Read Bima 2 PETRUS 2 Bible Online

2 PETRUS 2 - Bima bible

2 PETRUS 2

¹D̄i jamana ma uluna d̄i ade woha ela Ruma Hatalla wa'ura wontu guru-guru palasu. Ndede rauku d̄iwoha nggomid̄oho d̄imawontu guru-guru palasu. Siad̄oho d̄imakalu'u ngoa ra tei ma wati poda, ma kalelina dou. Ro siad̄oho wati d̄imamangaku Makuasa ma wa'ura hori weana siad̄oho. Kai ndedena siad̄oho kamaina d̄i iha lelikai d̄i weki ndaina, d̄imab̄oha roci siad̄oho.

²Kone ade ndedekaina, mboto dou d̄imab̄atu cara mori guru-guru palasu ede rakuasakai b̄a hawa nawasu siad̄oho. Ro ruku ra rawi guru-guru ede d̄imakandad̄ina dou mamboto makab̄awa ra katuna Ncai Mapoda ma lao aka Ruma Hatalla.

³B̄ara siad̄oho na'e adena, ndad̄i guru-guru palasu ede d̄i macaritana d̄i nggomid̄oho carita-carita randawi b̄a ndaina d̄irakakaina laba d̄i nggomid̄oho. Pala pangadila d̄imab̄ab̄una hukuma ru'u b̄a siad̄oho wa'ura ntoi rasadia, ro iha leli ma wa'ura katantu d̄iru'u b̄a siad̄oho wunga ngenana siad̄oho.

⁴Mala'eka-mala'eka ma dosa rau wati d̄ico'o b̄a Ruma Hatalla hori weki rad̄i hukuma, malaisi d̄ipaki ade anaraka. Siad̄oho d̄i kalu'u ade dembi ma rindi d̄ibui ta aka sampe Ainaina Pengadila.

⁵ Ndede rauku lab̄o dunia jamana ma'ulu, Ruma Hatalla wati co'ona hori weki rad̄i hukuma. Ruma Hatalla nggaduna mbere na'e d̄i dunia dou-dou ma dab̄ae aipu wakatu ede. La Nuh mpoampa lab̄o pidu dou makalaina rakasalama, b̄ara la Nuh mangoa ra kahabana mab̄oha mori rakane'e b̄a Ruma Hatalla.

⁶ Sama rau lab̄o b̄une kota Sodom ro Gomora: Ruma Hatalla makalelina kota-kota ede kai afi loakud̄u ndad̄i conto mab̄oha au d̄imandad̄i lab̄o dou-dou ma dab̄ae.

⁷ Pala la Lot rakasalama wea, b̄ara sia b̄atuna rakane'e Ruma Hatalla; sia nawancuku susa ra ncokina b̄ara ruku ra rawi ma iha rad̄i dou-dou madab̄ae.

⁸D̄i ade woha dou-dou b̄une ede la Lot ma taho ede mori kai ade mpidana mancoki, b̄ara saniki ainaina sia eda ro ringana ruku ra rawi siad̄oho ma dab̄ae.

⁹Ndad̄i, Ruma nab̄ade b̄uneku d̄i kasalamakai dou-dou ma b̄atu rakane'e-Na nggara nasatandosi b̄a siad̄oho coba'a-coba'ana. Ro Ruma nab̄ade b̄uneku toho wi'i dou-dou ma dab̄ae d̄ikancoki wakatu Ainain Pengadilana,

¹⁰d̄iru'u b̄a dou-dou ma b̄atu rakane'e hawa nawasu siad̄oho ma sampu ro ma kab̄awa ra katuna kuasakai Ruma Hatalla. Ndede disa lab̄o sombona guru-guru palasu ede ndad̄ina siad̄oho wati dahuna kab̄awa ra katunana mahluk-mahluk ma d̄ese ra ntasa d̄i saroga rau!

¹¹Kone mala'eka-mala'eka ma d̄o'o ncewi tenggo ro makuasa ntewi kaisi lab̄o guru-guru palasu ede, wati b̄ab̄u ra lo'ona mahluk-mahluk ma d̄ese ra ntasa ede kai nggahi ra eli makab̄awa ra katuna d̄itando Ruma.

¹² Pala guru-guru ede, heba poda! Siad̄oho b̄une binata ma nggana d̄iwa'u ro d̄ihadempa. Siad̄oho wati kananuna, pala karawina b̄atu rakane'ena, ndad̄ina siad̄oho deina lampa rawi-lampa rawi ma wati loana ka'ao kai nggahi ra eli makab̄awa ra katuna. B̄ara ndedena b̄a ruku ra rawi ndai siad̄oho, siad̄oho d̄imaleli b̄une binata-binata manggange.

¹³Kai ufa rad̄i susa ra ncoki rakandad̄i b̄a siad̄oho, siad̄oho d̄imasusa ra ncoki poda iu. D̄i ru'u b̄a siad̄oho, lampa rawi ma kasana ade eded̄u karawi au-au d̄i aimarai d̄ikancihikai rakane'e b̄a sarumbu siad̄oho. Nggarasi siad̄oho doho samana lab̄o nggomid̄oho d̄i ade ngaha ndihakai, ruku ra rawi siad̄oho ni'ikai b̄a ademu b̄ara siad̄oho mawuna kai hawa nawasuna.

¹⁴Siad̄oho wati mawu-mawuna karawi dosa, ro d̄i ca'u b̄a siad̄oho eded̄u ntanda dou siwe masampu ra nggele. Ro dou ma b̄oupu imbi ro mbuipu kura imbina, siwi b̄a siad̄oho. Ade siad̄oho wa'ura biasana kai na'e ade. Siad̄oho eded̄u dou-dou rab̄a'a b̄a Ruma!

¹⁵B̄ara siad̄oho wati ngawana b̄atu ncai ma rombo, ndad̄i siad̄oho santudana. Siad̄oho wehana ncai rab̄atukai b̄a la Bileam ana la Beor ntoina. La Bileam ake nane'e podaku raka piti rad̄i ruku ra rawina ma dab̄ae.

¹⁶Pala sia rakana ngoa ra kawara ma ipi rad̄i ruku ra rawina madab̄ae ede, wakatu keledaina manuntu kai eli manusia. Ndad̄i nabi ede d̄ipakasa d̄i denggakaina ruku ra rawina ma ringu ede.

¹⁷Guru-guru palasu ede eded̄u b̄une mada oi ma mango ro b̄une apu ra'ufi b̄a angi na'e. Ruma Hatalla wa'ura sadiana d̄i ru'u b̄a siad̄oho sab̄ua hid̄i ma ipi rindi.

¹⁸Siad̄oho rentana nggahi ra eli ma ntika ro ntaru; nawasu ma dab̄ae d̄i kani b̄a siad̄oho d̄i kamab̄ukaina dou-dou ma b̄oupu tampu'u hori weki rad̄i kalompo dou ma mori santuda.

¹⁹Guru-guru palasu ede masakena hori weki d̄i dou-dou ede, sapodakaina ndai siad̄oho ka'ada b̄a ruku ra rawi rangina kai ma ka'ihana manusia. B̄ara dou nggara kakoasi b̄a au-au, ndad̄i sia ede ada rad̄i ma kakoana ede.

²⁰Dou ma pata Ruma ro Mambei salama ndai Ruma Isa Al Masih wa'ura hori weki rad̄i kuasa-kuasa dunia ma kadosana manusia. Pala sawa'u b̄a ede sia nggara hinasi b̄a goda ndad̄ina d̄ikakoa b̄a kuasa-kuasa ede, ndad̄i ka'ada'ana dou ede d̄i cumpukaina nancewi iha wali ntewi kaisi sawatipu b̄a ede.

²¹Natahopu dou-dou b̄une ede wati paranana pata ncai mancihi rad̄i Ruma Hatalla, nggara siad̄oho patana, pala sawa'u b̄a ede wati ngawana b̄atu parenta-parenta rambei b̄a Ruma Hatalla d̄i siad̄oho.

²² Au rakarawi b̄a siad̄oho mabukuti ncihina peribahasa ake, ”Lako d̄imangaha mbali au rawa'u ralohina,” ro ”Wawi ma rawa'u kandeu, d̄imandore mbali d̄i ade dana macompo.”