Read Bima 1 YAHYA 4 Bible Online

1 YAHYA 4 - Bima bible

1 YAHYA 4

¹Cina ra angi meciku! Aina imbimu d̄i samenana dou ma mangaku nantau Roh Allah, pala uji wa'upu siad̄oho d̄ib̄adekaimu sab̄ua roh ma wara d̄i siad̄oho ede rad̄i Ruma Hatalla atao laina. B̄ara mboto nabi palasu nawa'ura lampa rero tab̄e-b̄e.

²Ndakeku carana d̄i b̄adekai b̄a nggomid̄oho sab̄ua ede Roh Allah atao laina: Dou ma mangaku b̄a one Ruma Isa Al Masih maina d̄i dunia kai manusia, dou ede nantau Roh ma ramai ta Ruma Hatalla.

³Pala dou ma wati mangakuna lampa rawi ake mab̄oha Ruma Isa, wati ntauna Roh Allah. Dou ede nantau roh rad̄i Musu Al Masih. Nggomid̄oho wa'ura ringamu b̄a one roh ede d̄imamai, ro ake sia wa'ura wara d̄i ade dunia ake.

⁴Pala Ana-anaku, nggomid̄oho eded̄u ntau Ruma Hatalla. Nggomid̄oho wa'ura kakoamu nabi-nabi palasu, b̄ara Roh ma wara d̄i nggomid̄oho nancewi kuasa ntewi kaisi roh ma wara d̄i dou-dou ntau dunia ake.

⁵Nabi-nabi palasu ede nanuntu ra nggahiku mab̄oha dunia, ro dunia naringa ra kade'eku nggahi ra eli siad̄oho, b̄ara siad̄oho ntau dunia.

⁶Pala ndai eded̄u ana-ana Ruma Hatalla; ro dou ma pata Ruma Hatalla, naringa ra kade'eku nggahi ra eli ndaita. Ro dou ma laina ntau Ruma Hatalla, wati ringa ra kade'ena nggahi ra eli ndaita. Ndedeku carana d̄i b̄adekai b̄a ndai cua laina Roh ma mbei ngoa ra tei ma poda ro roh ma kasantuda.

⁷Cina ra angi meci b̄a nahu! Maira ndai tameci ra ca'uku d̄i sab̄ua lab̄o sab̄ua dou, b̄ara meci ra ca'u ramaina ta Ruma Hatalla. Dou ma meci ra ca'u, eded̄u Ana Ruma Hatalla ro sia napataku Ruma Hatalla.

⁸Dou ma wati meci ra ca'u, wati patana Ruma Hatalla; b̄ara Ruma Hatalla eded̄u ma meci ra ca'u.

⁹Ruma Hatalla katadana b̄a one Sia mameci ra ca'u ndaita kai nggaduna Ana-Na ma kese weki d̄i dunia ake loakud̄u ndai raka mori kai ncai Ana-Na ede.

¹⁰Akeku meci ra ca'u: Laina ndai ma wa'ura meci ra ca'u Ruma Hatalla, pala Ruma Hatalla ma meci ra ca'u ndaita ro nggaduna Ana-Na loakud̄u kai ncai Sia ndai d̄imaraka kangampu wea dosa-dosa ndaita.

¹¹Cina ra angi meci b̄a nahu, Ruma Hatalla nggara ndedesi ipi meci ra ca'una d̄i ndai, ndai rau pab̄uaku meci ra ca'u d̄i sab̄ua lab̄o ma sab̄uana.

¹² Wati kone sab̄ua dou rau ma parana eda Ruma Hatalla, pala ndai nggara cua-cua meci ra ca'usi, Ruma Hatalla ma sab̄ua lab̄o ndai ro meci ra ca'u-Na nandad̄i sampuruna d̄i ade weki ndai.

¹³B̄ara Ruma Hatalla wa'ura mbeina d̄i ndai Roh-Na, ndad̄i ndai tab̄adeku b̄a one ndai wa'ura mori sab̄ua lab̄o Ruma Hatalla, ro Ruma Hatalla mori sab̄ua lab̄o ndai.

¹⁴Ndai nami wa'ura edamu Ana Ruma Hatalla, ro nami ma ngoa ra kahabana b̄a one Sia ranggadu b̄a Ama d̄imandad̄i Sangaji Mambei salama dunia ake.

¹⁵Cou-cou mamangaku b̄a one Ruma Isa ede Ana Ruma Hatalla, Ruma Hatalla namori sab̄uaku lab̄o dou ede, ro dou ede rau namori sab̄uaku lab̄o Ruma Hatalla.

¹⁶Ndai tab̄adeku ro ta'imbiku d̄i meci ra ca'u Ruma Hatalla d̄i ndaita. Ruma Hatalla ede meci ra ca'u. Dou ma morina rakuasakai b̄a meci ra ca'u, dou ede nasab̄uaku lab̄o Ruma Hatalla, ro Ruma Hatalla nasab̄uaku lab̄o sia.

¹⁷Meci ra ca'u rakandad̄ina sampuruna d̄i ade weki ndai, loakud̄u ndai ntau disa d̄i Ainaina Pengadilana. Ndai d̄imantau disa, b̄ara mori ndai d̄i dunia ake sama b̄une mori Al Masih.

¹⁸Dou ma iu meci ra ca'u Ruma Hatalla, wati ntauna iu dahu; b̄ara meci ra ca'u ma sampuruna nakamboraku samenana iu dahu. Ndad̄i tadara b̄a one dou wati iuna meci ra ca'u Ruma Hatalla kai sampuruna nggarasi dou ede nadahuku satando Ainaina Pangadilana.

¹⁹Ndai tameci ra ca'uku, b̄ara Ruma Hatalla wa'ura meci ra ca'u uluna ndaita.

²⁰Nggara nggahisi b̄a sab̄ua dou, ”Nahu kameci ra ca'uku Ruma Hatalla,” pala sia wati meci ra ca'una cina ra angina, dou ede nacowaku. B̄ara dou ma wati meci ra ca'u cina ra angina ra'edana, wati lu'ukai b̄a aka loana meci ra ca'u Ruma Hatalla ma wati d̄iloana eda.

²¹B̄ara ndedena, akeku parenta rambei b̄a Al Masih d̄i ndaita: Cou-cou ma meci ra ca'u Ruma Hatalla pab̄uaku meci ra ca'una cina ra angi rauna.