Read Bima 1 YAHYA 3 Bible Online

1 YAHYA 3 - Bima bible

1 YAHYA 3

¹ Tiopu Ruma Hatalla nawancuku meci ra ca'una ndaita, ndad̄ina ndai kandad̄ina ana-ana-Na. Ro podana ndai ake eded̄u ana-ana Ruma Hatalla. B̄ara ndedena dunia ma dab̄ae ake wati patana ndaita, b̄ara dunia wati patana Ruma Hatalla.

²Cina ra angi meci ra ca'u b̄a nahu! Ndai ake eded̄u ana-ana Ruma Hatalla, pala ka'ada'ana ndai peasi watipu tantuna. Pala ndai tab̄adeku b̄a one nggara namaisi Al Masih, ndai d̄imandad̄i b̄une Sia, b̄ara ndai d̄ima'eda Sia d̄i ade ka'ada'a-Na ma sapodakaina.

³Samenana dou ma ntau ne'e ake d̄i Al Masih, nasandakaku weki ndaina loakud̄u poda-poda rasona, raso rad̄i dosa b̄une Al Masih rau maraso.

⁴Dou ma karawi dosa, nasapaku hukum Allah; b̄ara dosa eded̄u rasapa d̄i hukum Allah.

⁵ Nggomid̄oho ma b̄adeku b̄a one mai Al Masih d̄imakambora dosa-dosa manusia, ro b̄ara wati wara dosa d̄i ade weki ndai-Na.

⁶Samenana dou ma mori sab̄ua lab̄o Al Masih, wati karawi ntuwuna dosa. Dou ma karawi ntuwu dosa, wati paranana eda Al Masih atao patana Sia.

⁷Ana-anaku, aina co'omu cou-cou rau makasantuda nggomid̄oho. Dou ma karawi rakane'e Ruma Hatalla eded̄u ana Ruma Hatalla b̄une Al Masih eded̄u Ana Ruma Hatalla.

⁸Pala dou ma karawi ntuwu dosa eded̄u ana Ibilis, b̄ara Ibilis radosana ra'aipu saramba wa'una. Ru'u akeku Ana Ruma Hatalla maikaina, eded̄u d̄imakalelina ruku ra rawi Ibilis.

⁹Dou ma wa'ura ndad̄i Ana Ruma Hatalla, wati karawi ntuwuna dosa, b̄ara tabe'a ndai Ruma Hatalla wara d̄i sia. Ro b̄ara Ruma Hatalla ede Amana, ndad̄i sia wati loana karawi ntuwu dosa.

¹⁰Akeku laikaina ana-ana Ruma Hatalla lab̄o ana-ana Ibilis: cou-cou mawati karawi rakane'ekai b̄a Ruma Hatalla, atao wati meci ra ca'una cina ra angina, sia laina ana Ruma Hatalla.

¹¹ Ra'aipu saramba wa'una wa'ura karongga haba ake d̄i nggomid̄oho: Ndai pab̄uaku meci ra ca'u d̄i sab̄ua lab̄o d̄imakalaina.

¹² Aina ndai b̄une la Kain, ma ndad̄i ana Ibilis ro hadena ari ndaina. B̄ab̄auku Kain hadekaina arina? B̄ara lampa rawi-lampa rawi rakarawina eded̄u ncara, pala lampa rawi rakarawi b̄a arina eded̄u ncihi.

¹³B̄ara ndedena, Cina ra angiku, aina mbora akamu nggara dou-dou dunia ake madaca'u nggomid̄oho.

¹⁴ Ndai wa'ura b̄ademu b̄a one ndai wa'ura losa rad̄i madekai, ro lao peso weki aka d̄i morikai. Ndai b̄ade ede, b̄ara ndai mameci ra ca'u d̄i cina ra angi ndaita. Dou ma wati meci ra ca'u, aona mbuipu kuasakai b̄a made.

¹⁵Dou ma daca'u cina ra angina eded̄u dou mahade dou, ro nggomid̄oho mab̄adeku b̄a one dou ma hade dou wati ntauna mori masapodakaina ro ma'ederahid̄i.

¹⁶Kai ncai akeku ndai tab̄adeku cara d̄i meci ra ca'ukai sasama manusia: Al Masih wa'ura d̄onggo mbeina mori-Na d̄i ru'u b̄a ndai. B̄ara ndedena, ndai rau pab̄uaku d̄onggo mori ndai d̄i ru'u b̄a cina ra angi ndaita!

¹⁷Nggara sab̄ua dou ma ncihi mori ra wokona edana cina ra angina mawati ncihi d̄i ade mori ra wokona, pala wati ngawana bantu cina ra angina ede, b̄uneku dou ede loana nggahi b̄a one sia meci ra ca'u Ruma Hatalla?

¹⁸Ana-anaku! Aina ndai meci ra ca'u d̄i asa mpoa atao kai nggahi mpoa. Pab̄uaku ndai meci ra ca'u kai sampuruna, ma d̄ibukutikai ruku ra rawi ndai.

¹⁹Ndedeku carana ndai b̄ade b̄a one ndai lu'u d̄i ade golonga ana-ana Ruma Hatalla ma poda, ro ndai neo ade d̄i tando Ruma Hatalla.

²⁰Ndai tab̄adeku, b̄a one nggara ndai kancarasi b̄a ade ndai, loa ra tingi Ruma Hatalla nancewi na'e ntewi kaisi loa ra b̄ade ade ndai, ro b̄a one Sia nab̄ade sara'aku.

²¹Ndad̄i, Cina ra angi meci b̄a nahu, nggara ade ndaita watisi kancarana ndai, ndai loa satando Ruma Hatalla kai disa.

²²Ro au raraho b̄a ndai rad̄i Sia, ndai tarakaku b̄ara ndai to'ata d̄i parenta-parenta-Na ro karawita au ma kasana ade-Na.

²³ Raparentakai b̄a Sia d̄i ndai eded̄u: Ndai pab̄uaku imbi d̄i Ana-Na, eded̄u Ruma Isa Al Masih, ro ndai pab̄uaku meci ra ca'u kali cempe angi, b̄une rawa'u parentakai b̄a Al Masih d̄i ndaita.

²⁴Sara'ana dou ma to'a d̄i parenta-parenta Ruma Hatalla, mori kasab̄ua weki lab̄o Ruma Hatalla, ro Ruma Hatalla kasab̄ua weki lab̄o siad̄oho. Ro ndai tab̄adeku b̄ara Ruma Hatalla mori kasab̄ua weki lab̄o ndaita, b̄ara Sia wa'ura mbeina Roh-Na d̄i ndaita.