Read Bima 1 YAHYA 1 Bible Online

1 YAHYA 1 - Bima bible

1 YAHYA 1

¹ Isi sura ake mab̄oha Nggahi Ra Eli ma mbei mori, eded̄u Nggahi Ra Eli Ruma Hatalla ma wa'ura wara ra'aipu saramba wa'una. Nami wa'ura ringamu, ro wa'ura eda mada b̄a ndaimu. Nami wa'ura edamu, ro wa'ura nenti b̄a nami.

² Wakatu mori ede d̄ikatada, nami edamu. B̄ara ndedena nami mbeimu sakasi mab̄oha ede. Nami ngoa ra kahabamu d̄i nggomid̄oho mab̄oha mori masapodakaina ro ma'ederahid̄i, ma wara sama lab̄o Ama, ro ma wa'ura katadana d̄i nami.

³Au ma wa'ura eda ro ringa b̄a nami, ede rauku d̄ingoa ra kahaba b̄a nami d̄i nggomid̄oho, loakud̄u nggomid̄oho lab̄o nami b̄atu kananu mori sab̄ua lab̄o Ama ro lab̄o Ana-Na Ruma Isa Al Masih.

⁴Nami tuntimu ake loakud̄u ade ndai poda-poda neo ade.

⁵Akeku haba rawa'u ringa b̄a nami rad̄i Ana-Na ro nami makaronggana d̄i nggomid̄oho: Ruma Hatalla eded̄u taroa, ro d̄i Sia wati wara ma rindi.

⁶Nggara nggahisi b̄a ndai b̄a one ndai mori sab̄ua lab̄o Sia, sapodakaina ndai mori ade rindikaina, ndad̄i ndai tacowa nataho kai nggahi ra eli atao kai ruku ra rawita.

⁷Pala nggara morisi ndai d̄i ade taroakaina b̄unera Ruma Hatalla ma wara d̄i ade taroana, ndad̄i ndai mori tenggo, taho d̄i sab̄ua lab̄o makalaina, ro ra'a Ruma Isa, Ana-Na, ma karasona ndai rad̄i sara'a dosa.

⁸Nggara nggahisi b̄a ndai b̄a one ndai wati dosata, ndai tatipuku weki ndai; ro Ruma Hatalla wati warana d̄i ade ndaita.

⁹Pala nggara mangakusi b̄a ndai dosa-dosa ndai d̄i Ruma Hatalla, Sia d̄imambei rasake-Na ro nakarawiku au ma adi. Sia d̄imakangampuna dosa-dosa ndaita ro nakarasoku ndai rad̄i sara'a ruku ra rawi ndai ma ncara.

¹⁰Pala nggahisi b̄a ndai b̄a one ndai wati dosata, ndai ma wi'ikaina b̄une-b̄uneta Ruma Hatalla ma cowa ro ndai wati wi'ita nggahi ra eli Ruma Hatalla d̄i ade ndaita.