Read Bima WAHYU 16 Bible Online

WAHYU 16 - Bima bible

WAHYU 16

¹Edempara nahu ringaku eli mana'e rad̄i ade Bait Allah manggahi d̄i pidu mala'eka ede, ”Laopu ro luapu isi pidu mbua hid̄i taukai mbani Ruma Hatalla ede ese wawo dunia!”

² Mala'eka masarambakaina lao ro luana isi hid̄i mbanikai aka dunia. Edempara wontu lalompa mposo-mposo ma heba ro nawancuku duhana d̄i sara'a dou ma ntau tanda binata ede, ro d̄i dou-dou ma nemba patungna.

³Sawa'u b̄a ede mala'eka kad̄uakaina luana isi hid̄i taukai mbani aka moti. Ndad̄i oi moti ndad̄i b̄une ra'a dou mamade, ro madera sara'a mahluk ma mori ade moti.

⁴ Edempara mala'eka ma katolukaina luana isi mawara d̄i ade hid̄i taukaina ede aka sori-sori ro aka mada-mada oi, ndad̄i sara'a oina ndad̄i ra'a.

⁵Nahu ringaku mala'eka ma kuasa d̄i oi manggahi, ”Hukuma rab̄ab̄ukai b̄a Ita eded̄u adi, io Ma wancu raso, Ruma Hatalla ma wara, ro ma wa'ura wara!

⁶Siad̄oho wa'ura b̄ohona ra'a ela Ruma Hatalla ro ra'a nabi-nabi, ake Ita ndawimu siad̄oho nono ra'a. Poda ncihi ncao ede d̄i ru'u b̄a siad̄oho!”

⁷Edempara ringa b̄a nahu eli rad̄i mezeba manggahi, ”Ruma, Ruma Hatalla Mawancu kuasa, ncihi ro adi hukuma-hukuma rab̄ab̄u b̄a Ita!”

⁸Sawa'u b̄a ede mala'eka maka'upakaina luana isi mawara d̄i ade hid̄i taukaina aka liro, ndad̄i liro rau loa makampangi manusia kai panana ma heba ede.

⁹Manusia kampangikai b̄a pana liro mangganga, ro siad̄oho sumpa ka'ihana ngara Ruma Hatalla ma ntau kuasa d̄i bala-bala ede. Kone ade ndedekaina, siad̄oho wati ngawana toba rad̄i dosa-dosa siad̄oho ro wati ngawana roi ra wadi na'e ra ntoru Ruma Hatalla.

¹⁰ Edempara mala'eka makalimakaina luana isi mawara d̄i hid̄i taukaina aka dohokai binata ede. Ndad̄i sara'a karaja'an kuasakai binata ede ndad̄i rindi, ro manusia ha'ana rera b̄ara pilina.

¹¹Edempara siad̄oho sumpa ka'ihana Ruma Hatalla d̄i saroga b̄ara siad̄oho iuna pili ro b̄ara mposo-mposo siad̄oho. Pala siad̄oho wati ngawana toba rad̄i ruku ra rawi-ruku ra rawi siad̄oho ma dab̄ae.

¹² Sawa'u b̄a ede mala'eka maka'inikaina luana isi mawara d̄i ade hid̄i taukaina aka sori Efrat ma na'e ede. Edempara sori ede ndad̄i mango ndad̄ina sangaji-sangaji ma ramai ele mai, naloaku lampakai d̄i sori ede.

¹³Edempara nahu edaku tolu mbua roh seta, pahuna b̄une karefa. Karefa-karefa ede losa cua ndaina rad̄i asa naga, rad̄i asa binata ro rad̄i asa nabi palasu.

¹⁴Siad̄oho eded̄u roh-roh seta ma ndawi lampa rawi mab̄isa ra guna. Tolu mbua roh ede laona aka sara'a sangaji d̄i sara'a dunia lab̄o kab̄orona siad̄oho d̄i lewakaina d̄i Ainaina ma na'e, eded̄u Ainaina mamai rad̄i Ruma Hatalla Ma wancu Na'e Kuasa.

¹⁵ ”Ringapu! Nahu maiku b̄une dou mampanga! Taho ra ntikara dou ma ngge'empa jaga-jaga, ro majaga kani ra lombona, ndad̄ina sia wati lampa sarondana ro ndad̄i maja d̄i tando dou mboto!”

¹⁶ Edempara roh-roh ede kab̄orona sangaji-sangaji ede d̄i hid̄i ma ade bahasa Ibrani tangarakai Harmagedon.

¹⁷Sawa'u b̄a ede mala'eka makapidukaina luana isi mawara ade hid̄i taukaina aka woha ai. Edempara ringara eli ma na'e rad̄i hid̄i dohokai sangaji d̄i Bait Allah, ma nggahi, ”Wa'ura nggori!”

¹⁸ Edempara ndad̄ira kakila ai ma tuwu angi lab̄o eli karece ai makambimbi ma'ipi, ro epu ma heba poda. Watipu parana ndad̄ina epu b̄une ede ra'aipu tampu'u kandad̄i manusia. Akeku epu ma ipi na'e poda!

¹⁹ Kota ma na'e ede mbi'a ndad̄i tolu, ro leli rau kota-kota sara'a negara d̄i dunia. Edempara Ruma Hatalla kawarana Babel ma na'e ede. Edempara Ruma Hatalla ndawina sia nono anggo rad̄i hid̄i taukai anggo Ruma Hatalla — eded̄u anggo mbani-Na ma heba poda.

²⁰ Sara'a pulauna mbora, ro sara'a doro mbora rau.

²¹ Ura es mana'e, ma cua-cua tani lima mpuru kilogram, mab̄u rad̄i ese langi b̄ohana dou-dou. Edempara siad̄oho sumpa ka'ihana Ruma Hatalla b̄ara bala ura es ma heba poda ede.