Read Bima WAHYU 12 Bible Online

WAHYU 12 - Bima bible

WAHYU 12

¹Edempara wara d̄i eda d̄i langi sab̄ua ma b̄isa ra guna ro maheba poda. Sab̄ua dou siwe ma kani liro kai kani ra lombona, mawunga kid̄i ese wawo wura. D̄i tutana wara sab̄ua songko sangaji ma wara sampuru d̄ua mbua ntara.

²Dou siwe ede wunga na'e lokona, ro b̄ara rakara wakatu d̄i ngganakaina, ndad̄i sia kanggicana b̄ara pilina.

³ Edempara wara d̄i eda rau ese langi ma b̄isa ra guna. Wara sab̄ua naga kala ma na'e poda ma ntau pidu mbua tuta ro sampuru mbua wanga. Saniki tutana nakaniku sab̄ua songko sangaji.

⁴ Kai ketona sia hinti randana cengga tolu rad̄i ntara-ntara mawara d̄i langi ro lo'o ca'awana awa dana. Naga ede kid̄ina d̄i tando dou siwe ma ne'e nggana ede kai ne'ena nono anana nawa'usi ra ngganana.

⁵ Edempara dou siwe ede ngganana ana mone d̄imaparenta sara'a bangsa kai tiki b̄esi. Pala ana dou to'i ede weha rampa d̄i dou siwe ede, edempara lao wa'a aka Ruma Hatalla ro d̄i tando dohokai-Na.

⁶Edempara dou siwe ede lao raina aka so sarae, aka hid̄i ra wa'u sadia wea b̄a Ruma Hatalla d̄i ru'una. D̄i hid̄i ede sia d̄i jaga ra sandaka 1260 nai ntoina.

⁷ Edempara d̄i saroga ndad̄i lewa ra laka. Mikhael sama-sama lab̄o mala'ekana malewa lab̄o naga ede. Ro naga ede rau, rabantu b̄a mala'eka-mala'ekana ma'ao Mikhael.

⁸Pala naga ede rakakoana. Sia lab̄o mala'eka-mala'ekana wati rakau wali ngge'e d̄i saroga.

⁹ Naga ma na'e ede paki ca'ari lua! Siaku sawa tua ede ngarana Ibilis atao Roh seta ma tipu sara'a dunia. Sia rapaki d̄i dunia lab̄o sara'a mala'ekana.

¹⁰ Edempara ringa b̄a nahu eli ma na'e d̄i saroga manggahi, ”Akeku wakatuna Ruma Hatalla kasalamana ela-Na! Ake Ruma Hatalla katadana kuasa-Na kai Sangaji kaina! Ake Sangaji Mambei salama rasake ede katada rauna kuasa-Na! B̄ara ma b̄ab̄u ra lo'o cina ra angi ndai d̄i tando Ruma Hatalla aimarai ro aimangad̄i, wa'ura kalosa rad̄i saroga.

¹¹Cina ra angi ndai wa'ura kakoana sia kai ra'a Ana Jimba ede, ro kai haba mancihi rad̄i Ruma Hatalla rakahaba b̄a siad̄oho. Siad̄oho narela koroba nawana sampe samadekaina.

¹²B̄arandedena, pab̄uaku saroga ro sara'ana ma ngge'e tad̄eina kad̄ihi ade! Pala ihara dana ro moti, b̄ara Ibilis wa'ura londo d̄i nggomi kai mbani ma ipi poda, b̄ara sia nab̄adeku b̄a one wakatuna d̄i samporo walimpa.”

¹³Wakatu naga ede kawarana weki b̄a one sia wa'ura paki awa dunia, sia tampu'ura cocona dou siwe ma wa'ura nggana ana mone ede.

¹⁴ Pala dou siwe ede rambei d̄ua mbua kalete nasi b̄angga mbaru ma na'e, loakud̄u sia lao ngemona aka hid̄ina d̄i so sarae, aka hid̄i d̄i jaga ra sandakakai sia tolu mba'a ini wura ntoina, d̄o'o rad̄i dei b̄a naga.

¹⁵Edempara naga ede sampuru kalosana d̄i ade asana oi mamboto poda d̄i dou siwe ede, d̄ima'orona.

¹⁶Pala dunia mabantuna dou siwe ede; dunia henggana asana ro nonona oi ma ralosa d̄i ade asa naga ede.

¹⁷Naga ede ndad̄i mbani poda d̄i dou siwe ede, ndad̄ina sia lao deina londo ra mai dou siwe ede ma kalaina eded̄u sara'a dou ma to'a d̄i parenta-parenta Ruma Hatalla, ro ma mbei sakasi mab̄oha Ruma Isa ro kuasa-Na.

¹⁸Edempara naga ede kid̄ina d̄i kengge moti.