Read Bima WAHYU 13 Bible Online

WAHYU 13 - Bima bible

WAHYU 13

¹ Edempara eda b̄a nahu sab̄ua binata mawontu rad̄i ade moti. Sia nantau sampuru mbua wanga ro pidu mbua tuta. D̄i saniki wangana wara sab̄ua songko sangaji, ro d̄i saniki tutana ratunti sab̄ua ngara makab̄awa ra makatuna Ruma Hatalla.

² Binata ra'eda b̄a nahu ede pahuna b̄une macan komba, ro ed̄ina b̄une ed̄i beruang, ro asana b̄une wiwi asa singa. Edempara binata ede mbei b̄a naga tenggo ra wale ndaina, ro hid̄i dohokaina, ro kuasana ma na'e.

³Sab̄ua d̄i ade pidu mbua tuta binata ede d̄i edamu b̄une mamba'a ma'ipi poda, pala mba'a ede wa'ura taho. Sara'a dunia b̄atuna binata ede kai mbora akana.

⁴Ro siad̄oho nanembaku naga ede b̄ara sia wa'ura mbeina kuasana d̄i binata ede. Ro siad̄oho nanemba rauku binata ede. Nggahi siad̄oho, ”Wati wara ma sama lab̄o binata ake! Wati wara ma wa'u lewa ao lab̄o sia!”

⁵ Binata ede rambei iji d̄imarenta lampa rawi-lampa rawi ma ipi sombo ro makab̄awa ra katuna Ruma Hatalla. Sia loa parenta upa mpuru d̄ua wura ntoina.

⁶Edempara sia tampu'ura i'a ra b̄a'ana Ruma Hatalla, ro ngara Ruma Hatalla. Ndede rau lab̄o hid̄i ngge'ekai Ruma Hatalla, ro sara'a ma ngge'e d̄i saroga kab̄awa ra katuna rau b̄a sia.

⁷ Sia loa rau ao ela Ruma Hatalla ro kakoana siad̄oho. Ro kuasakaina d̄i sara'a suku, negara, bahasa, ro bangsa rambei d̄i sia.

⁸ Binata ede d̄i nemba b̄a samenana dou ma mori d̄i ese wawo dunia, selasi dou-dou ma ngarana wa'ura dafta sawatipu kandad̄i dunia, d̄i ade buku dou mamori ntau Ana Jimba rawa'u sambele.

⁹B̄arandedena, nggomid̄oho nggara masanggosi ringa, ringapu haba ake:

¹⁰ ”Dou ma pab̄ua d̄itaha, pasti d̄i taha. Ro dou ma d̄i pab̄uasi d̄i hade kai peda pasti d̄i hade kai peda. B̄ara ndedena ela Ruma Hatalla pab̄uaku lembo ade ro to'ana.”

¹¹Edempara eda b̄a nahu sab̄ua binata makalaina mawontu rad̄i ade danana. Sia nantau d̄ua mbua wanga b̄une wanga ana jimba. Elina b̄une eli naga.

¹²D̄i tando binata ma sarambana ede sia kanina kuasa ma na'e rarakana d̄i binata ede rau. Sara'a dana ro sara'a ma ngge'e ta esena, kau pab̄uana nemba binata ma sarambakaina ede, ma mba'a ipi mawa'ura taho.

¹³Binata ma kad̄uana ede karawina lampa rawi mab̄isa ra guna ma na'e. D̄i tando sara'ana dou sia ndawina afi malondo rad̄i langi londo awa dana.

¹⁴Ro sara'a dou ma mori d̄i dunia d̄i tipuna kai b̄isa ra guna-b̄isa ra guna d̄i loa d̄i karawina d̄i tando binata masarambana ede. Ro siad̄oho sara'ana rakauna ndawi sab̄ua patung rad̄i binata rakancuwu kai peda, pala ngge'empa morina.

¹⁵Binata ma kad̄uakaina ede rambei iji b̄a Ruma Hatalla mbei nawa d̄i patung ede, ndad̄ina patung ede loana nggahi ro hade sara'ana dou ma wati ngawa nemba sia.

¹⁶Sara'ana dou, mana'e ro to'i, mantau ra wara ro mancoki mori, ada dou ro dou mahori weki, kau pakasa b̄a binata ede d̄imatarima tanda d̄i rima wana siad̄oho atao d̄i ntantangga siad̄oho.

¹⁷Wati kone sab̄ua dou rau maloana weli atao malanda au-au, nggara sia nawatisi ntauna tanda ede, eded̄u ngara ndai binata ede, atao angka ma katadana ngara ede.

¹⁸Ta ake paralu wara hikima. Dou ma loa timba ra lemba naloaku reke aona rad̄i angka binata ede, b̄ara angka ede eded̄u ngara sab̄ua dou manusia. Angkana eded̄u 666.