Read Bima WAHYU 10 Bible Online

WAHYU 10 - Bima bible

WAHYU 10

¹Edempara eda b̄a nahu sab̄ua mala'eka mana'e kante'e ma kalaina malondo rad̄i saroga. Sia b̄onto b̄a apu, ro sab̄ua afi ala maheko tutana. Pahuna nakalea b̄une liro, ro ed̄ina b̄une tandi'i afi.

²D̄i rimana wara sab̄ua buku to'i ma hengga weki. Ed̄i wanana tonda d̄i moti, ro ed̄i ku'ina tonda ta ari lua.

³Edempara sia nggahi kana'ena b̄une eli nggao singa-singa. Sawa'u b̄a nggahi nggao mala'eka ede, pidu mbua karece ai macambena kai eli makambimbi.

⁴Ndede eli pidu mbua karece ai, nahu kane'e tunti, pala ringa b̄a nahu eli rad̄i saroga manggahi, ”Rahasiapu au ranggahi b̄a pidu mbua karece ai ede; aina tuntimu!”

⁵ Edempara mala'eka ra'eda b̄a nahu ma'ed̄ina sab̄ae d̄i moti ro sab̄ae d̄i dana ede hanta ca'esena rima wanana ese langi.

⁶Sia sumpana kai ngara Ruma Hatalla ma mori santoi-ntoina, ma kandad̄ina langi, dana ro moti ro sara'a ma wara tad̄eina. Nggahi b̄a mala'eka ede, ”Wakatuna wati d̄imakapea-pea wali!

⁷Pala na'ufisi b̄a mala'eka makapidukaina tarompena, Ruma Hatalla nakarawiku nia rahasia-Na, b̄une rakahaba b̄a Sia d̄i ada-ada-Na, eded̄u nabi-nabi.”

⁸ Edempara eli rawa'u ringa b̄a nahu rad̄i saroga ede, manggahi wali d̄i nahu. Nggahi Sia, ”Lao wehapu buku ma hengga weki d̄i rima mala'eka ma ed̄ina matonda moti ro d̄i dana ede.”

⁹Edempara nahu laoku d̄i mala'eka ede ro rahoku loakud̄u sia mbeina buku to'i ede d̄i nahu. Nggahi sia, ”Wehapu ro ngahapu ake. D̄i ade lokomu sia d̄imandad̄i pa'i, pala d̄i ade asamu sia namaci b̄une oi ani.”

¹⁰Nahu wehaku buku to'i ede d̄i rimana edempara ngahaku. D̄i asa d̄i iumu b̄une oi ani, pala sawa'u b̄a ono b̄a nahu, d̄i ade lokoku sia ndad̄i pa'i.

¹¹Edempara nahu rakaukai, ”Ngoa ra kahabapu sakali wali haba Ruma Hatalla mab̄oha bangsa-bangsa, negara-negara, bahasa-bahasa, ro sangaji-sangaji.”