Read Bima 1 PETRUS 2 Bible Online

1 PETRUS 2 - Bima bible

1 PETRUS 2

¹B̄ara ndedena, pakipu rad̄i wekimu samenana ma dab̄ae; ai walina nuntu ra nggahi cowamu, ro aina coro-coro. Aina hiana ade, ro aina kab̄awa ra katunamu dou makalai.

²Pab̄uapu nggomid̄oho ndad̄imu b̄une ana dou to'i ma b̄oupura nggana, mane'e ncau susu maraso ma asali. Kai ndedena nggomid̄oho d̄imawoko ro d̄ikasalama.

³ D̄i ade Alkitab ratunti ndake, ”Nggomi wa'ura iu b̄a ndaimu na'ipiku tahona Ruma.”

⁴B̄ara ndedena, maipu d̄i Ruma. Sia b̄une wadu mori, wadu rapaki b̄a dou b̄ara rawi'ikai wati wara onena; pala rakad̄ale b̄a Ruma Hatalla kai wadu ma ntau co'i.

⁵Nggomid̄oho b̄une wadu-wadu ma mori. B̄ara ndedena pab̄uapu nggomid̄oho ngawamu d̄ikani d̄ikatu'ukai Bait Allah ma rohani. Kai ndedena nggomid̄oho d̄imandad̄i imam-imam, ma mori d̄iru'u Ruma Hatalla mpoampa, ro kai Ruma Isa Al Masih mad̄onggo ra mbeina d̄i Ruma Hatalla, koroba maraso ma ca'u b̄a ade Ruma Hatalla.

⁶ B̄ara d̄i ade Alkitab ratunti ndake, ”Nahu wa'ura kad̄aleku sab̄ua wadu mantau co'i, rawi'i b̄a Nahu d̄i Sion kai wadu mapenti poda; ro dou ma imbi d̄i Sia wati d̄ika'iha wea adena.”

⁷ Wadu ede na'ipi podaku ntauna co'i d̄iru'u b̄a nggomid̄oho ma imbi. Pala d̄iru'u b̄a dou-dou ma wati imbi, nahinaku b̄a ayat-ayat Alkitab ake, ”Wadu ma wati rakani b̄a dou-dou mataki tu'u uma ede palasi mandad̄i wadu mapenti poda,”

⁸ ro ”Edeku wadu ma kandad̄ina dou satunu, wadu ma kandad̄ina siad̄oho mbo'o.” Siad̄oho satununa b̄ara siad̄oho wati imbina d̄i nggahi ra eli Ruma Hatalla. Ndedeku mawa'ura katantu b̄a Ruma Hatalla mab̄oha siad̄oho.

⁹ Pala nggomid̄oho eded̄u bangsa rakad̄ale, imam-imam ma karawi wea sangaji, bangsa ma raso, d̄iru'u b̄a Ruma Hatalla mpoampa, ela ndai Ruma Hatalla. Ruma Hatalla makad̄ale nggomid̄oho ro ma'ou kalosa nggomid̄oho rad̄i ade marindikaina d̄i lu'ukai ade taroa-Na ma taroa poda, kai makasuna loakud̄u nggomid̄oho ngoa ra kahabamu haba mab̄oha ruku ra rawi-ruku ra rawi-Na ma heba poda.

¹⁰ Ntoina nggomid̄oho laina ela Ruma Hatalla, pala ake nggomid̄oho eded̄u ela Ruma Hatalla. Nggomid̄oho ntoina wati tarimamu rahama Ruma Hatalla, pala ake nggomid̄oho matarimaku rahama-Na.

¹¹Cina ra angi ma meci b̄a nahu! Nggomid̄oho eded̄u dou lai rasa ro dou mamai ngge'e samporo d̄i dunia ake. B̄ara ndedena nahu maraho poda-poda loakud̄u nggomid̄oho aina b̄atumu hawa nawasu manusia ma lewa ncau ao nawa ra sarumbu.

¹²Ruku ra rawimu d̄iwoha dou ma wati pata Ruma pab̄uapu taho poda, ndad̄ina siad̄oho nakafitinasi nggomid̄oho kai dou madab̄ae, siad̄oho pab̄uaku mangakuna ruku ra rawimu ma taho, ndad̄ina siad̄oho d̄imaroi ra wadina Ruma Hatalla wakatu ainaina maikai-Na.

¹³Kai ngara Ruma, pab̄uapu nggomid̄oho okomu d̄i sanikina makuasakai manusia: nataho d̄iru'u b̄a Kaisar ma ndad̄i dou makuasa ma penti poda,

¹⁴ro d̄iru'u b̄a gubernu raturukai b̄a Kaisar d̄imahukumna dou makarawi madab̄ae ro d̄imalia ra horoma dou ma karawi mataho.

¹⁵B̄ara ne'e b̄a Ruma Hatalla loakud̄u kai ruku ra rawi-ruku ra rawimu ma taho nggomid̄oho kapumu asa dou ma nuntu ra nggahi masampula.

¹⁶Pab̄uapu nggomid̄oho morimu kai dou mahori weki, pala aina kanimu hori wekimu ede d̄i b̄ontokaimu ruku ra rawimu madab̄ae, malaisi moripu kai ada Ruma Hatalla.

¹⁷Kaco'ipu d̄i samenana dou, meci ra ca'upu d̄i cina ra angimu masama ela Al Masih. Dahupu d̄i Ruma Hatalla, ro lia ra horomapu Kaisar.

¹⁸Cina ra angi ma ndad̄i ada, okopu d̄i rumamu kai lia ra horoma kapodapu; lai mpoana d̄i siad̄oho ma taho ade ro makambera, pala d̄i siad̄oho ma toku rau.

¹⁹Ruma Hatalla d̄imambei bareka d̄i nggomid̄oho, nggara nggomid̄oho b̄a kawaramu weki d̄i rakane'e Ruma Hatalla, sabamu d̄i ade susa ra ncoki ade rakarawi b̄a dou ma wati adi.

²⁰B̄ara auku ncewina nggarasi nggomid̄oho sabamu d̄i susa ra ncoki hukumana ma sapodakaina nggomid̄oho d̄imatangguna b̄ara ncaramu? Pala nggara nggomid̄oho kai sabamu wa'umu tanggu susa ra ncoki ma hinamu b̄ara karawimu ma ncihi, ndad̄i Ruma Hatalla mambeimu bareka.

²¹B̄ara ndedena Ruma Hatalla ouna nggomid̄oho. B̄ara ndai Al Masih wa'ura susa ra ncokina d̄iru'u b̄a nggomid̄oho, ro kai ede Sia mbeina d̄i nggomid̄oho sab̄ua conto, loakud̄u nggomid̄oho b̄atumu lampa-Na.

²² Sia watipu parana karawina dosa, ro wati parana kone sab̄ua dou rau maringana Sia nuntu ra nggahi cowa.

²³ Aipu Sia i'a ra b̄a'a b̄a dou, Sia wati i'a ra b̄a'a cepena. Wakatu Sia susa ra ncokina, Sia wati kadahuna; Sia d̄onggo mbeina parakara-Na d̄i Ruma Hatalla, Hakim ma adi ede.

²⁴ Ndai Al Masih matunduna dosa-dosa ndaita d̄i weki-Na ese haju salib, loakud̄u ndaita hori weki rad̄i kuasakai b̄a dosa, ro mori b̄atu rakane'e b̄a Ruma Hatalla. Suwu-suwu Al Masih ma katahona nggomid̄oho.

²⁵Ntoina nggomid̄oho b̄une jimba ma santuda, pala ake nggomid̄oho wa'ura wa'a mbali d̄imab̄atu Ompu jimba ro Masandaka nawa ra sarumbumu.