Read Bima WAHYU 14 Bible Online

WAHYU 14 - Bima bible

WAHYU 14

¹ Edempara eda b̄a nahu, sawa'u b̄a ede d̄i edaku Ana Jimba makid̄i ese wawo doro to'i Sion. Sama lab̄o Sia wara 144.000 dou ma d̄i tantangga cua-cua ratunti ngara-Na ro ngara Ama-Na.

²Edempara ringa b̄a nahu eli rad̄i langi makajoa b̄une eli oi mamab̄u ma na'e ro b̄une kambimbi karece ai ma na'e. Eli ede d̄i ringamu b̄une eli musik rad̄i dou-dou makob̄i kacapi ma wunga kob̄i kacapina.

³D̄i tando dohokaina ro upa mbua mahluk ro mana'ekai d̄ohona maheko dohokai ede, 144.000 dou ede rawana sab̄ua rawa ma b̄ou. Rawa ede wati loa d̄i tana'o b̄a sab̄ua dou rau selasi b̄a 144.000 ede rawa'u hori kalosa rad̄i dunia.

⁴Siad̄oho ede eded̄u dou-dou ma ngge'empa rasona b̄une dou sampela, b̄ara wati campo lab̄ona dou siwe. Siad̄oho lampa b̄atuna Ana Jimba ede tab̄era laokaina. D̄i ade weki sara'a ela manusia, siad̄ohoku rawa'u hori kalosa kai d̄onggo ra mbei masarambakaina d̄i Ruma Hatalla ro d̄i Ana Jimba.

⁵ Watipu iuna siad̄oho cowa; ro wati wara ma'ihana kone sato'i rau d̄i siad̄oho.

⁶Edempara eda b̄a nahu sab̄ua mala'eka makalai ma ngemo ese langi. Mala'eka ede wa'ana haba mab̄oha Haba Mataho ma ederahid̄i d̄i karonggana d̄i manusia d̄i dunia eded̄u ru'u sara'a bangsa, suku, bahasa ro negara.

⁷Nggahi kana'e b̄a mala'eka ede, ”Dahupu d̄i Ruma Hatalla, ro roi ra wadipu na'e ra ntoru-Na! B̄ara wa'ura wakatuna Ruma Hatalla d̄i hukumkaina manusia. Nembapu Sia marakandad̄ina langi, dana, moti ro samenana mada oi!”

⁸ Mala'eka makad̄uana b̄atuna mala'eka ma sarambakaina ro nggahina, ”Wa'ura mab̄u! Kota Babel mana'e wa'ura mab̄u! Sia wa'ura kandad̄ina sara'a bangsa ndad̄i mawu kai oi anggo — eded̄u anggo rad̄i nawasu dab̄aena!”

⁹Sab̄ua mala'eka makatolukaina b̄atuna mala'eka d̄uana ede, ro nggahi kana'ena, ”Dou ma nemba binata ede lab̄o patungna, ro nantau tanda binata ede d̄i tantanggana atao rimana,

¹⁰ dou ede d̄imanono anggo Ruma Hatalla, eded̄u anggo mbani-Na rawa'u lua-Na d̄i ade hid̄ina, wati d̄i kakura kone sato'i rau! Sara'ana dou ede d̄i kancoki d̄i ade afi ro pure d̄i tando mala'eka-mala'eka maraso ro d̄i tando Ana Jimba ede.

¹¹ Ob̄u rad̄i afi ma kancoki dou-dou ede d̄imateka ntuwu santoi-ntoina. Aimarai aimangad̄i wati dengga-denggana siad̄oho ncoki iuna, eded̄u siad̄oho ma nemba binata ede ro patungna, sara'a dou ma ntau tanda ngara binata ede.”

¹²D̄i ade lampa rawi ake ela Ruma Hatalla ma to'a d̄i parenta-parenta Ruma Hatalla ro to'a d̄i Ruma Isa, paraluku lembo adena.

¹³Edempara ringa b̄a nahu eli rad̄i saroga manggahi, ”Tuntipu ake: Tampu'u ake, taho ra ntika dou-dou ma made wunga karawina d̄i ru'u Ruma!” ”Ncihi!” cambe b̄a Roh Allah. ”Siad̄oho d̄imadengga karawi matani, b̄ara hasi karawi siad̄oho d̄imalab̄o ncauna siad̄oho.”

¹⁴ Edempara nahu edaku, ndad̄i d̄i edamu sab̄ua apu ma b̄ura. Ese wawo apu ede doho sab̄ua dou d̄i edamu b̄une manusia. D̄i tuta-Na wara sab̄ua songko sangaji masa, ro d̄i rima-Na wara sab̄ua rombe ma ngaha.

¹⁵ Edempara sab̄ua mala'eka makalaina losa rad̄i ade Bait Allah. Kai eli ma na'e, sia nggahina d̄i Sia ma doho ese wawo apu ede, ”Alapu rombe-Mu ede ro wehapu hasina ake, b̄ara wa'ura raka wakatuna d̄i pako kai, dunia wa'ura ntasa d̄i pakokai!”

¹⁶Edempara Sia ma doho ese wawo apu ede, alana rombe-Na d̄i dunia, edempara pakona dunia.

¹⁷Edempara nahu edaku sab̄ua mala'eka ma kalai walina malosa rad̄i ade Bait Allah d̄i saroga. Sia rau nentina sab̄ua rombe ma ngaha.

¹⁸Sawa'u b̄a ede, sab̄ua mala'eka makalai ma ntau kuasa d̄i afi, maina rad̄i mezeba. Kai elina ma na'e sia nggahina d̄i mala'eka ma nenti rombe ma ngaha ede, ”Alapu rombemu ede ro rombepu wua-wua fu'u anggo d̄i dunia, b̄ara wua-wuana wa'ura ntasa!”

¹⁹Edempara mala'eka ede alana rombe ede d̄i dunia ro rombena wua-wua anggo rad̄i fu'una, edempara b̄ale tauna d̄i ade hid̄i puakai anggo mbani Ruma Hatalla ma ipi poda.

²⁰ Wua-wua anggo ede d̄ipua ari mai b̄a kota, ro rad̄i hid̄i puakai anggo ede rai ra'a b̄une oi sori, tolu ratu kilomete d̄o'ona, ro d̄eina ne'empara d̄ua mete.