Read Bima 1 YAHYA 2 Bible Online

1 YAHYA 2 - Bima bible

1 YAHYA 2

¹Ana-anaku! Nahu tuntiku ake d̄i nggomid̄oho loakud̄u nggomid̄oho aina karawimu dosa. Pala nggara warasi ma karawi dosa, ndad̄i ndai wara sab̄ua dou d̄imabelata, eded̄u Ruma Isa Al Masih ma adi ede; Sia d̄imaraho nemba d̄i ru'u b̄a ndai d̄i tando Ama.

²Siaku ma tangguna hukuma Ruma Hatalla b̄ara dosa ndai, ro ma wa'ana ndaita kasab̄ua weki lab̄o Ruma Hatalla. Ndai Siaku Ma Kangampu ru'u dosa-dosa ndaita ro laina dosa ndai mpoa, malaisi dosa sara'a dunia.

³Nggara to'asi b̄a ndai d̄i parenta-parenta Ruma Hatalla, ede tandana b̄a one ndai tapataku Ruma Hatalla.

⁴Dou ma nggahi, ”Nahu pata Ruma Hatalla,” pala wati to'ana d̄i parenta-parenta-Na, dou ede nacowaku, ro Ruma Hatalla wati wara d̄ei adena.

⁵Pala dou ma to'a d̄i nggahi ra eli Ruma Hatalla, dou ede nameci ra ca'u Ruma Hatalla kai sampuruna. Edeku tandana b̄a one ndai mori sab̄ua lab̄o Ruma Hatalla.

⁶Cou-cou ma nggahi b̄a one sia mori sab̄uana lab̄o Ruma Hatalla, sia pab̄uaku mori b̄atuna conto Al Masih.

⁷ Cina ra angi meci ra ca'u b̄a nahu! Ratunti b̄a nahu ake laina sab̄ua parenta ma b̄ou. Ake parenta ntoira rawa'u karongga d̄i nggomid̄oho ra'aipu nggomid̄oho tampu'umu imbi d̄i Al Masih; eded̄u haba rad̄i Ruma Hatalla ma wa'ura ringa b̄a nggomid̄oho sawatipu b̄a ede.

⁸Kone ade ndedekaina, parenta ratunti b̄a nahu ake b̄ou rau; b̄ara ncihina loa d̄i eda d̄i weki Al Masih ro d̄i weki nggomid̄oho. B̄ara marindi nanaha mbora ro taroa ma poda nawa'ura tampu'u kalea.

⁹Dou ma nggahi b̄a one sia wara ta ade taroana pala dou ede mbuipu daca'una cina ra angina, dou ede mbuipu warana d̄i ade rindikaina sampe ake.

¹⁰Karawi b̄une ede nakatadaku d̄i ndaita meci ra ca'u ma ederahid̄i; meci ra ca'u ede laina meci ra ca'u ndaita d̄i Ruma Hatalla, malaisi meci ra ca'u Ruma Hatalla d̄i ndaita, wakatu Sia nggaduna Ana-Na d̄imasuwuna mbani Ruma Hatalla b̄ara dosa ndaita.

¹¹Pala dou ma daca'u cina ra angina, nawara d̄i ade rindikaina. Sia nalampaku d̄i ade rindikaina, ro wati b̄adena tab̄e laokaina, b̄ara rindikaina ede makandad̄ina sia wati loana eda.

¹²Nahu matunti d̄i nggomid̄oho, Anad̄oho, b̄ara dosamu wa'ura kangampu wea b̄ara Al Masih.

¹³Nahu matunti d̄i nggomid̄oho, Ama-ama, b̄ara nggomid̄oho mapataku Sia ma wa'ura wara ra'aipu saramba wa'una. Nahu matunti d̄i nggomid̄oho, Dou-dou sampela, b̄ara nggomid̄oho wa'ura kakoamu Ibilis.

¹⁴Nahu matunti d̄i nggomid̄oho, Anad̄oho, b̄ara nggomid̄oho mapata Ruma Hatalla. Nahu matunti d̄i nggomid̄oho, Ama-ama, b̄ara nggomid̄oho mab̄adeku Nggahi ra eli Ruma Hatalla ma wa'ura wara ra'aipu saramba wa'una. Nahu matunti d̄i nggomid̄oho, Dou-dou sampela, b̄ara nggomid̄oho tenggo. Nggahi ra eli Ruma Hatalla wara d̄ei ademu, ro nggomid̄oho wa'ura kakoamu Ibilis.

¹⁵Aina meci ra ca'umu dunia ake, atao au-au ma wara d̄i dunia ake. Nggara meci ra ca'usi b̄a nggomid̄oho dunia, nggomid̄oho wati d̄imameci ra ca'u Ama.

¹⁶Samenana au-au ma wara d̄i dunia ake — rakane'e b̄a tabe'a manusia ma dosa, ra'edana edempara nane'eku ro d̄i kabangga-banggakaina — sara'ana eded̄u lampa rawi-lampa rawi ma laina maina ta Ama, malaisi rad̄i dunia.

¹⁷Dunia ro sara'ana ma wara tad̄eina d̄i ne'e b̄a manusia, wunga mborana. Pala dou ma b̄atu kane'e Ruma Hatalla, pala mori sampe santoi-ntoina.

¹⁸Ana-anaku, cumpukai jamana wa'ura d̄eni! Wa'ura ngoa d̄i nggomid̄oho sawatipu b̄a ede b̄a one Musu Al Masih d̄imamai; ro ake wa'ura mboto wontu dou-dou Musu Al Masih. Ede tandana b̄a one cumpukai jamana wa'ura d̄eni.

¹⁹Musu-musu Al Masih ede eded̄u dou-dou ma wa'ura tu'u wi'ina ndai, b̄ara siad̄oho sapodakaina laina dou-dou ndaita. Nggara podasi siad̄oho dou-dou ndai, tantu siad̄oho ngge'empa sama-samana lab̄o ndai. Pala siad̄oho tu'u wi'ina ndai, loakud̄u tadana b̄a one wati kone sab̄ua dou rau rad̄i siad̄oho ma poda-poda lu'u tagolongana ndaita.

²⁰Pala nggomid̄oho wa'ura tarimamu Roh Allah raluakai b̄a Ruma Isa Al Masih ro b̄ara ndedena nggomid̄oho sara'ana patamu ngoa ra tei ma ncihi.

²¹Ndad̄i tunti b̄a nahu ake d̄i nggomid̄oho laina b̄ara nggomid̄oho wati patamu ngoa ra tei ma ncihi, pala nggomid̄oho wa'ura pata podamu, ro nggomid̄oho b̄ade raumu b̄a one wati wara cowa d̄i ade ngoa ra tei ma poda ede.

²²Ma nuntu ra nggahi cowa eded̄u dou ma nggahi b̄a one Ruma Isa laina Sangaji Mambei salama rasake b̄a Ruma Hatalla. Dou ede Musu Al Masih; sia wati mangakuna Ama ro Ana.

²³Dou ma wati mangaku Ana, aona wati tarimana Ama rau. Ro dou ma mangaku Ana, aona natarimaku Ama rau.

²⁴B̄ara ndedena, haba rawa'u ringa b̄a nggomid̄oho ra'aipu saramba-rambana nggomid̄oho imbimu pab̄uapu nggomid̄oho jaga katahomu d̄ei ademu. Haba ede nggara tio kab̄aesi b̄a nggomid̄oho, nggomid̄oho d̄imamori sab̄ua ncau lab̄o Ana ro lab̄o Ama.

²⁵Ro akeku ra sake b̄a ndai Al Masih d̄i ndai: mori masapodakaina ro ma'ederahid̄i.

²⁶Nahu tuntiku ake d̄i nggomid̄oho mab̄oha dou-dou ma wunga ngupa ncai d̄i tipukaina nggomid̄oho.

²⁷Pala mab̄oha ndai nggomid̄oho, Al Masih wa'ura mbeina Roh-Na d̄i nggomid̄oho. Ro salama Roh-Na wara d̄i nggomid̄oho, wati paraluna wara dou makalai mangoa ra teina nggomid̄oho. B̄ara Roh-Na mangoa ra tei nggomid̄oho mab̄oha samenana au-au; ro au rangoa ra tei-Na ede napodaku, laina nuntu ra nggahi cowa. B̄ara ndedena, pab̄uapu nggomid̄oho to'a d̄i au rangoa ra tei b̄a Roh ede, ro pab̄uaku nggomid̄oho ngge'empa mori sab̄uamu lab̄o Al Masih.

²⁸Ndad̄i, ana-anaku, ngge'empa mori sab̄uamu lab̄o Al Masih, loakud̄u pea wakatu mai Sia, ndai satando Sia kai disa poda, ro wati cili weki b̄ara majata.

²⁹Nggomid̄oho wa'ura b̄ademu b̄a one Al Masih b̄atu mori b̄une rakane'e b̄a Ruma Hatalla. B̄ara ndedena nggomid̄oho pab̄uapu b̄ade raumu b̄a one sanikina dou ma mori b̄atu rakane'e Ruma Hatalla eded̄u ana Ruma Hatalla.