Read Bima 2 PETRUS 3 Bible Online

2 PETRUS 3 - Bima bible

2 PETRUS 3

¹Cina ra angi meci b̄a nahu! Akeku sura nahu makad̄uakaina d̄i nggomid̄oho. D̄i ade d̄ua mbua sura ake, nahu ma'usaha katu'u kananu ma raso d̄i nggomid̄oho.

²Nahu mangoa nggomid̄oho loakud̄u nggomid̄oho kawaramu d̄i nggahi ra eli ntoina rarenta b̄a nabi-nabi Ruma Hatalla, ro d̄i rakaukai b̄a Ruma, Sangaji Mambei salama, rakarongga d̄i nggomid̄oho b̄a rasu-rasu.

³ Masaramba-rambana, nggomid̄oho pab̄uapu b̄ade b̄a one d̄i ainaina macumpukaina, d̄imawontu dou-dou ma mori ra wokona rakuasakai b̄a hawa nawasu ndai siad̄oho. Siad̄oho d̄imakasungge-sungge nggomid̄oho

⁴kai nggahi ndakena, ”Nggahina Ruma sakena d̄imamai! Ake b̄eku Sia? Ama-ama wa'i ra waro ndai wa'ura made, pala samenana au-au mbuipu sama b̄une ra'aipu kandad̄i isi dunia!”

⁵ Siad̄oho nasangajaku wati ngawana mangaku b̄a one ntoi podana Ruma Hatalla kandad̄ina langi ra dana kai nggahi ra eli-Na. Dana rakandad̄i-Na rad̄i oi, ro kai oi;

⁶ ro kai oi rau — eded̄u oi rad̄i mbere na'e — dunia mantoi ede kalelina.

⁷Pala langi ra dana ma wara ake, rasandaka b̄a nggahi ra eli Ruma Hatalla ede rau d̄ikaleli kai afi peade. Ake langi ro dana mbuipu d̄isandaka sampe d̄i ainaina dou-dou ma dab̄ae d̄ihukum ro d̄ikaleli.

⁸ Pala cina ra angiku, sab̄ua lampa rawi ake aina nefakai b̄a nggomid̄oho: b̄a one ade eda rantanda b̄a Ruma, sanaiwati wara laina lab̄o sariwu mba'a — d̄ua-d̄uana samampa d̄itando Sia.

⁹Ruma wati ngerina mbei au rasake-Na konena wara ma kacai ndedena. Pala, Sia nasabaku d̄i nggomid̄oho, b̄ara Sia wati ne'ena kone sab̄ua dou rau d̄imaleli. Sia nane'eku loakud̄u samenana dou toba rad̄i dosa-dosana.

¹⁰ Pala Ainaina maikai Ruma d̄imamai b̄une dou mampanga. D̄i Ainaina ede langi d̄imambora lab̄o eli kambimbi, ro sara'a mawara ese langi d̄imangga'a leli, ro dunia lab̄o sara'a ma wara tad̄eina d̄imambora.

¹¹B̄ara sara'ana ede d̄ikaleli kai cara b̄une ede, b̄uneku sapodakaina nggomid̄oho morimu? Nggomid̄oho pab̄uapu mori maraso d̄iru'u Ruma Hatalla mpoampa,

¹²santoi nggomid̄oho ngenamu ro ne'e poda ademu wontu maina Ainaina Ruma Hatalla. D̄i Ainaina ede langi d̄imangga'a cumpu, ro b̄ara panana, ndad̄i sara'a mawara d̄ilangi d̄imaleli.

¹³ Pala ndai tangenaku au ramawa'u sake b̄a Ruma Hatalla, eded̄u langi ma b̄ou ro dunia ma b̄ou, tab̄era warakai keadilana.

¹⁴B̄ara ndedena, cina ra angi meci b̄a nahu, wunga mbuipu ngena b̄a nggomid̄oho Ainaina ede, usaha kapodapu d̄i mori maraso ro kai wati wara kone ma'iha d̄itando Ruma Hatalla. Ro jagapu hubunga ma taho lab̄o Ruma Hatalla.

¹⁵Wi'ikaipu saba Ruma ndai kai wakatu rambei-Na d̄i nggomid̄oho loakud̄u salama. La Paulus, cina meci b̄a ndaita, wa'ura tuntina b̄une ede rau d̄i nggomid̄oho. Sia tuntina ede kai loa timba ra lemba rambei b̄a Ruma Hatalla d̄i sia.

¹⁶D̄i ade samenana surana, la Paulus natunti ncauku mab̄oha lampa rawi ede. Wara romo pila-pila mbua lampa rawi ma nggonggi d̄i loa ka'ao d̄i ade sura-surana ede. Ro ru'u ma'ede rarungka-rungka b̄a dou-dou ma wati b̄ade au-au lab̄o ma wati tenggo imbina. Lampa rawi ede wati mbora kai aka, b̄a one isi makalaina d̄i ade Alkitab rakarawi kandede rau b̄a siad̄oho. Au rakarawi b̄a siad̄oho ede nakandad̄impa iha leli ndai siad̄oho.

¹⁷Pala nggomid̄oho, cina ra angi meci b̄a nahu, wa'ura b̄ademu mab̄oha lampa rawi ede. B̄ara ndedena, aina kabare, ai to'ina nggomid̄oho b̄atumu d̄i ade santuda kai dou-dou madab̄ae ndad̄ina nggomid̄oho mab̄umu rad̄i hid̄i kid̄imu ma tenggo.

¹⁸Pab̄uapu nggomid̄oho naha iumu anugera Ruma Isa Al Masih, Ruma ro Sangaji Mambei salama ndaita, ro pab̄uapu nggomid̄oho rau naha patamu Sia. D̄ese ra ntasara Sia, ake sampe santoi-ntoina! Amin. Salam do'a nami, Petrus