina. Dou-dou ede d̄imandad̄i anggota ela Karaja'an Allah b̄une rasake b̄a Ruma Hatalla d̄i dou ma meci ra ca'u-Na.

⁶Pala nggomid̄oho ma naha katuna ra kab̄awaku dou ma ncoki mori, sapodakaina dou ma ntau ra waraku ma tonda-tondana nggomid̄oho ro ma randana nggomid̄oho lao aka pengadilana!

⁷Siad̄oho ma katuna ra kab̄awa ngara ma taho ratarima b̄a nggomid̄oho d̄i Ruma Hatalla!

⁸ Nggomid̄oho karawimu ma ncihi, nggara kalampasi b̄a nggomid̄oho hukum Karaja'an ma wara d̄i ade ayat Alkitab ake, ”Meci ra ca'upu cina ra angimu b̄une nggomid̄oho meci ra ca'umu weki ndaimu.”

⁹Pala nggara kalai-laisi b̄a nggomid̄oho dou kai dasa lampa rawi ma tada, nggomid̄oho karawimu dosa, ro hukum Allah ma nggahi b̄a one nggomid̄oho eded̄u ma sapana hukum.

¹⁰Dou ma sapa sab̄ua ade hukum Allah, aona nasapa sara'aku.

¹¹ B̄ara Sia ma nggahi, ”Aina karawimu jina,” Sia rau ma nggahi, ”Aina hade dou.” Ndad̄i, nggara watisi karawi b̄a nggomid̄oho jina, pala hademu dou, ndad̄i nggomid̄oho eded̄u dou ma sapa hukum rau.

¹²Nuntu ra nggahipu ro karawipu kai dou d̄imaparesa ncihi ra ncara b̄atu hukum Allah ma hori kalosa manusia.

¹³B̄ara Ruma Hatalla wati d̄imateina kasi ade d̄i dou ma wati b̄ade kasi ade d̄i cina ra angi. Pala kasi ade nancewi tenggo ntewi kaisi lab̄o hukumana.

¹⁴Cina ra angi! Auku onena dou ma nggahi, ”Nahu dou ma imbi”, nggara watisi sia katadana kai ruku ra rawina? Sab̄ua loaku imbi b̄une ede ma kasalamana?

¹⁵Misakai sab̄ua dou cinata ma paralu kani ra lombo ro wati ntauna d̄i ngaha ra nono ma ncihi d̄i ru'u sanai-nai.

¹⁶Auku onena nggahi b̄a nggomid̄oho d̄i sia, ”Lao taho-tahora d̄i ncai, kanira kani ra lombo marana ro ngahara ngaha ra nono ma caru!” — nggara watisi mbei b̄a nggomid̄oho d̄i sia au d̄i paralu b̄a sia d̄i morikaina?

¹⁷Ndede walija imbi, nggara watisi katada kai ruku ra rawi, ndad̄i imbi ede wati wara onena.

¹⁸Kombisi wara ma nggahi, ”Wara dou ma wi'i weki d̄i imbina ro waraja ma wi'i weki d̄i ruku ra rawina.” Nahu d̄imacambena, ”Tateipu d̄i nahu b̄uneku dou loana ntau imbi kai wati kalampana ro nahu d̄imatei katadana kai ruku ra rawi b̄a one nahu kantau imbi.”

¹⁹Nggomid̄oho ma imbiku b̄a one Ruma Hatalla sab̄uampa. Roh-roh seta rau na'imbiku ro siad̄oho nab̄ib̄i b̄a dahuna!

²⁰Nggomid̄oho ma sampula poda! sab̄ua paralu d̄imbei bukuti d̄i nggomid̄oho b̄a one wati wara onena ntau imbi watisi kalampa imbi ede?

²¹ Tiompa la Ibrahim wa'i ra waro ndaita. Sia tarima ao kataho b̄a Ruma Hatalla b̄ara ruku ra rawina, eded̄u wakatu sia d̄onggo ra mbeina la Ishak, anana, d̄i Ruma Hatalla ese wawo mezeba.

²²Ta ake nataroa poda b̄a one imbi pab̄uaku d̄ikatada kai ruku ra rawi loakud̄u ndad̄i sampuruna.

²³ Kai ndedena, b̄une ranggahi b̄a ayat Alkitab ake, ”Ibrahim imbina d̄i Ruma Hatalla, ro Ruma katadana la Ibrahim ma ncihi ro raso d̄i ntanda b̄a Ruma Hatalla.” Ibrahim d̄ipehekai, ”Soba Ruma Hatalla”.

²⁴Ake natada podara, b̄a dou ratarima kataho b̄a Ruma Hatalla b̄ara au rakarawi b̄a dou ede, ro laina b̄ara imbi mpoana.

²⁵ Tio raupu d̄i la Rahab, dou siwe ma sunda ede. Sia tarima ao kataho b̄a Ruma Hatalla b̄ara ruku ra rawina, eded̄u wakatu sia tarima aona d̄i ade umana dou-dou Israel ma nina musu ro ma bantu siad̄oho lao rai kai ncai ma kalai.

²⁶B̄une sarumbukai wati wara nawa eded̄u sarumbu ma made, ndede rau lab̄o imbi watisi kalampa eded̄u imbi ma made.