Read Bima 1 PETRUS 1 Bible Online

1 PETRUS 1 - Bima bible

1 PETRUS 1

¹Cina ra angi ela rakad̄ale b̄a Ruma Hatalla, ma ngge'e d̄i dana ra rasa dou d̄i Pontus, Galatia, Kapadokia, Asia, ro Bitinia! Nahu, Petrus, rasu Ruma Isa Al Masih, mapamao raho-raho to'impa Ruma Hatalla mbeina bareka ro taho ra ntai d̄i nggomid̄oho kai maremba-remba. Nggomid̄oho rakad̄ale d̄imandad̄i ela Ruma Hatalla b̄une rania Ruma Hatalla Ama ndaita. Ro Roh Allah wa'ura kandad̄ina nggomid̄oho ela ma raso, d̄iru'u Ruma Hatalla mpoampa, loakud̄u nggomid̄oho to'amu d̄i Ruma Isa Al Masih ro d̄ikaraso b̄a ra'a-Na.

³Maira ndaita syuku d̄i Ruma Hatalla, Ama Ruma ndai Isa Al Masih! B̄ara rahama-Na ede, b̄ara ndedena Sia mbeina d̄i ndaita mori ma b̄ou, kai kamori mbalina Ruma Isa Al Masih rad̄i madena. Ake mbeina ndaita ne'emu ma tenggo poda.

⁴D̄ine'e b̄a ndai loakud̄u ntau bareka-bareka rasadia b̄a Ruma Hatalla d̄iru'u b̄a ela-Na, eded̄u bareka-bareka rawi'i-Na d̄i saroga, ndad̄ina wati loa d̄ima'iha, atao mandad̄i mbai atao donto.

⁵Sara'ana ede eded̄u d̄iru'umu, b̄ara nggomid̄oho imbi d̄i Ruma Hatalla. Ndad̄i nggomid̄oho d̄ijaga kai kuasa Ruma Hatalla loakud̄u nggomid̄oho tarimamu mori masalama ma wa'ura sadia d̄ikatada wakatu cumpukai jamana peade.

⁶B̄ara ndedena pab̄uapu nggomid̄oho kaneo ademu, konena ake d̄i ru'u samporo wakatu nggomid̄oho pab̄ua ndad̄i ncoki ademu b̄ara nggomid̄oho iumu mboto pahu coba'ana.

⁷D̄ine'ena eded̄u d̄i bukutikai sab̄ua nggomid̄oho poda-poda imbimu d̄i Ruma atao wati. Masa ma loa iha rau, d̄i'uji kai afi. Imbi nggomid̄oho eded̄u nancewi ntauna co'i ntewi kaisi masa, ndad̄i pab̄uaku d̄i'uji rau loakud̄u ndad̄i tenggo. Ro kai ndedena nggomid̄oho d̄iroi lab̄o d̄ilia ra horoma ro d̄ikad̄ese ra kantasa d̄i ainaina mai mbali kai Ruma Isa Al Masih.

⁸Nggomid̄oho mameci ra ca'u-Na, konena wakatu ntoina nggomid̄oho wati edamu Sia. Ro nggomid̄oho imbimu d̄i Sia konena wakatu ake nggomid̄oho wati edamu Sia. B̄ara ndedena nggomid̄oho neo ademu, ro iumu sana ade ma ipi poda ro wati loa d̄i nggahi wali.

⁹B̄ara d̄i ne'e b̄a imbimu wa'u raka, eded̄u kasalamakai sarumbu ra nawamu.

¹⁰Kasalama akeku ratio kab̄ae ro paresa b̄a nabi-nabi, ro siad̄oho makaronggana ranggahi b̄a Ruma mab̄oha bareka rambei b̄a Ruma Hatalla d̄i nggomid̄oho.

¹¹Siad̄oho tio kab̄aena b̄uneku ro b̄une aiku lampa rawi ede ndad̄ikaina, d̄i ne'e b̄a Roh Al Masih ma wara d̄i ade sarumbu siad̄oho. Wakatu ede Roh-Na mangoana d̄i siad̄oho mab̄oha susa ra ncoki-susa ra ncoki d̄ipab̄ua iu b̄a Al Masih ro mab̄oha D̄ese ra ntasa-Na ma b̄atuna sawa'u b̄a ede.

¹²D̄i nabi-nabi ede Ruma Hatalla mangoa b̄a one au rakarawi b̄a siad̄oho laina d̄iru'u paralu b̄a siad̄oho, malaisi d̄i paralu ndaimu; eded̄u lampa rawi-lampa rawi raringa kab̄ae b̄a nggomid̄oho wakatu ake rad̄i dou-dou mangoa ra kahaba Haba Mataho mab̄oha Ruma Isa Al Masih. Siad̄oho karonggana lampa rawi-lampa rawi ede d̄i nggomid̄oho kai kuasa Roh Allah ranggadu-Na rad̄i saroga. Kone mala'eka-mala'eka nane'e rauku b̄ade haba rangoa ra kahaba b̄a siad̄oho ede.

¹³B̄ara ndedena, pab̄uapu nggomid̄oho sadia ncau. Aina kabare ro ngena kapodapu d̄i bareka d̄imbeina d̄i nggomid̄oho wakatu Ruma Isa Al Masih maina peade.

¹⁴To'apu d̄i Ruma Hatalla, ro aina mori b̄atu rakane'emu ntoina, aipu wakatu nggomid̄oho watipu patamu Ruma Hatalla.

¹⁵Pala ndakeku, pab̄uapu nggomid̄oho raso d̄i ade samenana d̄i karawi b̄a nggomid̄oho, sama b̄une Ruma Hatalla ma ouna nggomid̄oho ede raso.

¹⁶ D̄i ade Alkitab ratunti, ”Pab̄uapu nggomi raso, b̄ara Nahu raso.”

¹⁷Nggomid̄oho pehemu Ruma Hatalla ede Ama wakatu nggomid̄oho sambeamu d̄i Sia. Ruma Hatalla edeku ma paresa ncihi ra ncara manusia mancihi ncao lab̄o ruku ra rawi cua-cua ndaina kai wati kab̄aena dou. B̄ara ndedena salama nggomid̄oho mbuipu d̄i ade dunia ake, pab̄uapu nggomid̄oho kad̄ese ra kantasamu Ruma Hatalla d̄i ade morimu.

¹⁸B̄ara nggomid̄oho mab̄adeku b̄a one nggomid̄oho wa'ura cola rad̄i cara morimu ma iha mpoa rarakamu rad̄i wa'i ra waromu laina kai barang ma loa iha lai rauna kai salaka ro masa,

¹⁹malaisi kai ra'a ma nggali, eded̄u ra'a Al Masih, ma sama b̄une ra'a ana jimba mawati sampu ra iha.

²⁰Al Masih rakad̄ale b̄a Ruma Hatalla sawatipu rakandad̄i dunia. Ro d̄i ainain-ainain cumpukai jamana ake, Sia maina d̄i dunia loakud̄u kasalamana nggomid̄oho.

²¹Kai ncai Siara nggomid̄oho imbimu d̄i Ruma Hatalla ma wa'ura kamori mbali Sia rad̄i madena lab̄o makad̄ese ra kantasa-Na. Ndad̄i, Ruma Hatallaku d̄i imbi kai b̄a nggomid̄oho ro d̄i Ruma Hatalla rauku nggomid̄oho wi'i kaimu weki.

²²B̄ara nggomid̄oho to'amu d̄i ngoa ra tei rad̄i Ruma Hatalla, ndad̄i nggomid̄oho karasomu weki ro nggomid̄oho meci ra ca'umu dou-dou masama imbimu kai rela ademu. B̄ara ndedena, pab̄uapu nggomid̄oho meci ra ca'umu d̄i sab̄ua lab̄o masab̄uana kai sapoda-poda ademu.

²³B̄ara kai ncai nggahi ra eli Ruma Hatalla ma mori ro ma ederahid̄i ede, nggomid̄oho wa'ura kandad̄ikaina manusia b̄ou ma laina ranggana b̄a manusia malaisi rad̄i Ama ma ederahid̄i.

²⁴ D̄i ade Alkitab ratunti ndake, ”Samenana ela manusia b̄une mpori, ro sara'a na'e ra ntoruna b̄une wunta mpori. Mpori male, wunta rauna nahoro;

²⁵pala nggahi ra eli Ruma nangge'empa santoi-ntoina.” Nggahi ra eli ede Haba Mataho ma wa'ura ngoa ra kahaba d̄i nggomid̄oho.