Read Bima 1 PETRUS 4 Bible Online

1 PETRUS 4 - Bima bible

1 PETRUS 4

¹B̄ara Al Masih wa'ura susa ra ncoki kai sarumbu kasa, nggomid̄oho rau pab̄uaku katenggo weki ndaimu kai nentimu b̄une ede. B̄ara dou ma susa ra ncoki kai sarumbu, wati wali karawina dosa.

²B̄ara ndedena, pab̄uapu nggomid̄oho mori d̄iru'u makento d̄i dunia ake b̄atu rakane'e b̄a Ruma Hatalla, ro laina rakane'e b̄a manusia.

³Aipu wakatu ntoina, nggomid̄oho wa'ura ntoi poda karawimu au raca'u karawi b̄a dou-dou ma wati pata Ruma. Mori nggomid̄oho wati tahona. Nggomid̄oho b̄atu hawa nawasumu, mawu, ndiha ra ndano, nono d̄i mawukai ro nembamu berhala kai ni'i poda kai ade.

⁴Ake dou ma wati pata Ruma, mbora akana b̄a one nggomid̄oho wati b̄atumu mori b̄une siad̄oho, iu dosa kai wati wara makahampana. B̄ara ndedena siad̄oho kab̄awa ra katunana nggomid̄oho.

⁵Pala siad̄oho peasi pab̄uaku mbeina su'u ra tundu d̄i Ruma Hatalla ma wa'ura sadia d̄ima'adina dou ma mori ro dou ma made.

⁶B̄ara ndedena Haba Mataho wa'ura ngoa ra kahaba rau d̄i dou-dou mamade. Aona loakud̄u siad̄oho, ma wa'ura adi d̄i ade ka'ada'ana sarumbu kasa — b̄une sara'ana dou d̄i'adi — loa mori kai rohani, b̄atu rakane'e b̄a Ruma Hatalla.

⁷Sara'ana au-au wa'ura d̄eni d̄inggorikaina, b̄ara ndedena pab̄uaku nggomid̄oho kawara weki ro aina kabare, loakud̄u nggomid̄oho loa sambea.

⁸ Nancewi d̄i ade sara'ana, pab̄uapu nggomid̄oho poda-poda meci ra ca'umu d̄imasab̄ua lab̄o masab̄uana, b̄ara kai meci ra ca'u nggomid̄oho mangawa rauku cua-cua kangampu angi.

⁹Pab̄uapu nggomid̄oho tarimamu sab̄ua lab̄o masab̄uana d̄i cua-cua uma ndaimu, kai wati wetamu.

¹⁰Nggomid̄oho wa'ura cua-cua tarimamu bareka rambei ma cua lai rad̄i Ruma Hatalla. B̄ara ndedena kai dou makarawi ma taho au-au rambei b̄a Ruma Hatalla, pab̄uapu nggomid̄oho kanimu tenggo ra wale ede d̄iru'u paralu sama.

¹¹Dou ma wa'a haba, pab̄uaku karonggana haba rad̄i Ruma Hatalla; dou ma karawi wea d̄iru'u b̄a dou makalai, pab̄uaku karawina kai tenggo ra wale ma ramai ta Ruma Hatalla, loakud̄u d̄i ade samenana lampa rawi, Ruma Hatalla loa d̄ikad̄ese ra kantasa kai ncai Ruma Isa Al Masih. Siaku ma ntau kuasa ro patu d̄ikad̄ese ra kantasa ru'u santoi-ntoina. Amin.

¹²Cina ra angi meci b̄a nahu! Nggomid̄oho ake mawancu ipiku susa ra ncokimu b̄ara wunga d̄i'uji. Pala aina mbora akamu, b̄une-b̄uneta wara au-au ma heba poda mandad̄i d̄i nggomid̄oho.

¹³Mala, pab̄uapu nggomid̄oho iu sana b̄ara b̄atumu susa ra ncoki sama lab̄omu Al Masih. Ndad̄i peasi nggara d̄ese ra ntasa Al Masih d̄ikatada, nggomid̄oho d̄imaneo ade.

¹⁴Nggomid̄oho malabaku nggarasi nggomid̄oho kab̄awa ra katuna b̄ara nggomid̄oho dou mab̄atu Al Masih. Ede aona Roh ma d̄ese ra ntasa, eded̄u Roh Allah, wara d̄i nggomid̄oho.

¹⁵Aina kone sab̄ua dou rau rad̄i woha nggomid̄oho masusa ra ncoki b̄ara sia hadena dou, atao mpangana, atao dou madab̄ae, atao b̄ara sia kalu'una weki ade ruku ra rawi dou makalai.

¹⁶Pala nggarasi nggomid̄oho susa ra ncokimu b̄ara nggomid̄oho ela Al Masih, aina majamu b̄ara lampa rawi ede. Tarima kasipu d̄i Ruma Hatalla, b̄a one nggomid̄oho wa'amu ngara Al Masih.

¹⁷Wa'ura raka wakatuna Ruma Hatalla adina dunia. Ro ela ndai Ruma Hatalla d̄i'adi uluna. Nggara Ruma Hatalla tampu'una lab̄o ndai, b̄uneku ndad̄ina peade lab̄o dou-dou ma wati imbi d̄i Haba Mataho ma ramai ta Ruma Hatalla ede?

¹⁸ D̄i ade Alkitab ratunti ndake, ”Nggara dou-dou ma taho rau wa'ura nggonggi d̄i kasalama wea, au waliku d̄imandad̄i lab̄o dou-dou madosa ma wati pata Ruma!”

¹⁹B̄ara ndedena, nggara warasi dou-dou ma susa ra ncoki b̄ara Ruma Hatalla mane'e b̄une ede, pab̄uaku dou-dou ede mori kai mataho ro imbikai wekina d̄i Marakandad̄ina siad̄oho. Sia d̄imambei ncauna rasake-Na.