Read Bima YAKUB 3 Bible Online

YAKUB 3 - Bima bible

YAKUB 3

¹Cina ra angi! Aina ipi mboto d̄i ade wekimu ma ne'e ndad̄i guru. Nggomid̄oho ma b̄adeku ndai ma ndad̄i guru d̄i b̄ab̄u bai hukuma ma ncewi tani ntewi kaisi dou ma kalai.

²Ndai sara'ana ntuwu karawita, rawi ma ncara. Pala dou ma wati parana karawi ma ncara kai nggahi ra elina, sia dou ma sampuruna ma loa kuasakai sara'a sarumbuna.

³Nggara tausi b̄a ndai rante d̄i asa jara loakud̄u sia b̄atuna rakane'e b̄a ndai, ndad̄i ndai loa kantiri jara ede.

⁴Weha raupu kapa d̄i conto. Konena kapa eded̄u barang ma na'e ro wa'a b̄a angi ma na'e, pala sia ede nakantiriku b̄a kamudi ma ipi to'i, b̄atu rakane'e b̄a dou ma wa'ana.

⁵Ndede rau lab̄o rera ndaita; konena rera ndaita ede to'i, pala sia naloaku kasombo weki ma b̄oha lampa rawi ma na'e-na'e. Kananupu na'ipiku na'e ra lembona wub̄a naloaku ka'a b̄a afi ma to'i poda!

⁶Rera sama b̄une afi. D̄i sarumbu ndaita, sia ma ndad̄i fu'una rawi ma iha ra madab̄ae ma kariuna ruku ra rawi ma ihana d̄i samenana sarumbu ndai. Kai afi ma ramai rad̄i anaraka sia nakampangiku samenana mori ra woko ndaita.

⁷Sara'a pahu binata ma nggange, nasi, binata ma rama ro uta loaku d̄ikamau, ro wa'u raura kamau b̄a manusia.

⁸Pala rera manusia wati wa'u d̄ikamau kone b̄a sab̄ua dou rau. Rera ede nadab̄ae ro wati wa'u d̄i kuasakai b̄a dou; b̄ini b̄a racu d̄i madekai.

⁹ Ndai kanita d̄imarenta tarima kasi d̄i Ruma ro Ama ndaita, pala d̄imasumpana kai ma iha d̄i sasama manusia, ra wa'u kandad̄i b̄atu pahu Ruma Hatalla.

¹⁰D̄i asa ma sama losa nggahi ra eli tarima kasi ro nggahi ra eli ma sumpa ka'iha. Sapodakaina laina ndede!

¹¹Sab̄ua wara mada oi ma wontukai b̄a oi cab̄a ro oi ma pa'i d̄i mada oi ma sama?

¹²Fu'u ara, cina ra angiku, wati loana mbua wua zaitun, ro fu'u anggo wati loana mbua wua ara. Mada oi ma ndanga wati loa rauna kalosa oi ma cab̄a.

¹³Nggara warasi dou ma loa timba ra lemba, ro ma ntau ade ma taho d̄i wohamu, pab̄uaku sia katadana kai mori ma taho ro kai karawina lampa rawi ma taho, ma b̄atukai ka'awa weki ro loa timba ra lemba.

¹⁴Pala nggomid̄oho nggara ma wu'usi iha ademu, ro ma ka'ese mai weki ndaimu, aina kabanggakaimu timba ra lemba ede b̄ara ndedena nggomid̄oho marungkaku haba ma ncihi rad̄i Ruma Hatalla ndad̄i lai.

¹⁵Timba ra lemba b̄une ede wati ramaina ta saroga. Sia ramaina ta dunia, rad̄i nawasu manusia, ro rad̄i seta!

¹⁶Tab̄e warakai wu'u ro tabe'a ma kapenti weki ndai, ta ede rau wara ngango ra ngora ro sara'a pahu ruku ra rawi ma dab̄ae.

¹⁷Pala dou ma ntau timba ra lemba ma ramai ese mai, siaku ma saramba-ramba podakaina ma raso, edempara naca'u tahokai angi, kambera, ro nab̄atu nggahi. Sia b̄inikai b̄a kasi ade ro nakamaiku ruku ra rawi ma taho. Sia wati kalai-laina dou ro wati ca'una coro-coro.

¹⁸Poda taho ade eded̄u hasi rad̄i d̄ei dame rapari b̄a dou ma meci ra ca'u dame!