Read Bima 2 YAHYA 1 Bible Online

2 YAHYA 1 - Bima bible

2 YAHYA 1

¹Ru'u b̄a Ina rakad̄ale b̄a Ruma Hatalla, ro d̄i ru'u b̄a ana-ana Ina. Sura ake rad̄i nahuna, mana'ekai ela Ruma ma poda-poda meci ra ca'u nggomid̄oho. Laina nahu mpoa, pala sara'ana dou ma pata Ruma Hatalla ma poda, mameci ra ca'u nggomid̄oho rau.

²B̄ara Ruma Hatalla mangge'e d̄ei ade ndaita, ro d̄imawara ncau lab̄o ndaita santoi-ntoina.

³Raho-raho to'impa ndai d̄i mbei bareka, rahama ro taho ra ntai b̄a Ruma Hatalla Ama ndaita, ro Ruma Isa Al Masih, Ana Ama. Raho-raho to'impa sara'ana ede d̄ikantau b̄a ndai kai ade ma nira ro kai meci ra ca'u.

⁴Nahu neo poda adeku b̄ade b̄a one wara ana-ana Ina ma mori b̄atu rangoa ra tei b̄a Ruma Hatalla, b̄une rawa'u parenta b̄a Ruma Hatalla d̄i ndaita.

⁵ B̄ara ndedena, Ina, nahu maraho poda-poda loakud̄u ndai sara'ana cua meci ra ca'u angi. Ranggahi b̄a nahu ake laina sab̄ua parenta ma b̄ou; parenta ake wa'ura mbei d̄i ndai ra'aipu ndai saramba-ramba imbita.

⁶Meci ra ca'u aona mori b̄atu parenta-parenta Ruma Hatalla. Ro parenta rawa'u ringa b̄a nggomid̄oho ra'aipu saramba wa'una eded̄u b̄a one nggomid̄oho pab̄uapu mori kai meci ra ca'u d̄i sab̄ua lab̄o d̄imakalaina.

⁷Mboto dou matipu wa'ura ngge'e rero d̄i sara'a dunia. Siad̄oho eded̄u dou-dou ma wati mangaku b̄a one maikai Ruma Isa Al Masih d̄i dunia kai sab̄ua dou manusia. Dou b̄une ede eded̄u dou matipu, ro Musu Al Masih.

⁸B̄ara ndedena, jagapu ai to'ina nggomid̄oho mborakaina au rawa'u usaha wea b̄a nami d̄i ru'u b̄a nggomid̄oho. Usahapu loakud̄u nggomid̄oho tarimamu rad̄i Ruma Hatalla ufamu sara'ana.

⁹Dou ma wati nenti d̄i ngoa ra tei Al Masih, malaisi wati ncihi ncaona rad̄i au rangoa ra tei b̄a Al Masih, dou ede wati ntauna Ruma Hatalla. Dou ma ngge'empa d̄ei ade ngoa ra tei Al Masih, aona nantau nataho Ruma Hatalla Ama ndaita atao Ruma Isa Al Masih.

¹⁰B̄ara ndedena, nggara warasi mai dou ro ngoa ra kahabana d̄i nggomid̄oho ngoa ra tei ma watira ngoa ra tei b̄a Al Masih, aina tarimamu dou ede d̄ei ade umamu atao mbeimu salam d̄i sia.

¹¹B̄ara dou ma mbei salama d̄i dou ma b̄une ede nab̄atu rauku ro dou ede d̄i ade karawi ma dab̄ae.

¹²Mboto poda ma paralu ngoa b̄a nahu d̄i nggomid̄oho, pala iu b̄a nahu natahopu aina kai sura. Ne'e b̄a nahu loa to'impa lao lamba nggomid̄oho ro nuntu ra nggahi ndai lab̄o nggomid̄oho, loakud̄u ade ndai poda-poda neo adeta.

¹³Ana-ana rad̄i sa'e ra ari Ina rakad̄ale rau b̄a Ruma Hatalla, nggaduna salam d̄i ru'u Ina.