Read Bima YAKUB 4 Bible Online

YAKUB 4 - Bima bible

YAKUB 4

¹Ratab̄e maikaina sara'a ncao ro cence ncihi d̄i ade weki nggomid̄oho? Sab̄ua laina ede rad̄i ne'emu ma lewa ncau d̄i ade sarumbumu d̄i rakakaimu d̄ihi ade dunia!

²Nggomid̄oho ma ne'e, pala wati rakamu, ndad̄i nggomid̄oho ne'ekaimu hade dou! Nggomid̄oho kapodakai ademu, pala wati wa'umu raka au rangupamu, ndad̄i nggomid̄oho cence ncihi ro ncaomu. Nggomid̄oho wati rakamu au-au, b̄ara nggomid̄oho wati rahomu d̄i Ruma Hatalla.

³Ro nggara wa'ura raho b̄a nggomid̄oho, nggomid̄oho ngge'empa wati rakamu, b̄a makasu rahomu ncara; au raraho b̄a nggomid̄oho eded̄u d̄iru'u neokai ade ndai kesemu.

⁴Nggomid̄oho eded̄u dou ma wati to'a! Sab̄ua b̄ade b̄a nggomid̄oho b̄a one ma kasobasi angi lab̄o dunia, ndad̄i nggomid̄oho d̄imandad̄i musu Ruma Hatalla? Ndad̄i cou-cou ma ne'e ndad̄i soba angi lab̄o dunia ake, sia kandad̄ina weki ndaina musu Ruma Hatalla.

⁵Aina kacaimu b̄a one Alkitab wati ntauna alasa ma nggahi, ”D̄i ade sarumbu ndai, Ruma Hatalla tohona Roh ma tera ne'ena.”

⁶ Konena ndede, Rahama Ruma Hatalla rambei d̄i ndai nancewi tenggo ntewi kaisi rakane'e roh ndai ede. B̄ara ndedena d̄i ade Alkitab ratunti rau, ”Ruma Hatalla wati ca'una d̄i dou ma sombo, pala ndede walija Sia nameci ra ca'uku d̄i dou ma ka'awa weki.”

⁷B̄ara ndedena, okopu d̄i Ruma Hatalla ro aopu d̄i Ibilis, ndad̄i Ibilis nasuru d̄i nggomid̄oho.

⁸D̄eni lab̄opu Ruma Hatalla, ro Ruma Hatalla rau namai rakaku nggomid̄oho. Karasopu rimamu, nggomid̄oho ma wa'ura dosa! Ro karaso raupu ademu nggomid̄oho ma ncangga ade.

⁹Pab̄uapu nggomid̄oho poda-poda sinci ademu ro nangi ro d̄uru d̄ala; pab̄uapu harimu ndad̄i nangi ro neo ademu ndad̄i susa ade!

¹⁰Pab̄uapu nggomid̄oho ka'awa weki d̄i tando Ruma ndad̄i Ruma d̄imakad̄ese nggomid̄oho.

¹¹Cina ra angi aina cua-cua nuntu ka'iha angi atao cua-cua kancaramu angi. Dou ma nuntu ka'iha angi atao ma kancara angi ma sama-sama ela Al Masih, sia nakatuna ra kab̄awaku ro nakancaraku hukum Allah. Ro nggomid̄oho nggara ma kancarasi hukum Allah, ede aona nggomid̄oho wati b̄atumu hukum-hukum ede, malaisi ma ndad̄i hakimna.

¹²Sapodakaina sab̄ua mpoampa ma ntau hak ma mbei hukum d̄i manusia ro ma paresa ncihi ra ncara manusia. Eded̄u Ruma Hatalla ma ntau kuasa kasalama ro ma kaleli. Ndad̄i cousi nggomid̄oho, ndad̄ina ne'emu kancara d̄i sasamamu manusia?

¹³ Cina ra angi ma nggahi, ”Ainaina ake atao naisi nami d̄imalao aka kota hanu ro ngge'e ta aka samba'a ntoina d̄i dagakaimu ro d̄i ngupakaimu piti,” — ringa ra kade'epu ngoa ra tei kataho b̄a nahu ake.

¹⁴Au d̄imandad̄i d̄i ade mori ra wokomu naisi, ndai nggomid̄oho rau wati d̄imab̄adena! Nggomid̄oho b̄une ob̄u d̄i masamporompa d̄i'edamu, edempara mborana.

¹⁵Pab̄uapu nggomid̄oho nggahi ndakemu, ”Nggara kausi b̄a Ruma, nami d̄imamori ro ma karawi ake atao ede.”

¹⁶Pala ake nggomid̄oho ma sombo ro ma ca'u sala'i nuntu ra nggahi. Samenana nuntu ra nggahi rasala'i b̄une ede ncara.

¹⁷B̄ara ndedena, dou ma b̄ade au ma taho d̄i pab̄ua karawina, pala wati karawina, dou ede nadosa.