Read Bima WAHYU 15 Bible Online

WAHYU 15 - Bima bible

WAHYU 15

¹Edempara nahu edaku d̄i langi sab̄ua ma b̄isa ra guna ro ma'ipi heba poda. Wara pidu mala'eka lab̄o pidu mbua bala ma cumpukaina. Akeku cumpukaina Ruma Hatalla kalosana mbani poda-Na.

²Sawa'u b̄a ede nahu edaku sab̄ua ma d̄i edamu b̄une kaca ma lembo b̄une moti, macampo lab̄o afi. Nahu eda rauku dou-dou ma wa'ura ngolu d̄i binata ro patungna, ro ngoluna d̄i dou ma ngarana rakatanda kai angka. Dou-dou ma ngolu ede kid̄ina d̄i kengge kaca ma'ipi mboto ede ro nentina kecapi rambei b̄a Ruma Hatalla d̄i siad̄oho.

³ Ro siad̄oho rawana rawa la Musa, ada Ruma Hatalla, ro rawa Ana Jimba. Ndakeku elina, ”Ruma, Ruma Hatalla Mawancu kuasa, nawancuku na'e ro b̄isa ra guna ruku ra rawi-Mu! Sangaji sara'a bangsa, mawancu adi poda ro ncihi karawi-Mu!

⁴ Cou ma wati dahu d̄i Ita, Ruma? Cou ma wati ngawa ngoa ra kahaba na'e ra ntoru Ita? Ita mpoampa ma raso. Sara'a bangsa d̄imamai nemba Ita b̄ara karawi-Mu ma adi wa'ura eda b̄a sara'a dou.”

⁵ Sawa'u b̄a ede nahu edaku Bait Allah d̄i saroga mahengga weki, ro Kema Ruma wara ta d̄eina.

⁶Edempara pidu mala'eka lab̄o pidu mbua bala ede losa rad̄i ade Bait Allah. Kani ra lombo siad̄oho randawi kai kaena lenan ma raso ro makancilo. Ro siad̄oho kanina b̄onto la wili randawi kai masa.

⁷Edempara sab̄ua d̄i ade upa mbua mahluk ede mbeina d̄i pidu mala'eka ede pidu mbua hid̄i randawi kai masa ma b̄inikai b̄a mbani Ruma Hatalla, — Ruma Hatalla ma mori santoi-ntoina.

⁸ Ndad̄i Bait Allah ede b̄inikai b̄a ob̄u rad̄i d̄ese ra ntasa ro kuasa Ruma Hatalla. Ro sawatipu b̄a nggori pidu mbua bala rawa'a b̄a pidu mala'eka ede, wati wara kone sab̄ua dou rau ma loana lu'u d̄i ade Bait Allah.