Read Bima WAHYU 11 Bible Online

WAHYU 11 - Bima bible

WAHYU 11

¹ Sawa'u b̄a ede mbeina nahu sadompo haju masarai pahu haju taki ukukai, edempara kauna, ”Lao ukupu Bait Allah ro mezeba. Rekepu sab̄une mbotona dou ma sambea tad̄eina.

² Pala aina ukumu sarei ma sab̄ae ari mai b̄a Bait Allah ede, b̄ara tawela ede nawa'ura mbei d̄i dou ma wati pata Ruma. Siad̄oho d̄imatonda-tonda kota ma raso ede upa mpuru d̄ua wura ntoina.

³Nahu d̄imanggaduna d̄ua dou sakasi-Ku ma kani kani ra lombo tanda ncoki ade, ro siad̄oho d̄imangoa ra kahaba haba Ruma Hatalla 1260 nai ntoina.”

⁴ D̄ua sakasi ede eded̄u d̄ua mpu'u haju zaitun ro d̄ua mbua ed̄i ilo ma wara d̄i tando Ruma sa'isi dunia.

⁵Nggara dou cobana karawi au-au ma wati taho d̄i siad̄oho, ndad̄i rad̄i asa siad̄oho nalosa afi ma kaleli musu-musuna. Kai cara ede, sara'a dou ma ne'e kapili siad̄oho d̄imamade rahade.

⁶ Siad̄oho nantau kuasa d̄imab̄onto langi loakud̄u aina londo ura salama siad̄oho ngoa ra kahabana haba rad̄i Ruma Hatalla. Siad̄oho nantau kuasa rau d̄i sara'a mada oi, d̄i rungkakaina oi ndad̄i ra'a. Ro siad̄oho nantau kuasa rau d̄i ndukukaina dunia kai mboto pahu bala, b̄une aira ne'ena karawi b̄a siad̄oho.

⁷ Sawa'u b̄a siad̄oho nggori ngoa ra kahabana haba siad̄oho, binata ma ralosa rad̄i ade dembi made d̄imancao lab̄o siad̄oho. Sia d̄imakakoana ro hadena siad̄oho.

⁸ Ro timba siad̄oho d̄imandore d̄i ncai bari kota na'e tab̄era salib kai Ruma siad̄oho. Ngara d̄i ibara kai kota ede eded̄u Sodom atao Mesir.

⁹Dou-dou rad̄i sara'a negara, suku, bahasa, ro bangsa d̄ima'edana timba siad̄oho tolu nai sadompo ntoina, ro wati kauna umbu timba-timba ede.

¹⁰Dou-dou mawara d̄i dunia d̄imaneo ade d̄i ade madekai d̄ua sakasi ede. Siad̄oho d̄imakandihana ro cua-cua nggadu kali cempe angi hadia, b̄ara d̄ua dou nabi ede wa'ura kamaina mboto ncoki d̄i sara'ana dou d̄i dunia.

¹¹ Sawa'u b̄a tolu nai sadompo, maira nawa mori rad̄i Ruma Hatalla ro lu'u wali d̄i ade d̄ua dou nabi ede. Siad̄oho rau tu'u kid̄ina, ndad̄ina sara'ana dou mara'edana siad̄oho nandad̄i dahu poda.

¹² Edempara d̄ua dou nabi ede ringana eli mana'e ma'ou siad̄oho rad̄i saroga, ”Maira ne'epu ta ake!” Edempara d̄i tando mada musu-musu siad̄oho, siad̄oho ne'ena ese saroga, lombokai b̄a apu.

¹³ Ndad̄i wakatu ede ndad̄ira epu ma wancu na'e poda. Cengga sampuru d̄i ade kota ede leli, ro pidu riwu dou mamade b̄ara epu ede. Dou-dou makalaina ndad̄i dahu poda, edempara siad̄oho roi ra wadina na'e ra ntoru Ruma Hatalla d̄i saroga.

¹⁴Cilaka makad̄uakaina wa'ura kalalo. Pala tiopu! Cilaka ma katolukaina samporo wali d̄imawontu.

¹⁵ Edempara mala'eka makapidukaina ufina tarompena, edempara d̄i saroga wara eli-eli matenggo poda ma nggahi, ”Kuasa d̄i parentakai dunia wara ake d̄i ade rima Ruma ndaita ro Sangaji Mambei salama rasake-Na. Sia d̄imaparenta ru'u santoi-ntoina.”

¹⁶Ndad̄i d̄ua mpuru upa mana'ekaina ma doho d̄i hid̄i dohokai sangaji siad̄oho d̄i tando Ruma Hatalla, sujuna ro nembana Ruma Hatalla.

¹⁷Nggahi siad̄oho, ”Ruma, Ruma Hatalla Mawancu Kuasa, ma wara, ro ma wa'ura wara! Madad̄oho matarima kasi d̄i Ita b̄ara Ita wa'ura kanimu kuasa Ita ma na'e ra ntoru, ro wa'ura tampu'u parenta!

¹⁸ Dou-dou ma wati pata Ruma, mbani podana b̄ara wa'ura wakatuna Ita b̄ohokaimu mbani poda-Mu, ro wa'ura wakatu rauna paresa ncihi ra ncarakaimu dou-dou mamade. Akeku wakatuna d̄i mbei kai ufa d̄i adad̄oho-Mu, nabi-nabi, ro d̄i ru'u b̄a sara'a ela Ita, eded̄u sara'a dou ma nemba d̄i Ita, na'e ro to'i. Akeku wakatuna d̄i kaleli kai dou-dou ma kalelina dunia!”

¹⁹ Edempara hengga weki Bait Allah d̄i saroga, ro loara eda Peti Rasake kai ta adena. Edempara ndad̄ira kakila ai matuwu angi, ro eli karece ai makambimbi, ro epu ro ura es ma heba.