Read Bima 1 YAHYA 5 Bible Online

1 YAHYA 5 - Bima bible

1 YAHYA 5

¹Dou ma imbi b̄a one Ruma Isa eded̄u Sangaji Mambei salama rasake b̄a Ruma Hatalla, dou ede eded̄u ana Ruma Hatalla. Dou ma meci ra ca'u amana, nameci ra ca'u rauku anana.

²Kai ncai akeku ndai tab̄adeku b̄a one ndai ma meci ra ca'u d̄i ana-ana Ruma Hatalla: Ndai ma meci ra ca'u Ruma Hatalla ro mato'a d̄i parenta-parenta-Na.

³ B̄ara, mameci ra ca'u Ruma Hatalla aona to'a d̄i parenta-parenta-Na. Ro parenta-parenta-Na wati tanina d̄i ru'u b̄a ndaita,

⁴b̄ara sanikina ana Ruma Hatalla nawa'uku kakoa dunia ma dab̄ae ake. Ro ndai makakoana dunia kai imbi ndaita.

⁵Couku mawa'una kakoa dunia? Dou ma imbimpa b̄a one Ruma Isa eded̄u Ana Ruma Hatalla.

⁶Isa Al Masihra ma mai d̄i dunia kai oi kandeu karasokai-Na ro kai ra'a made-Na. Sia mai laina kai oi mpoa, pala kai oi ro ra'a. Ro Roh ndai Ruma Hatalla ma mbei sakasi b̄a one ede napodaku, b̄ara Roh wati paranana cowa.

⁷Wara tolu ma sakasina:

⁸Roh Allah, oi ro ra'a — tolu-toluna ede mambei sakasi ma sama.

⁹Ndai ta imbiku d̄i rasakasi b̄a manusia, pala rasakasi b̄a Ruma Hatalla ma ncewi tenggo wali. Ro edeku sakasi rawa'u mbei b̄a Ruma Hatalla mab̄oha Ana-Na.

¹⁰B̄ara ndedena, dou ma imbi d̄i Ana Ruma Hatalla, wa'ura tarimana rasakasi ede d̄ei adena; pala dou ma wati imbi d̄i Ruma Hatalla, wa'ura wi'ikaina b̄une-b̄uneta Ruma Hatalla ma cowa, b̄ara sia wati imbina au ranggahi b̄a Ruma Hatalla mab̄oha Ana-Na.

¹¹ Akeku rasakasi ede: Ruma Hatalla wa'ura mbeina d̄i ndaita mori masapodakaina ro ma'ederahid̄i, ro mori ede wara d̄i ade Ana-Na.

¹²Dou ma ntau Ana nantau mori, dou ma wati kantau Ana Ruma Hatalla, sia wati ntauna mori ede.

¹³Nahu matunti d̄i nggomid̄oho ma imbi d̄i Ana Ruma Hatalla, loakud̄u nggomid̄oho imbimu b̄a one nggomid̄oho wa'ura ntaumu mori masapodakaina ro ma'ederahid̄i.

¹⁴Ro ndai disa satando d̄i Ruma Hatalla, b̄ara ndai ta'imbi podaku Sia nambeiku raraho b̄a ndai ade do'a, nggara rahosi b̄a ndai au-au ma ncihi ncao lab̄o rakane'e-Na.

¹⁵B̄ara ndai tab̄adeku b̄a one Sia nakade'eku ndai nggara rahosi b̄a ndai d̄i Sia, ndad̄i ndai tab̄ade rauku b̄a one Sia nambeiku d̄i ndai au raraho b̄a ndai d̄i Sia.

¹⁶Nggara edasi b̄a nggomid̄oho sab̄ua dou d̄i ade weki sasama dou ela Al Masih ma karawi dosa ma wati kandad̄ina dou ede moda mori masapodakaina ro ma'ederahid̄i, pab̄uapu nggomid̄oho do'amu d̄i Ruma Hatalla; ro Ruma Hatalla d̄imambei mori ede d̄i sia. Ake ma wara hubunga lab̄o siad̄oho ma dosana wati kandad̄ina siad̄oho moda morina ede. Pala wara dosa ma kandad̄ina dou moda morina ede. Mab̄oha lampa rawi ede nahu wati nggahiku b̄a one nggomid̄oho pab̄uapu do'amu d̄i Ruma Hatalla.

¹⁷Samenana ruku ra rawi ma ncara eded̄u dosa, pala wara dosa ma wati kandad̄ina dou moda mori masapodakaina ro ma'ederahid̄i ede.

¹⁸Ndai tab̄adeku b̄a one samenana dou ma wa'ura ndad̄i ana-ana Ruma Hatalla, wati karawina dosa, b̄ara Ana Ruma Hatalla masandakana, ro Ibilis wati loana karawi au-au d̄i sia.

¹⁹Ndai tab̄adeku b̄a one ndai eded̄u ntau Ruma Hatalla, konena sara'a dunia ake kuasakai b̄a Ibilis.

²⁰Ndai tab̄adeku b̄a one Ana Ruma Hatalla wa'ura maina ro wa'ura mbeina loa ka'ao d̄i ndai, loakud̄u ndai pata Ruma Hatalla ma poda. Ndai mori kasab̄ua weki lab̄o Ruma Hatalla ma poda ro mori sab̄ua lab̄o Ana-Na eded̄u Ruma Isa Al Masih. Akeku Ruma Hatalla ma poda, ro akeku mori masapodakaina ro ma'ederahid̄i.

²¹Ana-anaku, kad̄o'opu wekimu rad̄i berhala-berhala!