Read Bima 2 PETRUS 1 Bible Online

2 PETRUS 1 - Bima bible

2 PETRUS 1

¹Cina ra angi ma poda-poda imbi b̄une nami! Ruma Isa Al Masih, eded̄u Ruma Hatalla ro Sangaji Makasalama ndaita, makaloana ndai imbi d̄i Sia, b̄ara Sia makarawi ma ncihi. Sura ake rad̄i la Simon Petrus, sab̄ua dou ada ro rasu Ruma Isa Al Masih.

²Raho-raho to'impa Ruma Hatalla mbeina bareka ro taho ra ntai maremba-remba d̄i nggomid̄oho, b̄ara nggomid̄oho mapataku Ruma Hatalla ro Isa Al Masih, Ruma ndaita.

³Ruma Hatalla wa'ura kanina kuasa ilahi-Na d̄i mbeikaina ndai samenana au d̄i paralu ru'u mori do'a ra sambeakai. Sia karawi ake kai ncai au rab̄ade b̄a ndai mab̄oha Ruma Isa Al Masih, ma wa'ura ou ndai d̄i iukai na'e ra ntoru ro taho-Na.

⁴Kai cara edeku Ruma Hatalla mbeina d̄i ndai bareka-bareka ma ipi heba poda ro mantau co'i ma wa'ura sake b̄a Sia. Kai bareka-bareka ede nggomid̄oho loakaimu hori weki rad̄i au rane'emu madab̄ae ma ka'ihana d̄i dunia ake, ro nggomid̄oho tarimamu tabe'a ilahi.

⁵B̄ara ndedena, usaha kapodapu loakud̄u nggomid̄oho ngge'empa imbimu d̄i Al Masih ro imbimu ede rarundu b̄a morimu ma taho. Ari mai b̄a mori ma taho, nggomid̄oho paralu ndad̄imu dou ma loa ra tingi,

⁶ro ari mai b̄a loa ra tingi, nggomid̄oho rau pab̄uapu loamu kuasa weki ndaimu. Ro ari mai b̄a kuasakai weki ndaimu pab̄ua raupu nggomid̄oho kangina weki d̄i sabakaimu satando samenana au-au. Ari mai b̄a lembo ade satandomu au-au, nggomid̄oho pab̄ua rau mori b̄une rakane'e b̄a Ruma Hatalla.

⁷Ro mori b̄une rakane'e b̄a Ruma Hatalla pab̄ua rauku d̄ikancihi kai meci ra ca'u d̄i cina ra angi masama-sama imbi. Sawa'u b̄a ede pab̄uapu meci ra ca'umu d̄i cina ra angi masama-sama imbi sala'i wali kai meci ra ca'u d̄i samenana dou.

⁸Samenana ede eded̄u tabe'a d̄i paralu b̄a nggomid̄oho. Nggara tabe'a-tabe'a ede warasi d̄i nggomid̄oho kai maremba poda, nggomid̄oho d̄imandad̄i caha ro d̄i wara hasina, ro mapataku Isa Al Masih Ruma ndaita kai ma ipi taho wali.

⁹Pala dou ma wati ntau tabe'a-tabe'a ede, ntanda ra edana natuka; sia wati loana eda ro sia nanefaku b̄a one dosa-dosana ntoina wa'ura karaso wea.

¹⁰B̄ara ndedena, cina ra angi, usaha kapoda walipu loakud̄u ra'ou b̄a Ruma Hatalla ro kad̄ale-Na d̄i ndaimu ede nandad̄i tenggo poda. Nggara karawisi b̄a nggomid̄oho ede, nggomid̄oho wati d̄imamurta.

¹¹Kai ndedena nggomid̄oho d̄i mbei hak ma b̄ini d̄ilu'ukaimu ade Karaja'an ma ederahid̄i rad̄i Ruma ro Sangaji Mambei salama ndai Ruma Isa Al Masih.

¹²B̄ara ndedena, nahu mangoa ra kawara ncau nggomid̄oho mab̄oha lampa rawi ede, konena wa'ura b̄ade b̄a nggomid̄oho ro imbi podamu d̄i ngoa ra tei rad̄i Ruma Hatalla ma wa'ura tarima b̄a nggomid̄oho ede.

¹³Salama nahu mbuipu moriku, nahu ma'iu weki pab̄uaku paraluna ngoa ra kawara nggomid̄oho mab̄oha d̄i lampa rawi ede.

¹⁴B̄ara nahu kab̄ade b̄a one watid̄u ntoi walina nahu d̄imatu'u wi'ina dunia ake, b̄ara Ruma ndai Isa Al Masih mawa'ura ngoa kab̄aena d̄i nahu.

¹⁵Ndad̄i nahu d̄ima'usahana loakud̄u sawa'u b̄a made nahu rau, nggomid̄oho makawara mbali ncauku lampa rawi ake.

¹⁶Aipu wakatu nami ngoamu d̄i nggomid̄oho na'ipiku d̄ese ra ntasana maikai Ruma ndai Isa Al Masih, nami wati wi'ikaimu weki d̄i mpama-mpama cowa manusia. D̄ese ra ntasa Al Masih ede wa'ura eda mada b̄a nami.

¹⁷ Nami waramu ta aka wakatu Sia lia ra horoma b̄a dou ro kad̄ese ra kantasa b̄a Ruma Hatalla Ama-Na. Aipu wakatu ede wara eli rad̄i Mawancu d̄ese ra ntasa, ma nggahi d̄i Sia, ”Akera Ana-Ku ma Meci ra ca'u b̄a Nahu. Sia makasanana ade Nahu!”

¹⁸Ndai nami maringana eli ede ma ramai ta Saroga wakatu nami waramu lab̄o Sia ese wawo doro ma raso ede.

¹⁹B̄ara ndedena nami naha imbi walimu d̄i rangoa wi'i b̄a Ruma Hatalla rangoa ra kahaba b̄a nabi-nabi. Natahopu nggomid̄oho ringa ra kade'e kab̄aepu rangoa ede, b̄ara rangoa ede b̄une ilo ma kalea d̄i hid̄i marindi sampe wontu liro, ro taroa b̄ombo b̄ala makalea d̄i'ademu.

²⁰Ma penti poda pab̄uapu nggomid̄oho kawaramu ake: Rangoa wi'i b̄a Ruma Hatalla rakarongga b̄a nabi-nabi wati loamu nggahi kira-kira kai kananu ndaimu.

²¹B̄ara, wati parana rangoa wi'i b̄a Ruma Hatalla d̄i ngoa ra kahaba kai rakane'e manusia mpoa. Pala Roh Allah makuasakaina dou d̄imakaronggana rangoa wi'i b̄a ndai Ruma Hatalla.