Read Bima 1 PETRUS 5 Bible Online

1 PETRUS 5 - Bima bible

1 PETRUS 5

¹Nahu maraho d̄i dou-dou mana'ekai elamu loakud̄u siad̄oho kade'e kab̄aena. Nahu tuntiku ake kai sama-sama mana'ekaina ro kai dou ma wa'ura eda mada susa ra ncoki Al Masih, ro d̄imab̄atu d̄ikad̄ese ra kantasa rau, nggara d̄ese ra ntasa Al Masih d̄ikatada d̄i manusia. Nahu maraho kai poda-poda

² loakud̄u nggomid̄oho ma d̄ende ra wa'ana kalompo jimba rambei b̄a Ruma Hatalla d̄i nggomid̄oho. D̄ende ra wa'apu siad̄oho kai ademu masana b̄une rakane'e b̄a Ruma Hatalla, ro aina kai tani ademu. Ai rauna kalampamu rawi d̄irakakaimu laba, malaisi b̄ara nggomid̄oho poda-poda ne'emu karawi.

³Aina karawimu kai dou makuasa d̄i siad̄oho ra'imbikai d̄i nggomid̄oho, malaisi ndad̄ipu conto d̄iru'u b̄a siad̄oho.

⁴Ro wakatu Ompu Jimba Mad̄ese Ra Ntasa ede maina peade, nggomid̄oho d̄imatarima songko sangaji ma ntika, ma wati d̄imambora ntikana.

⁵ Ndede rauku nggomid̄oho, dou-dou mambuipu umu to'i. Okopu d̄i dou-dou ma tua. Nggomid̄oho sara'ana pab̄uapu ka'awa weki ro karawi kali cempe angi kai awa weki. B̄ara ade Alkitab ratunti ndake, ”Ruma Hatalla madaca'u dou ma sombo, pala nakasikaiku ade d̄i dou ma ka'awa weki.”

⁶ B̄ara ndedena, ka'awapu wekimu ta awa rima Ruma Hatalla ma tenggo, loakud̄u Sia ked̄esena nggomid̄oho nggara rakasi wakatuna.

⁷D̄onggopu samenana darura ademu d̄i Ruma Hatalla, b̄ara Sia makandad̄i nggomid̄oho.

⁸Pab̄uapu nggomid̄oho aina kabare ro sadia ncaupu! B̄ara Ibilis eded̄u musumu. Sia b̄une singa malampa rero kai eli mana'e mangupa d̄i ne'ena ngaha.

⁹Aopu sia kai imbimu ma tenggo, b̄ara nggomid̄oho mab̄adeku b̄a one cina ra angi masama-sama ela Al Masih makalaina d̄i sara'a dunia nasusa ra ncoki rauku b̄une nggomid̄oho.

¹⁰Pala sawa'u b̄a susa ra ncoki nggomid̄oho samporo, ndai Ruma Hatalla d̄imakandad̄ina nggomid̄oho mpuruna. Sia d̄imakampendena ro makatenggona nggomid̄oho ro d̄imakatenggo poda-poda nggomid̄oho. B̄ara Sia eded̄u Ruma Hatalla ma wancu taho poda ade, ma wa'ura ou nggomid̄oho d̄imab̄atu iu d̄ese ra ntasa-Na ma ederahid̄i kai ncai Al Masih.

¹¹Siaku ma kuasa sampe santoi-ntoina! Amin.

¹² Sura nahu ma poro ake tunti b̄a nahu d̄iru'u b̄a nggomid̄oho kai bantu b̄a la Silas, rawi'ikai b̄a nahu cinaku ma'ela Al Masih ma to'a. Nahu makau kapoda ade d̄i nggomid̄oho ro maka'imbina nggomid̄oho b̄a one au ratunti b̄a nahu ake haba ma poda mab̄oha rahama Ruma Hatalla. Pab̄uapu nggomid̄oho nenti katenggo d̄i rahama ede.

¹³ Lenga-lenga sama-sama ela Ruma d̄i Babilon, rakad̄ale rau b̄a Ruma Hatalla, nggaduna salam d̄iru'u b̄a nggomid̄oho; ndede rau ana meci ra ca'u b̄a nahu la Markus.

¹⁴Cua-cua salampu sab̄ua lab̄o sab̄ua kai b̄ini b̄a meci ra ca'u kai cina ra angi ela Al Masih. Raho-raho to'impa Ruma mambei taho ra ntai d̄i nggomid̄oho sara'ana ma ndad̄i ntau Al Masih. Salam do'a nami, Petrus