Read Bima WAHYU 1 Bible Online

WAHYU 1 - Bima bible

WAHYU 1

¹Isi buku ake mab̄oha au rakatada b̄a Ruma Isa Al Masih mab̄oha lampa rawi-lampa rawi d̄imandad̄i. Ruma Hatalla mangoana d̄i Al Masih loakud̄u Sia maturu teina d̄i ada-ada Ruma Hatalla au d̄imandad̄i roci. Al Masih nggaduna mala'eka-Na d̄i la Yahya, ada-Na, d̄imangoa lampa rawi-lampa rawi mandad̄i ede d̄i sia.

²Edempara la Yahya carita rauna sara'a ra'edana ede; ro akeku laporana mab̄oha rangoa wi'i rad̄i Ruma Hatalla rakatenggo b̄a Ruma Isa Al Masih kai nggahi ra eli-Na.

³Taho ra ntika dou ma bacana ro dou ma kade'ena haba ranggahi d̄i ade buku ake ro to'akaina d̄i au ratunti ta'adena. B̄ara wati ntoi walina sara'ana ake d̄imandad̄i.

⁴ Cina ra angi ma wara d̄i kapidu ela Ruma d̄i dana ra rasa Asia! Nahu, la Yahya, mane'e loakud̄u nggomid̄oho d̄i mbei bareka ro taho ra ntai rad̄i Ruma Hatalla — eded̄u Sia ma wara, ma wa'ura wara, ro ma wara santoi-ntoina — ro rau rad̄i pidu roh ma wara d̄i tando dohokai Ruma Hatalla,

⁵ ro rad̄i Ruma Isa Al Masih, sakasi ma to'a. Siaku ma saramba-rambana rakamori mbali rad̄i madena ro Siaku makuasakaina d̄i sangaji-sangaji dunia. Ruma Isa mameci ra ca'u ndaita, ro kai made-Na Sia hori kalosana ndai rad̄i dosa-dosa ndaita,

⁶ ro kandad̄ina ndai sab̄ua karaja'an ro ma ndad̄i imam-imam ma karawi wea Ruma Hatalla, Ama-Na. Ruma Isa Al Masih edeku ma d̄ese ra ntasa ro makuasa d̄i ru'u santoi-ntoina. Amin!

⁷ Tiopu, Sia maina b̄onto b̄a apu! Samenana dou d̄ima'edana Sia, lu'u rau siad̄oho ma ratub̄a-Na. Sara'a bangsa d̄i dunia d̄imanangi d̄uru ra d̄ala b̄ara Sia. Io, pasti! Amin!

⁸ ”Nahura ma sarambakaina ro ma cumpukaina,” nggahi Ruma Hatalla, ma wara, ma wa'ura wara, ro ma wara sampe santoi-ntoina, Ma Wancu kuasa.

⁹Nahu la Yahya, cinamu ma sama-sama iu mori lab̄o nggomid̄oho d̄i ade susa ra ncoki d̄i iu b̄a sanikina ela Al Masih. Ndai lembo ade satando ncoki ra susa kai ela ntau-Na. Nahu rapaki aka Pulau Patmos b̄ara nahu ma ngoa ra kahabana rangoa b̄a Ruma Hatalla, katenggo b̄a Ruma Isa kai ncai ngoa ra tei-Na.

¹⁰D̄i ainaina Ruma, nahu rakuasakai b̄a Roh Allah, edempara ringa b̄a nahu eli ma na'e — b̄une eli tarompe — manuntu d̄i kontu nahu.

¹¹Eli ede manggahi, ”Tuntipu au ra'eda b̄a nggomi, ro nggadupu buku ede d̄i kapidu ela Ruma eded̄u ake: Efesus, Smirna, Pergamus, Tiatira, Sardis, Filadelfia, ro Laodikia.”

¹²Nahu tamabariku b̄a ne'eku eda cou ede ma nuntu lab̄o nahu. Edempara nahu edaku pidu mbua ed̄i ilo randawi kai masa.

¹³ D̄i woha ed̄i-ed̄i ilo ede kid̄i sab̄ua dou ma d̄i edamu b̄une manusia. Sia kanina jumba ma d̄ondona sampe awa ed̄i. D̄i lawili-Na Sia kanina b̄onto lawili masa.

¹⁴ Honggona b̄ura b̄une kere jimba, b̄une lanta wolo. Madana kalea b̄une afi;

¹⁵ ed̄i-Na kakila b̄une romba raka'a. Eli-Na b̄une eli oi mamab̄u ma na'e.

¹⁶Rima wana-Na manenti pidu mbua ntara, ro rad̄i asa-Na losa salona peda mangaha ma ntau b̄ali b̄ae woi. Pahu-Na nakalea b̄une liro d̄i aimarai kageke.

¹⁷ Wakatu eda b̄a nahu Sia, nahu suncuku d̄i tando Sia b̄une dou mamade. Pala Sia tohona rima wana-Na d̄i nahu edempara nggahina, ”Aina dahumu! Nahura ma sarambakaina ro ma cumpukaina.

¹⁸Nahura Sia ma mori! Nahu wa'ura made, pala tiopu, Nahu mori ru'u santoi-ntoina. Nahu makuasa d̄i ade made ro ta dunia dou mamade.

¹⁹B̄ara ndedena, tuntipu lampa rawi-lampa rawi ra'eda b̄a nggomi eded̄u lampa rawi-lampa rawi ma wara, ake ro lampa rawi-lampa rawi d̄imandad̄i peade.

²⁰Akeku rahasia rad̄i pidu mbua ntara ra'eda b̄a nggomi d̄i rima wana Nahu, ro rad̄i pidu mbua ed̄i ilo masa ede: Pidu mbua ntara eded̄u mala'eka-mala'eka pidu ela Ruma, ro pidu ed̄i ilo ede eded̄u pidu ela Ruma ede.”