Read Bima 3 YAHYA 1 Bible Online

3 YAHYA 1 - Bima bible

3 YAHYA 1

¹ Cina meciku Gayus! Nahu mana'ekai ela Ruma, ma poda-poda meci ra ca'umu,

²mado'a raho-raho to'impa nggomi taho ra ntaimu ro sara'ana taho-tahompa lab̄o nggomi, sama b̄une nawa ra sarumbumu taho-tahompa.

³Nahu neo poda adeku wakatu pila-pila cina ra angi ela Al Masih ronggana d̄i nahu ipi podaku nggomi to'amu d̄i Ruma Hatalla ma poda, b̄ara podana nggomi mori ncaumu b̄atu rangoa ra tei b̄a Ruma Hatalla.

⁴Wati warana ma loana kandad̄i nahu ipi neo adeku, ntewi kaisi lab̄o ringaku b̄a one ana-ana nahu mori b̄atuna ngoa ra tei b̄a Ruma Hatalla.

⁵Cinaku! Nggomi ipi to'amu d̄i ade karawimu rakarawimu d̄i ru'u b̄a lengad̄ohomu sasama ela Al Masih; kone ela Al Masih ma watipu pata b̄a nggomi rau, nggomi karawi weamu.

⁶Siad̄oho wa'ura ngoana d̄i ela Ruma d̄ihid̄i nami mab̄oha meci ra ca'umu. Bantupu siad̄oho loakud̄u lampa ra lao wali siad̄oho ro kai ndedena nakasanaku ade Ruma Hatalla,

⁷b̄ara d̄i ade lampa ra laokaina d̄ikarawi weakaina Al Masih, siad̄oho wati tarimana rabantu au-au rad̄i dou-dou ma wati pata Ruma Hatalla.

⁸B̄ara ndedena, ndai dou-dou ela Al Masih pab̄uaku bantu lengad̄ohona sasama ela Al Masih ma b̄une ede, loakud̄u ndai loa b̄atu ade usaha siad̄oho d̄ingoa ra kahabana ngoa ra tei ma poda rad̄i Ruma Hatalla.

⁹Nahu wa'ura tuntiku sura ma poro d̄iru'u b̄a ela Ruma, pala Diotrefes ma ne'e ndad̄i dou mana'ekaina d̄i ade ela Ruma, wati ngawana b̄atu nahu.

¹⁰Pea nggara maisi nahu, nahu d̄imahengga sara'ana au-au rawa'u karawi b̄a Diotrefes, eded̄u mab̄oha lampa rawi-lampa rawi madab̄ae ro nuntu ra nggahi cowa rarenta b̄a sia mab̄oha nami! Pala sara'ana ede watipu ncihina d̄iru'u b̄a sia. D̄i wakatu lengad̄oho sasama ela Al Masih ede maina, sia wati ngawana tarima siad̄oho. Mala sia nakantaku dou-dou ma ne'e tarima cina ra angi ede, ro kau b̄a sia dou-dou ede losa rad̄i ela Ruma!

¹¹Cina meciku, ai to'ina b̄atumu au ma dab̄ae. B̄atupu au ma taho. Dou ma karawi mataho eded̄u ntau Ruma Hatalla. Ro dou ma karawi madab̄ae watipu patana Ruma Hatalla.

¹²Sara'ana dou maroi la Demetrius. Kone Ruma Hatalla rau maroina. Nami rau maroina ro nggomid̄oho mab̄adeku b̄a one au rakarongga b̄a nami loa d̄i'imbi.

¹³Mboto podapu ma paralu d̄ingoa b̄a nahu d̄i nggomi, pala iu b̄a nahu natahopu aina kai sura.

¹⁴Ne'e b̄a nahu wati ntoi walina d̄ima'eda angi lab̄o nggomid̄oho, ro ndai d̄imanuntu ra nggahi ncao tando.

¹⁵Raho-raho to'impa Ruma mambei bareka nggomid̄oho. Lengad̄ohomu d̄ihid̄i nahu ake nggaduna salam d̄iru'u b̄a nggomi. Karongga to'ipu salam nahu d̄iru'u b̄a samenana lenga ndai sab̄ua-b̄ua.