Read Bima 1 PETRUS 3 Bible Online

1 PETRUS 3 - Bima bible

1 PETRUS 3

¹ Ndede rau nggomid̄oho, wei-wei, pab̄uapu okomu d̄i rahimu loakud̄u nggara warasi d̄i woha siad̄oho ma wati imbi d̄i haba rad̄i Ruma Hatalla, ruku ra rawimu naloaku kandad̄i siad̄oho ndad̄i imbi. Ro wati paraluna nggomid̄oho nggahi au-au d̄i siad̄oho,

²b̄ara siad̄oho na'edaku ruku ra rawimu ma raso ro saleh.

³ Aina ntikamu ntika ta ari mpoana, b̄une misakai kantika honggo atao kanimu sinci ro jima, atao kakanimu kani ra lombo ma nggali-nggali co'i.

⁴Pala, pab̄uapu ntikamu rawontuna ta'ade mpidamu, ruku ra rawimu mapu ra ntika; edeku ntika ma'ederahid̄i ma ipi ntau co'i kai ntanda b̄a Ruma Hatalla.

⁵Kai cara akeku aipu jamana ma'ulu dou-dou siwe mantau agama ma wi'i weki d̄i Ruma Hatalla makantika weki kai to'ana d̄i rahi siad̄oho.

⁶ La Sara ndede rau, sia nato'a d̄i la Ibrahim ro ouna sia rumana. Nggomid̄oho ake eded̄u ana-ana la Sara, nggara karawisi b̄a nggomid̄oho lampa rawi-lampa rawi ma taho ro wati dahumu d̄i au-au rau.

⁷ Ro nggomid̄oho rau, rahi-rahi, pab̄uapu b̄ini b̄a mori maloa ka'ao d̄i weimu, ro kai kawara wekimu b̄a one siad̄oho kalompo ma mapu ra rome. Karawipu d̄i siad̄oho kai lia ra horomapu, b̄ara siad̄oho sama-sama lab̄o nggomid̄oho, d̄imatarima ao bareka mori ma sapodakaina rad̄i Ruma Hatalla. Karawipu ake, loakud̄u wati wara ma tapana do'amu.

⁸Kanggorikai nggahi eded̄u: pab̄uapu nggomid̄oho kasab̄ua nggahi ro kasab̄ua iumu. Pab̄uapu nggomid̄oho cua-cua meci ra ca'u angi b̄une dou-dou ma sa'e ra ari. Ro pab̄uapu nggomid̄oho cua-cua kasi ade angi ro ka'awa weki.

⁹Aina cepemu rawi ma'iha kai rawi ma'iha wali, atao i'a ra b̄a'a kai i'a ra b̄a'a; pala cepekaipu kai rahomu bareka d̄i Ruma Hatalla. B̄ara Ruma Hatalla ma'ouna nggomid̄oho justru loakud̄u nggomid̄oho tarimamu bareka rad̄i Sia.

¹⁰ D̄i ade Alkitab ratunti ndake, ”Dou ma ne'e iu mori ro mane'e iu ainain-ainain ma taho, pab̄uaku sandaka asana loakud̄u wati nuntu ra nggahina lampa rawi-lampa rawi ma dab̄ae ro wati rentana lampa rawi ma cowa.

¹¹Sia pab̄uaku kad̄o'ona weki rad̄i lampa rawi ma dab̄ae ro karawi ma taho; pab̄uapu sia karawi kapodana d̄i rakakaina dame.

¹²B̄ara Ruma maca'u tio dou-dou ma b̄atu rakane'e-Na, ro Ruma makade'e ncau do'a-do'a siad̄oho; pala Ruma ma'aona dou-dou ma karawi ma'iha.”

¹³Cou ma ne'e karawi madab̄ae d̄i nggomid̄oho, nggarasi nggomid̄oho maca'u karawi mataho?

¹⁴ Pala nggomid̄oho konemu pab̄ua susa ra ncoki b̄ara karawimu lampa rawi-lampa rawi ma taho, nggomid̄oho malabaku! Aina dahu d̄i cou-cou rau, ro aina darura ademu.

¹⁵Pala d̄ei ademu, pab̄uapu nggomid̄oho mbeimu d̄i Al Masih lia ra horoma ma lai ndaina mancihi ncao lab̄o dohokai-Na kai Ruma kaina. Ro pab̄uapu nggomid̄oho sadia ncau d̄i cambekaimu d̄i sanikina dou ma sod̄i mab̄oha ne'emu ma wara d̄i nggomid̄oho.

¹⁶Pala karawipu ede kai mapu nggahi ra eli ro horoma. Ro pab̄uapu ade mpidamu maraso, loakud̄u kafitinasi b̄a dou b̄ara nggomid̄oho morimu kai mataho kai b̄atumu Al Masih, ndad̄i dou ma fitinamu d̄imandad̄i maja ndaina.

¹⁷Nancewi tahopu susa ra ncoki b̄a karawi mataho — nggara ede rakane'e b̄a Ruma Hatalla — ntewi kaisi susa ra ncoki b̄a karawi ma dab̄ae.

¹⁸B̄ara ndai Al Masih madena sakalimpa, ru'u santoi-ntoina b̄ara dosa manusia — sab̄ua dou ma wati wara ncara, made d̄i ru'u b̄a dou ma ncara. Karawi kai b̄a Al Masih ede loakud̄u Sia lao d̄ende ra wa'a nggomid̄oho d̄i Ruma Hatalla. Sia rahade kai sarumbu kasana, pala rakamori mbali sacara ade rohani.

¹⁹D̄i ade ka'ada'ana roh Sia lao ngoa ra kahabana haba ma ramai ta Ruma Hatalla d̄i roh-roh rabui:

²⁰ eded̄u roh dou-dou ma wati to'a d̄i Ruma Hatalla aipu jamana la Nuh. Aipu wakatu ede Ruma Hatalla ngenana kai saba santoi la Nuh ndawina kapa. Dou-dou ma wara d̄i kapampa — sara'ana waru dou — rakasalama rad̄i mbere na'e ede.

²¹Ma ndad̄i ede eded̄u ibarakai rad̄i kandeu karaso ma wakatu ake makasalamana nggomid̄oho. Kandeu karaso ake laina sab̄ua upacara karaso sarumbu kai oi rad̄i samenana ma sampu-sampu, malaisi pahu sakemu d̄i Ruma Hatalla rad̄i ade mpidamu ma taho. Kandeu karaso ede makasab̄uana nggomid̄oho lab̄o Ruma, kasab̄ua weki ede makasalamana nggomid̄oho b̄ara Ruma Isa Al Masih mawa'ura mori mbali rad̄i madena,

²²ro wa'ura ne'e ese saroga. Ake Sia makuasa sama-sama lab̄o Ruma Hatalla ro maparenta sara'a mala'eka, ro sara'a makuasa ro sara'a tenggo ra wale.