Read Bima YAKUB 5 Bible Online

YAKUB 5 - Bima bible

YAKUB 5

¹Cina ra angi, dou-dou mantau ra wara! Ringa ra kade'epu d̄i ngoa ra tei kataho b̄a nahu. Pab̄uapu nggomid̄oho nangimu ro d̄uru d̄ala b̄ara nggomid̄oho d̄ima'iu susa ra ncoki poda!

² Ntau ra waramu wa'ura mbai. Kani ra lombomu wa'ura ngaha b̄a ane.

³Masa ro salakamu wa'ura b̄onto b̄a roka; rokana d̄imandad̄i sakasi d̄ima'ao nggomid̄oho ro d̄imangaha kampoi sarumbumu b̄une afi. Nggomid̄oho wa'ura untu wi'imu ntau ra wara d̄i jamana ma ne'era nggori.

⁴ Nggomid̄oho wati colamu ufa dou-dou ma karawi d̄i omamu. Ake ringapu weta siad̄oho! Dou-dou ma kab̄oro hasi omamu, ma kanggica raho bantu ro kanggica siad̄oho wa'ura rongga d̄i fiko Ruma Hatalla, Ruma ma wancu na'e kuasa.

⁵Nggomid̄oho wa'ura mori heba ipi ro iumu caru iu d̄i dunia ake. Nggomid̄oho b̄une-b̄uneta wunga kampore sarumbu weki ndaimu d̄i ru'u ainaina sambelekai.

⁶Nggomid̄oho mahukum ro hademu dou-dou ma wati wara ncarana, ro siad̄oho wati aona nggomid̄oho.

⁷B̄ara ndedena, sabapu cina ra angiku, sampe maikai Ruma. Tiopu b̄uneku sabana dou ma kanggihi ma ngena sampe danana mbeina hasi ma ntau co'i d̄i sia. Kai saba sia ngenana ura oru horo ro'o haju ro ura oru b̄unga.

⁸Pab̄uapu nggomid̄oho lembo ade raumu ro kana'epu ade b̄ara ai naina maikai Ruma wa'ura d̄eni.

⁹Aina bada red̄e ro cua-cua kancara angi, loakud̄u nggomid̄oho wati hukum b̄a Ruma Hatalla. Kawarapu! Hakim wa'ura d̄eni, sadia ne'e mai.

¹⁰Cina ra angi, kawarapu nabi-nabi ma nuntu ra nggahi kai ngara Ruma. Siad̄oho nasaba ro lembo adena taha susa ra ncoki. Ndad̄i tiopu siad̄oho d̄i contomu.

¹¹ Siad̄oho d̄ipehekai taho ra ntika b̄ara siad̄oho lembo adena. Nggomid̄oho wa'ura ringamu ma b̄oha saba la Ayub, ro nggomid̄oho b̄ade rau, b̄uneku Ruma d̄i cumpukaina ma mbei bareka sia. B̄ara Ruma nawancuku kasi adena ro taho ade.

¹² Ma penti poda, eded̄u: Aina sumpa, nataho kai ngara langi, ro kai ngara dana, atao kai ngara au-au rau. Nggahimpa ”Io” nggara makasumu io, ro ”wati” nggara makasumu wati; loakud̄u nggomid̄oho aina b̄ab̄ukai hukum b̄a Ruma Hatalla.

¹³Nggara warasi d̄i ade weki nggomid̄oho ma wunga susa, pab̄uaku sia do'ana. Nggara warasi ma neo ade, pab̄uaku sia rawa roi ra wadina Ruma Hatalla.

¹⁴ Nggara warasi ma supu, pab̄uaku sia ouna dou-dou mana'ekai ela Ruma. Ro pab̄uaku dou-dou mana'ekai ela Ruma ede do'a weana dou ma supu ede ro borekaina mina kai ngara Ruma.

¹⁵Nggara do'a siad̄oho karonggasi kai imbi poda, Ruma d̄imakatahona dou ma supu ede, ro nakangampu weaku dosa-dosa ra wa'u karawina.

¹⁶B̄ara ndedena, pab̄uaku nggomid̄oho cua-cua mangaku rawi ncara ro cua-cua do'a kali cempe angi, loakud̄u nggomid̄oho kataho wea supumu. Do'a dou ma b̄atu rakane'e Ruma Hatalla, nantau kuasa ma na'e.

¹⁷ Elia sama-sama manusia b̄une ndaita. Sia do'a kapodana ade b̄ab̄aina b̄ua ura, ndad̄i ura rau wati londona santoi tolu mba'a ini wura.

¹⁸ Sawa'u b̄a ede sia sambea walina, edempara langi kalondona ura ndad̄i dana mbeina hasi rau.

¹⁹Cina ra angiku! Nggara warasi d̄i ade weki nggomid̄oho dou ma wati b̄atu ngoa ra tei Ruma Hatalla wali, edempara dou ma kalai kandad̄ina dou ede mbali d̄i Ruma Hatalla,

²⁰ kawarapu ayat ake: Dou ma kandad̄ina dou ma wunga karawi dosa, mbali rad̄i ncai ma ncara, dou ede nakasalamaku nawa dou ma dosa ede rad̄i made ro nakandad̄iku mboto dosa d̄i kangampu wea. Salam horoma nami, Yakub